ଛେଣ୍ଡିପଦା – ଅନୁଗୁଳ ଜିଲ୍ଲା ଛେଣ୍ଡିପଦା ପୁଲିସ ବିଲମ୍ବିତ ରାତିରେ ଏକ ଜୁଆ ଆଡ୍ଡା ଉପରେ ଚଢ଼ାଉ କରିଥିଲା । ଏହି ଚଢ଼ାଉ ବେଳେ କିଛି ଜୁଆଡି ଫେରାର ହୋଇ ଯାଇଥିବା ବେଳେ ୪ ଜଣ ଜୁଆଡ଼ିଙ୍କୁ ଗିରଫ କରିବାରେ ଛେଣ୍ଡିପଦା ପୁଲିସ ସକ୍ଷମ ହୋଇଥିଲା । ସୂଚନା ଅନୁସାରେ ନୂଆଁପଡା ଗାଁର ପେଟ୍ରୋଲ ଟାଙ୍କି ପଛ ପାଖରେ ଥିବା ଏକ ସ୍ଥାନରେ ଅନେକ ଦିନ ହେଲା ଜୁଆ ଆଡ୍ଡା ଚାଲିଥିବା ପୁଲିସ ସୂଚନା ପାଇଥିଲା । ଏହି ସୂଚନା ଅନୁସାରେ ଶୁକ୍ରବାର ବିଳମ୍ବିତ ରାତିରେ ଛେଣ୍ଡିପଦା ପୁଲିସ ସେହି ସ୍ଥାନରେ ସଦଳବଳେ ଚଢ଼ାଉ କରିଥିଲେ । ଚଢ଼ାଉ ବେଳେ ୬ ରୁ ୭ ଜଣ ଜୁଆଡ଼ି ଖସି ପଳାଇବାକୁ ସକ୍ଷମ ହୋଇଥିଲେ । ତେବେ ଘଟଣା ସ୍ଥଳରୁ ପୁଲିସ ୪ ଜଣଙ୍କୁ ଗିରଫ କରିଥିଲା । ଗିରଫ ଜୁଆଡ଼ି ମାନେ ହେଲେ ନୂଆପଡା ଗାଁର ଅନିଲ ମହାପାତ୍ର , ଛେଣ୍ଡିପଦା ବଜାରସାହିର ସୁବଳ ବେହେରା , କଇଥସାହିର ରତିକାନ୍ତ ମାଝୀ ଓ କେନ୍ଦ୍ରାପଡା ଜିଲ୍ଲା ଗୋଧନା ଗାଁର ଭାସ୍କର ରାଉତ । ଏହି ଚଢ଼ାଉ ବେଳେ ଜୁଆଡ଼ି ମାନେ ଛାଡି ଯାଇଥିବା ୮ ଟି ମୋଟରସାଇକେଲ , ତାସ , ୭ ହଜାର ୫ ଶହ ଟଙ୍କା ଓ ୩ ଟି ମୋବାଇଲ ଜବତ କରାଯାଇଛି । ପୁଲିସ ଆଜି ଗିରଫ ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରିଛି ।