ଅନୁଗୁଳ – ଅନୁଗୁଳ ଜିଲ୍ଲା ପୁଲିସର ଜଣେ କର୍ମଚାରୀଙ୍କ ଏବେ ଏକ ଭିଡିଓ ସାମନାକୁ ଆସିଛି । ଯେଉଁଥିରେ ରାତି ଅଧରେ ଜଣେ ମହିଳାଙ୍କ ଘରକୁ ପୁଲିସ ବାବୁ ଖାକି ପୁଲିସ ପୋଷାକ ପିନ୍ଧି ଗଲେ ଆଉ ଆଉ ଖରାପ ସମ୍ପର୍କ ରଖିବା ପାଇଁ ପଚାରିଲେ । ଏଥିରେ ମହିଳା ଜଣଙ୍କ ସହମତି ପ୍ରକାଶ ନ କରିବା ସତ୍ବେ ପୁଲିସବାବୁ ଫେରି ଯାଇ ନଥିଲେ । ବରଂ , ବିଭିନ୍ନ ଢଙ୍ଗରେ ପ୍ରଭାବିତ କରି ସିଧା ସିଧା ‘ହବ କି ନାହିଁ.. ବୋଲି ବେଲଜ୍ୟାଙ୍କ ଭଳି ପଚାରିଥିଲେ । ଶେଷରେ ମହିଳା ବାରମ୍ବାର ମନା କରି ଥାନାକୁ ଫୋନ କରିବାରୁ ଫେରି ଯାଇଥିଲେ ରଙ୍ଗିଲା ପୁଲିସ ବାବୁ ।

ପୁଲିସ ବାବୁଙ୍କ ଏଭଳି ଆଚରଣର ଭିଡିଓ ଭାଇରାଲ ପରେ ଏବେ ଅନୁଗୁଳ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ସୂଚନା ଅନୁସାରେ, ତାଳଚେର ଥାନା ଅଧୀନରେ ସ୍ବତନ୍ତ୍ର ପୁଲିସ ଅଧିକାରୀ ଭାବେ ନିଯୁକ୍ତି ପାଇଥିବା ନୀଳମଣି ମହାନ୍ତି ହାଇୱେ ପାଟ୍ରୋଲିଂ ଦାୟିତ୍ବରେ ଥିଲେ । ଗତ ୨୩ ତାରିଖ ରାତି ପ୍ରାୟ ସାଢେ ୩ ଟା ବେଳକୁ ସେ ତାଳଚେର ମହାଦେବ ବିହାର ଅଞ୍ଚଳରେ ଜଣେ ମହିଳାଙ୍କ ଘରକୁ ଯାଇଥିଲେ । ତାଙ୍କ ଘର କବାଟ ବାଡେଇଥିଲେ। ଝରକା ଖୋଲି ମହିଳା ଜଣଙ୍କ ପୁଲିସ ବାବୁଙ୍କୁ ଦେଖି କବାଟ ଖୋଲିଥିଲେ । ମହିଳା ଜଣଙ୍କ କବାଟ ଖୋଲିବା ପରେ ପୁଲିସ ବାବୁ ଜଣଙ୍କ ଘର ଭିତରକୁ ପଶିବା ସହ ମହିଳା ଜଣଙ୍କୁ ଅସଦାଚରଣ କରିଥିଲେ । ଏପରିକି ମହିଳା ଜଣଙ୍କୁ କୁଣ୍ଢାଇ ଧରିଥିଲେ । କୌଣସି ମତେ ତାଙ୍କ କବଳରୁ ମହିଳା ଜଣଙ୍କ ମୁକୁଳି ଯାଇ ପୁଲିସ ବାବୁ କେଉଁଥିପାଇଁ ଏଠାକୁ ଆସିଛନ୍ତି ଆଉ କଣ ଚାହୁଁଛନ୍ତି ପଚାରିବା ସହ ତାଙ୍କର ସବୁ କଥା ମୋବାଇଲରେ ଭିଡିଓ ରେକଡିଙ୍ଗ କରିଥିଲେ । ସେହି ସମୟରେ ପୁଲିସ ବାବୁ ଜଣଙ୍କ , ଯଦି ଦବ କୁହ.. ନ ହେଲେ ଆମେ ଚାଲିଯିବୁ ବୋଲି କହିଥିଲେ । ମହିଳା ଜଣଙ୍କ ମନା କରିବା ସତ୍ତ୍ବେ ସେ ତାଙ୍କ ବେଡରେ ଯାଇ ବସିଥିଲେ । ବାଧ୍ୟ ହୋଇ ମହିଳା ଜଣଙ୍କ ତାଳଚେର ଥାନାକୁ ଫୋନ କରିବା ପରେ ପୁଲିସ ବାବୁ ଜଣଙ୍କ ସେଠାରୁ ପଳାଇ ଆସିଥିଲେ । ପରେ ମହିଳା ଜଣଙ୍କ ତାଳଚେର ଥାନାରେ ଏଥିନେଇ ଲିଖିତ ଅଭିଯୋଗ କରିଥିଲେ । ପୁଲିସ ଏହି ଅଭିଯୋଗ ଆଧାରରେ ୩୫୦/୨୧ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା । ଅଭିଯୁକ୍ତ ପୁଲିସ ଅଧିକାରୀଙ୍କ ବିରୋଧରେ ପ୍ରମାଣ ଥିବାରୁ ତାଙ୍କ ବିରୋଧରେ ଆଇପିସିର ୪୫୪/୩୭୬/୩୨୩/୫୧୧/୫୦୬ ଦଫାରେ ମାମଲା ରୁଜୁ କରି ଗିରଫ କରା ଯାଇଥିବା ଜଣା ପଡିଛି । ଅପରପକ୍ଷରେ ତାଳଚେରର ଆଉ ଜଣେ କନେଷ୍ଟବଳ ମଧ୍ୟ ଏହି ମହିଳାଙ୍କୁ ଦୁଷ୍କର୍ମ ଉଦ୍ୟମ କରି ମଧ୍ୟ ଗିରଫ ହୋଇଛନ୍ତି । ଅଭିଯୋଗ ଅନୁସାରେ, କନେଷ୍ଟବଳ ବାରନି କିସାନ କିଛି ଦିନ ତଳେ ମହିଳାଙ୍କ ଘରକୁ ଯାଇଥିଲେ । ମହିଳା ଜଣଙ୍କ ଏକୁଟିଆ ଦେଖି ତାଙ୍କ ସହ ଦୁଷ୍କର୍ମ କରିବାକୁ ଉଦ୍ୟମ କରିଥିଲେ । ମହିଳା ଜଣଙ୍କ ବିରୋଧ କରିବାରୁ ସେ ଚାଲି ଆସିଥିଲେ । କନେଷ୍ଟବଳ ଜଣଙ୍କ ମଧ୍ୟ ପୁଲିସ ପୋଷାକ ପିନ୍ଧି ଦୁଷ୍କର୍ମ ଉଦ୍ୟମ କରିଥିବା ମହିଳା ଜଣଙ୍କ ଅଭିଯୋଗ କରିଛନ୍ତି । ତାଙ୍କୁ ମଧ୍ୟ ତାଳଚେର ପୁଲିସ ଗିରଫ କରି କୋର୍ଟ ଚାଲାଣ କରିଛି ।