ଛେଣ୍ଡିପଦା – ଅନୁଗୁଳ ଜିଲ୍ଲା ଛେଣ୍ଡିପଦା ଥାନା ବାହାଳସାହି ଅଞ୍ଚଳରେ ଖଣି ବିଭାଗ ଓ ପୁଲିସ ପକ୍ଷରୁ ଚଢ଼ାଉ କରି ୧୫ରୁ ଉର୍ଦ୍ଧ୍ବ ବେଆଇନ ଚୋରା ଖଣିରୁ ବିପୁଳ ପରିମାଣରେ କୋଇଲା ଜବତ ସହ ବେଆଇନ ଖଣି ଗୁଡିକୁ ପୋତି ଦିଆଯାଇଛି । ସୂଚନା ଅନୁସାରେ ଦୀର୍ଘ ବର୍ଷ ହେବ ଛେଣ୍ଡିପଦା , ବାହାଳସାହି ଅଞ୍ଚଳରେ ଚୋରା କୋଇଲା ଖଣି ଚାଲିଥିଲା । ସେଠାରୁ ଜିଲ୍ଲା ତଥା ଜିଲ୍ଲା ବାହାରକୁ ଟ୍ରିପ ଟ୍ରିପ କୋଇଲା ଚାଲାଣ ହେଉଥିଲା । ତେବେ ସ୍ଥାନୀୟ ପ୍ରଶାସନ ଓ ପୁଲିସ ବେଳେବେଳେ ଲୋକ ଦେଖାଣିଆ ଚଢାଉ କରି ଚୁପ ହୋଇ ବସି ଯାଉଥିଲା । ତେବେ ଗତ ୧୪ ତାରିଖରେ ଏହି ବେଆଇନ କୋଇଲା ଖାତରୁ କୋଇଲା ଖୋଳିବା ବେଳେ ଲବଣି ଭୁତିଆ ନାମକ ଜଣେ ବ୍ୟକ୍ତି ସାଇକେଲ ସହିତ ୫୦ ଫୁଟ କୋଇଲା ଖଣି ତଳକୁ ଖସି ପଡିଥିଲେ l ଫଳରେ ତାଙ୍କର ମୃତ ହୋଇଥିଲା । ପୁଲିସ ଏହି ଘଟଣାରେ ଉକ୍ତ କୋଇଲା ଖଣି ମାଲିକ ସୁଶାନ୍ତକୁ ଗିରଫ କରି କୋର୍ଟ ଚାଳଣ କରିବା ସହ ବେଆଇନ କୋଇଲା ଖଣି ଚଳାଉ ଥିବା ୧୭ ଜଣଙ୍କ ନାମରେ ମାମଲା ରୁଜୁ କରିଥିଲା । ଏହା ପରେ ପୁଲିସ ଓ ଖଣି ବିଭାଗର ଚେତା ପଶିଥିଲା । ଆଉ ଆଜି ୧୫ଟି କୋଇଲା ଖଣି ଉପରେ ଚଢ଼ାଉ କରା ଯାଇଥିଲା । ଚଢ଼ାଉ ସମୟରେ ଖଣି ମାଫିଆ ମାନେ ଫେରାର ଥିବା ଜଣାପଡିଛି ।