ଅନୁଗୁଳ – ଅନୁଗୁଳ ଜିଲ୍ଲା କିଶୋରନଗର ଥାନା କଟାପାଲି ଗାଁରେ ବୃଦ୍ଧା ମାଙ୍କୁ ଅବସର ପ୍ରାପ୍ତ ଶିକ୍ଷକଙ୍କ ମାଡ ମାରିବା ଘଟଣାରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି ପୁଲିସ । ଅଭିଯୁକ୍ତ ପୁଅକୁ ଗିରଫ କରି କୋର୍ଟ ଚାଲାଣ କରାଯାଇଛି । ସୂଚନା ଅନୁସାରେ ଅନୁଗୁଳ ଜିଲ୍ଲା କିଶୋରନଗର ଥାନା କଟାପାଲି ଗାଁରୁ  ଗତକାଲି ଆସିଥିଲା ଏକ ଅଭାବନୀୟ ଦୃଶ୍ୟ । ବୃଦ୍ଧା ମାଙ୍କ ଉପରେ ଉଚ୍ଚ ବିଦ୍ୟାଳୟର ଅବସରପ୍ରାପ୍ତ ଶିକ୍ଷକ ହୃଷିକେଶ ପ୍ରଧାନ ଅକଥନୀୟ ଅତ୍ୟାଚାର କରୁଥିବାର ଭିଡ଼ିଓ ଭାଇରାଲ ହୋଇଥିଲା । ଦୁନିଆକୁ ଉଚିତ ଶିକ୍ଷା ଦେଇ ମାର୍ଗଦର୍ଶକ ସାଜୁଥିବା ଜଣେ ଶିକ୍ଷକ ନିଜ ଜନ୍ମ କଲା ମାଙ୍କୁ ଏଭଳି ଅକଥନୀୟ ଅତ୍ୟାଚାର କରିବାର ଦୃଶ୍ୟ ଦେଖିବାକୁ ମଧ୍ୟ କଷ୍ଟ ଅନୁଭବ ହେଉଥିଲା । ତେବେ ଏ ନେଇ ଆଜି ବୃଦ୍ଧାଙ୍କ ବଡ ବହୁ ଥାନାରେ ଅଭିଯୋଗ କରିବା ପରେ ପୁଲିସ ସମ୍ପୃକ୍ତ ଶିକ୍ଷକ ହୃଷିକେଶ ପ୍ରଧାନଙ୍କୁ ଗିରଫ କରି କୋର୍ଟ ଚାଲାଣ କରିଛି । ତେବେ ହୃଷିକେଶ ତାଙ୍କ ମାଙ୍କୁ ମାଡ ମାରିବା ଘଟଣା ଆଜିର ନୁହଁ । ବୃଦ୍ଧା ସରସ୍ୱତୀଙ୍କ ଦୁଇ ପୁଅ ଭିତରୁ ହୃଷିକେଶ ସାନ ପୁଅ । ବଡ ପୁଅଙ୍କ ମୃତ୍ୟୁ ହୋଇ ସାରିଥିବା ବେଳେ ବିଧବା ସ୍ତ୍ରୀ ଓ ହୃଷିକେଶଙ୍କ ମଧ୍ୟରେ ମା‘ଙ୍କୁ ପାଳିବା ପାଇଁ ଉଭୟଙ୍କ ମଧ୍ୟରେ ୧୫ ଦିନିଆ ପାଳି ହୋଇଛି । ତେବେ ହୃଷୀକେଶଙ୍କ ୧୫ ଦିନ ପାଳି ସମୟରେ ମା’ଙ୍କ ଉପରେ ଅକଥନୀୟ ଅତ୍ୟାଚାର ଆରମ୍ଭ ହୋଇଯାଏ । ଖାଇବା ହେଉ କି ଔଷଧ ଠିକ ସମୟରେ ମାଗିଲେ ମାଡ ମାରୁଥିଲେ ହୃଷିକେଶ । ଖାଲି ଯେ ମାଙ୍କୁ ମାଡ ମାରନ୍ତି ତା ନୁହେଁ , ଘରଡ଼ିହ ଜମିକୁ ନେଇ ବିଧବା ଭାଉଜଙ୍କୁ ମଧ୍ୟ ଆକ୍ରମଣ କରନ୍ତି ବୋଲି ଅଭିଯୋଗ ହୋଇଛି । ଗତକାଲି ମଧ୍ୟ ଏଭଳି ମାଡ଼ ମାରିବା ସମୟରେ କେହି ଜଣେ ମୋବାଇଲରେ ଭିଡିଓ ଉତ୍ତୋଳନ କରି ଭାଇରାଲ କରିଥିଲେ । ଆଉ ଆଜି ପୁଲିସ ତାଙ୍କୁ ଗିରଫ କରି କୋର୍ଟ ଚାଲାଣ କରିଛି ।