ଅନୁଗୁଳ – ଅନୁଗୁଳ ଭିଜଲାନ୍ସ କୋର୍ଟରେ ମଙ୍ଗଳବାର ଏକ ଗୁରୁତ୍ବପୁର୍ଣ୍ଣ ରାୟ ପ୍ରକାଶ ପାଇଛି । ଭିଜିଲାନ୍ସ କୋର୍ଟର ଜଜ୍ ଦିଗାମ୍ବର ପୃଷ୍ଟି ଏକ ଲାଞ୍ଚ ନେବା ମାମଲାର ଶୁଣାଣି କରି ଆରଆଇ ଶୁଭଶ୍ରୀ ପ୍ରିୟଦର୍ଶିନୀଙ୍କୁ ୪ ବର୍ଷ କାରାଦଣ୍ଡରେ ଦଣ୍ଡିତ କରିବା ସହ ୮ ହଜାର ଟଙ୍କା ଜରିମାନା ଅନାଦେୟ ୫ ମାସ କାରାଦଣ୍ଡରେ ଦଣ୍ଡିତ କରିଛନ୍ତି । ସୂଚନା ଅନୁସାରେ , ୨୦୧୫ ମସିହାରେ ରେଢ଼ାଖୋଲ କଦଳୀଗଡ଼ ଅଞ୍ଚଳର ପିଙ୍କୁ ରଞ୍ଜନ ବେହେରା ଆଠମଲ୍ଲିକ ତହସିଲରେ ପିଙ୍କୁ ଓ ତାଙ୍କ ଭାଇ ଦୁଇଟି ଜାରା ମ୍ୟୁଟେସନ୍ ପାଇଁ ଆବେଦନ କରିଥିଲେ । ଏହି ଜାଗା ମ୍ୟୁଟେସନ୍ ପାଇଁ କିଆକଟାରେ ଆରଆଇ ଭାବେ କାର୍ଯ୍ୟ କରୁଥିବା ଶୁଭଶ୍ରୀ ଲାଞ୍ଚ ମାଗିଥିଲେ । ଲାଞ୍ଚ ବାବଦକୁ ୪,୫୦୦ ଟଙ୍କା ନଦେଲେ କାର୍ଯ୍ୟ ହେବ ନାହିଁ ବୋଲି କହିଥିଲେ । ବାରମ୍ବାର ଦୌଡ଼ିବା ପରେ ପିଙ୍କୁ ଅନୁଗୁଳ ଭିଜଲାନ୍ସର ଦ୍ଵାରସ୍ଥ ହୋଇଥିଲେ । ଭିଜଲାନ୍ସ ବିଭାଗ ଜାଲ ବିଛାଇ ଶୁଭଶ୍ରୀଙ୍କୁ ଲାଞ୍ଚ ନେବା ସମୟରେ ଧରିଥିଲେ । କଟକ ଭିଜିଲାନ୍ସ ଡିଭିଜନ୍ ମାମଲା ନଂ ୫୧/୧୬ରେ ମାମଲା ରୁଜୁ କରିବା ସହ ତାଙ୍କୁ ଗିରଫ କରାଯାଇଥିଲା । ପରେ ମାମଲାର ବିଚାର ଅନୁଗୁଳ ଭିଜିଲାନ୍ସ କୋର୍ଟରେ ଚାଲିଥିଲା । ଏହି ମାମଲାର ଶୁଣାଣି କରାଯାଇ ମଙ୍ଗଳବାର ତତ୍‌କାଳୀନ କିଆକଟା ଆରଆଇ ଶୁଭଶ୍ରୀଙ୍କ ବିରୋଧରେ ଦଣ୍ଡ ବିଧାନ ଶୁଣାଯାଇଛି । ଦୋଷୀ ସାବ୍ୟସ୍ତ ହୋଇଥିବା ଆରଆଇ ଶୁଭଶ୍ରୀ ପ୍ରିୟଦର୍ଶନୀ ଏବେ ପାଳଲହଡ଼ାରେ ଆରଆଇ ଭାବେ କାର୍ଯ୍ୟ କରୁଛନ୍ତି । ତାଙ୍କ ଘର ବଅଁରପାଳ ବ୍ଳକ ବଳରାମପ୍ରସାଦ ବୋଲି ଜଣା ପଡିଛି । ମୋଟ ୭ ଜଣ ସାକ୍ଷ୍ୟ ପ୍ରମାଣକୁ ଭିତ୍ତି କରି ଭିଜଲାନ୍ସ ଜଜ୍ ଦିଗାମ୍ବର ସୃଷ୍ଟି ଏଭଳି ଦଣ୍ଡାଦେଶ ଶୁଣାଇଥିବା ବେଳେ ଏହି ମାମଲାକୁ ସରକାରୀ ଓକିଲ ଉଦୟ ଶଙ୍କର ମିଶ୍ର ପରିଚାଳନା କରିଥିଲେ ।