ଅନୁଗୁଳ – କେନ୍ଦ୍ର ସରକାରଙ୍କ ଦରଦାମ ବୃଦ୍ଧି ପ୍ରତିବାଦରେ ରାଜରାସ୍ତାକୁ ଓଲ୍ଲାଇଛି ବିଜୁ ମହିଳା ଜନତା ଦଳ । କେନ୍ଦ୍ର ସରକାର ପେଟ୍ରୋଲ, ଡିଜେଲ, ରନ୍ଧନଗ୍ୟାସ ସହ ଅତ୍ୟାବଶ୍ୟକ ସାମଗ୍ରୀର ଅହେତୁକ ଦରଦାମ ବୃଦ୍ଧି କରିଛନ୍ତି ଯାହା ଲୋକଙ୍କୁ ତଳିତଲାନ୍ତ କରିଛି । ଦରଦାମ ବୃଦ୍ଧି ଯୋଗୁ ଲୋକେ ବହୁ ଅସୁବିଧା ଭୋଗ କଲେଣି । ତୈଳଦର ବୃଦ୍ଧି ଯୋଗୁ ଗାଡି ଚଳାଇବା କଷ୍ଟକର ହୋଇ ପଡିଥିବା ବେଳେ ପନିପରିବା ଦର ଆକାଶଛୁଆଁ ହୋଇଛି । ଦରଦାମ ରେ ଏଭଳି ଆହେତୁକ ବୃଦ୍ଧି ଯୋଗୁଁ ସାଧାରଣ ଲୋକେ ଚିନ୍ତାରେ ପଡିଲେଣି । ଯାହାର ପ୍ରଭାବ ଦୈନଦିନ ଚଳଣି ଠାରୁ ଆରମ୍ଭ କରି ରୋଷେଇ ଶାଳ ରେ ପଡିଛି । ହେଲେ କେନ୍ଦ୍ର ସରକାରଙ୍କ ନିଦ ଭାଙ୍ଗୁନି । ପ୍ରତିଦିନ ସବୁ ଜିନିଷର ଦରବୃଦ୍ଧି ହେଉଛି । ଲୋକଙ୍କୁ ଶୋଷଣ କରି ଅଛେ ଦିନ ପାଳନ କରୁଥିବା କେନ୍ଦ୍ର ସରକାରଙ୍କୁ ବିଜୁ ମହିଳା ଜନତା ଦଳ ପକ୍ଷରୁ କଡା ନିନ୍ଦା କରି ପ୍ରତିବାଦ କରାଯାଇଛି । ଅନୁଗୁଳ ଷ୍ଟାଡିଅମ ଠାରୁ ଶଗଡ଼ରେ ଗ୍ୟାସ ବୋଝେଇ କରି ଏକ ଶୋଭାଯାତ୍ରାରେ ସହର ପରିକ୍ରମା କରିବା ପରେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିଜୁ ମହିଳା ଜନତା ଦଳ ପକ୍ଷରୁ ଅଭିନବ ଭାବେ କେନ୍ଦ୍ର ସରକାରଙ୍କୁ ଭର୍ତ୍ସନା କରାଯାଇଛି । ଦରବୃଦ୍ଧି କାରଣରୁ ଲୋକେ ତ୍ରାହି ତ୍ରାହି ଡାକୁଛନ୍ତି ହେଲେ ଲୋକଙ୍କ କଥା କେନ୍ଦ୍ର ସରକାରଙ୍କ କାନକୁ ଶୁଣା ଯାଉନାହିଁ । କେନ୍ଦ୍ରର ଏପରି ନୀତିକୁ ହଜାର ହଜାର ସଂଖ୍ୟାରେ ମହିଳା ମାନେ ଯୋଗ ଦେଇ ବିରୋଧ କରିଛନ୍ତି । ଆଜିର ଏହି ବିକ୍ଷୋଭ ବେଳେ ଅନୁଗୁଳ ବିଜୁ ଜନତା ଦଳର ସଭାପତି ମହେନ୍ଦ୍ର ବସ୍ତିଆ, ଅରୁଣାଭ ସିଂହ, ସୁଜିତ ଦ୍ବିବେଦୀ, ରିତା ସିଂହ, କଲ୍ୟାଣି ବିଳାସ, ଅଞ୍ଜଳି ଭୋଇ , ରୁବି ସାହୁ, ମାଳିନୀ ସର, ମଞ୍ଜୁଲତା ସାହୁ, ଜ୍ୟୋତିର୍ମୟୀ ଦେହୁରୀ, ଉଲ୍ଲାସ ସାହୁ, ପ୍ରିୟଦର୍ଶୀ ପଟ୍ଟନାୟକ ଓ ଅନ୍ୟ ମହିଳା ନେତୃ ମଣ୍ଡଳୀଙ୍କ ଉପସ୍ଥିତିରେ ଜିଲ୍ଲାପାଳଙ୍କ ଜରିଆରେ ମହାମହିମ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଏକ ସ୍ମାରକ ପତ୍ର ପ୍ରଦାନ କରିଥିଲେ ।
Advertisement
