କେନ୍ଦୁପତ୍ର ଚୋରା ଚାଲାଣ ବେଳେ ଗୋଡାଇ ଗୋଡାଇ ଧରିଲା ବନ ବିଭାଗ

ଅନୁଗୁଳ – ଅନୁଗୁଳ ଜିଲ୍ଲା ଛେଣ୍ଡିପଦା ବ୍ଲକ୍ ଅନ୍ତର୍ଗତ କୋଶଳା ଗ୍ରାମ ନିକଟରେ ଗତକାଲି ରାତ୍ରୀ ୩ ଟା ବେଳେ ବିଶେଷ ସୂତ୍ରରୁ ଖବର ପାଇ ଛେଣ୍ଡିପଦା ବନବିଭାଗ ଏକ କେନ୍ଦୁପତ୍ର ବୋଝେଇ ପିକ୍ ଅପ୍ ଭ୍ୟାନ୍ କୁ ଧରିବାରେ ସଫଳ ହୋଇଛି । ସୂଚନା ଅନୁସାରେ ଦୁଇଟି ପିକ୍ ଅପ୍ ଭ୍ୟାନ୍ ଗତକାଲି ରାତିରେ କଣିହାଁ ଅଞ୍ଚଳରୁ ବ୍ରାହ୍ମଣବିଲ୍ ଦେଇ ବାହାରକୁ କେନ୍ଦୁପତ୍ର ଚାଲାଣ ହେଉଥିବା ବନ ବିଭାଗ ଖବର ପାଇଥିଲା । ଏଥିପାଇଁ ବାଟରେ ବନ ବିଭାଗ ଛକି ରହି ଗାଡିକୁ ଅଟକାଇବାକୁ ଚେଷ୍ଟା କରିଥିଲା । ତେବେ ବନ ବିଭାଗକୁ ଦେଖି ଉଭୟ ଗାଡି ଫେରାର ହୋଇ ଯିବାକୁ ଚେଷ୍ଟା କରିଥିଲେ । ଛେଣ୍ଡିପଦା ବନବିଭାଗ ଗାଡ଼ିକୁ ପିଛା କରି କୋଶଳା ଗ୍ରାମ ନିକଟରେ ଗୋଟିଏ କେନ୍ଦୁପତ୍ର ବୋଝେଇ ଗାଡ଼ିକୁ ଅଟକାଇବାକୁ ସଫଳ ହୋଇଥିଲା । ଅନ୍ୟ ଗାଡି ଟି ଫେରାର ହୋଇଥିବା ଜଣା ପଡିଛି । ଛେଣ୍ଡିପଦା ବନବିଭାଗ ଜବତ ଗାଡିକୁ କାର୍ଯ୍ୟାଳୟକୁ  ଆଣି ଯାଞ୍ଚ କରିବା ବେଳେ ଗାଡ଼ିରେ ୨୩୫ ପ୍ୟାକେଟ କେନ୍ଦୁପତ୍ର ଥିବା ଦେଖିବାକୁ ମିଳିଥିଲା । ଏହି ଗାଡିର ଚାଳକ ମଧ୍ୟ ଫେରାର ହୋଇ ଯାଇଥିବା ବେଳେ ବନ ବିଭାଗ ଅଧିକ ତଦନ୍ତ କରୁଛି ।

Advertisement