ଅନୁଗୁଳ – ଅନୁଗୁଳ ଜିଲ୍ଲା ତାଳଚେର ଅଞ୍ଚଳରେ ଏକ ବଡ଼ ଧରଣର ଡକାୟତି ପାଇଁ ଉଦ୍ୟମ ହେଉଥିବା ବେଳେ ୫ଜଣଙ୍କୁ ପୁଲିସ ଗିରଫ କରିବାରେ ସଫଳ ହୋଇଛି । ଗିରଫ ଅଭିଯୁକ୍ତ ମାନେ ହେଲେ ବିହାରୀପୁର ଗ୍ରାମର ଦୀପୁ ନାଏକ , ଚାଉଳିକୁଟା ଗ୍ରାମର ହାପି ନାଏକ , ରେମୁଆଁ ମୁଣ୍ଡା ସାହିର ସରୋଜ ସିଂହ, ଚାଉଳିକୁଟା ଗ୍ରାମର କପିଳ ନାଏକ ଓ ଧରମପୁର ଗ୍ରାମର କମଳାକାନ୍ତ ମହାପାତ୍ର । ସେମାନଙ୍କ ନିକଟରୁ ବହୁ ମାରଣାସ୍ତ୍ର ଜବତ କରାଯାଇଥିବା ପୁଲିସ ସୂଚନା ଦେଇଛି । ସୂଚନା ଅନୁସାରେ , ଗିରଫ ଅଭିଯୁକ୍ତ ମାନେ ପିସ୍ତଲ, ଖଣ୍ଡା, ଭୁଜାଲି ଭଳି ମାରାଣାସ୍ତ୍ର ଧରି ଏକ ବଡ ଧରଣର ଡକାୟତି କରିବା ପାଇଁ ଯୋଜନା କରୁଥିଲେ । କୌଣସି ସୂତ୍ରରୁ ଖବର ପାଇ ତାଳଚେର ପୁଲିସ ଚଢ଼ାଉ କରିବା ସହ ଏକ ବଡ଼ ଧରଣର ଡକାୟତି ପଣ୍ଡ କରିବାରେ ସକ୍ଷମ ହୋଇଥିଲେ । ଅଭିଯୁକ୍ତ ମାନେ ତାଳଚେର ଅଞ୍ଚଳର ବିଭିନ୍ନ ସ୍ଥାନରେ ହୋଇଥିବା ଚୋରି , ରାହାଜାନିରେ ସମ୍ପୃକ୍ତ ଥିବା ପୁଲିସ ଜାଣିବାକୁ ପାଇଛି । ସେମାନଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି ।