ଅନୁଗୁଳ – ଅନୁଗୁଳ ସଦର ଥାନା ପୁଲିସ ହାବୁଡ଼ରେ ଡକାୟତ ଗ୍ୟାଙ୍ଗ । ପେଟ୍ରୋଲ ପମ୍ପ ଲୁଟ ପାଇଁ ଯୋଜନା କରୁଥିବା ବେଳେ ୪ ଜଣ ଡକାୟତଙ୍କୁ ଗିରଫ କଲା ପୁଲିସ । ସେମାନଙ୍କ ନିକଟରୁ ଖଣ୍ଡା ସହ ମାରଣାସ୍ତ୍ର , କାର ମୋବାଇଲ ଆଦି ଜବତ କରିଛି ପୁଲିସ ।
ସୂଚନା ଅନୁସାରେ ସରଧାପୁର ଗାଁ ମୁଣ୍ଡରେ କିଛି ଡକାୟତ ବସି ଡକାୟତି ଯୋଜନା କରୁଥିବା ଏକ ବିଶ୍ୱସ୍ତ ସୂତ୍ରରୁ ସଦର ଥାନା ପୁଲିସ ଖବର ପାଇଥିଲା । ଖବର ପାଇବା ପରେ ପୁଲିସ ସଦଳବଳେ ସେଠାରେ ଚଢ଼ାଉ କରିଥିଲା । ପୁଲିସକୁ ଦେଖି ଫେରାର ହେବାକୁ ଚେଷ୍ଟା କରୁଥିବା ବେଳେ ପୁଲିସ ସେମାନଙ୍କ ମଧ୍ୟରୁ ୪ ଜଣଙ୍କୁ କାବୁ କରି ନେଇଥିଲା । ପଚରାଉଚରା ବେଳେ ସେମାନେ କରଡ଼ାଗାଡ଼ିଆ ଠାରେ ଥିବା ଏକ ପେଟ୍ରୋଲ ପମ୍ପ ଲୁଟ କରିବାକୁ ଯୋଜନା କରୁଥିବା ମାନି ଯାଇଥିଲେ । ଏଥିପାଇଁ ପୁଲିସ ୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତଙ୍କ ଭିତରେ ଥିବା କୁଶାସିଙ୍ଗା ଗାଁର ପୁରୁଷୋତ୍ତମ ଭୁତିଆ @ ଟୋପା ନାମରେ ୨୨ ରୁ ଅଧିକ ଚୋରି , ରାହାଯାନୀ , ଡକାୟତି ଆଦି ମାମଲା ଥିବା ବେଳେ ସେ ଏହି ଲୁଟ ଯୋଜନାର ମାସଟରମାଇଣ୍ଡ ଥିଲା । ଏହା ସହ ଗିରଫ ଅଭିଯୁକ୍ତ ପୁରୁଣାଗଡ଼ ଗାଁର ଅନିଲ ବେହେରା ନାମରେ ୧୯ ଟି ମାମଲା ରହିଛି । ସେହିଭଳି ତଲଗଡ଼ ଗାଁର ସୁରେନ୍ଦ୍ର ନାଏକ ନାଁରେ ପୂର୍ବରୁ ୬-୭ ଟି ଚୋରି , ଡକାୟତି ,ରାହାଯାନୀ ଭଳି ମାମଲା ରହିଛି । ଗିରଫ ମାନଙ୍କ ମଧ୍ୟରେ ଜଣେ ନାବାଳକ ମଧ୍ୟ ରହିଛି । ଏମାନଙ୍କ ବ୍ଯତୀତ ଅନ୍ୟ ଦୁଇ ଜଣ ଫେରାର ଥିବା ମଧ୍ୟ ଜଣା ପଡିଛି । ପୁଲିସ ଗୀରାଫ ଅଭିଯୁକ୍ତ ମାନଙ୍କୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ସେମାନଙ୍କ ନିକଟରୁ ଏକ କାର , ତିନୋଟି ଖଣ୍ଡା ସମେତ ଛୋଟ ମୋଟ ମାରଣାସ୍ତ୍ର , ୬ ଟି ମୋବାଇଲ ଓ ମଦ ବୋତଲ ଜବତ କରିଛି । ଏ ନେଇ ଆଜି ଏକ ସାମ୍ବାଦିକ ସମ୍ମିଳନୀରେ ଅନୁଗୁଳ ଏସ ପି ରାହୁଲ ଜୈନ ସୂଚନା ଦେଇଛନ୍ତି ।
