ଅନୁଗୋଳ – ଅନୁଗୋଳ ସହରରେ ଲୁଟ୍ , ଛିନତାଇର ଆତଙ୍କ ଧିରେ ଧିରେ ବଢ଼ିବାରେ ଲାଗିଛି । ପ୍ରତ୍ୟେକ ଦିନ ଜିଲ୍ଲାର କେଉଁଠି ନା କେଉଁଠି ଏଭଳି ଦୁର୍ବୃତ୍ତଙ୍କ ଲୁଟ୍ ର ଶିକାର ହେଉଛନ୍ତି ସାଧାରଣ ଲୋକ । ତେବେ ଅନୁଗୋଳ ସହରରେ ମଧ୍ୟ ଏବେ ଲୁଟେରା ମାନେ ସେମାନଙ୍କ ସାମ୍ରାଜ୍ୟ ବଢାଇବାରେ ଲାଗିଲେଣି । ଗତକାଲି ନୁଆଁ ବସଷ୍ଟାଣ୍ଡ ନିକଟରୁ ମୋଟରସାଇକେଲ ଡିକି ଭାଙ୍ଗି ଦେଢ଼ ଲକ୍ଷ ଟଙ୍କା ଲୁଟିବାକୁ ଚେଷ୍ଟା କରୁଥିବା ବେଳେ ସାଧାରଣ ଲୋକ ତାକୁ କାବୁ କରି ପୁଲିସର ଜିମା ଦେଇଥିଲେ । ତେବେ ଆଜି ପୁରୁଣା ବସଷ୍ଟାଣ୍ଡ ଅଞ୍ଚଳରୁ ଜଣେ ମହିଳାଙ୍କ ଦେଢ଼ ଲକ୍ଷ ଟଙ୍କା ଥିବା ବ୍ୟାଗ ଛଡେଇ ନେଇ ଦୁର୍ବୃତ୍ତ ଫେରାର ହୋଇ ଯାଇଥିବା ଜଣା ପଡ଼ିଛି । ସୂଚନା ଅନୁସାରେ ସମ୍ବଲପୁର ଅଞ୍ଚଳର ଅଂଶୁ ଅଗ୍ରୱାଲ ନାମକ ଜଣେ ମହିଳା ଅନୁଗୋଳ ବଜାରକୁ ବିଭିନ୍ନ ତେଜରାତି ସାମଗ୍ରୀ ସପ୍ଲାଇ କରିଥାନ୍ତି । ଆଉ ପ୍ରାୟ ପ୍ରତ୍ୟେକ ସପ୍ତାହରେ ସେ ଅନୁଗୋଳ ଆସି ଦୋକାନୀ ମାନଙ୍କ ଜିନିଷ ବାବଦକୁ ଠାରୁ ଟଙ୍କା ସଂଗ୍ରହ କରି ନିଅନ୍ତି । ଆଜି ମଧ୍ୟ ସେ ଅନୁଗୋଳ ଆସି ଟଙ୍କା ସଂଗ୍ରହ କରି ନିଜ ଭ୍ୟାନିଟି ବ୍ୟାଗରେ ରଖି ବସଷ୍ଟାଣ୍ଡ ଅଞ୍ଚଳକୁ ଆସିଥିଲେ । ଏଠାରେ ସେ ଏକ ହୋଟେଲ ସମ୍ମୁଖରେ ଗାଡି ରଖି ଏକ ବରଗଛ ମୂଳରେ ବସିଥିଲେ । ଏତିକି ବେଳେ ଜଣେ ଦୁର୍ବୃତ୍ତ ଆସି ତାଙ୍କ ଉପରକୁ କିଛି ସ୍ପ୍ରେ କରିଥିଲା । ଏହାପରେ ଅଂଶୁ ସାମାନ୍ୟ ଅନ୍ୟମନସ୍କ ହେଉ ହେଉ ଦୁର୍ବୃତ୍ତ ଜଣଙ୍କ ତାଙ୍କ ଭ୍ୟାନିଟି ବ୍ୟାଗ ଛଡାଇ ନେଇ ଅନୁଗୋଳ ବାଳିକା ବିଦ୍ୟାଳୟ ଆଡକୁ ଦୌଡ଼ି ପଳାଇଥିଲା । ମହିଳା ଜଣଙ୍କ ପାଟି କରି ତାକୁ ଗୋଡ଼ାଇବା ବେଳେ ଏକ ଫାଷ୍ଟଫୁଡ଼ ଦୋକାନ ଆଗରେ ପୂର୍ବରୁ ଅପେକ୍ଷା କରିଥିବା ଅନ୍ୟ ଜଣେ ଯୁବକ ସହ ଦୁର୍ବୃତ୍ତ ମୋଟରସାଇକେଲରେ ବସି ଫେରାର ହୋଇ ଯାଇଥିଲା । ଏହା ପରେ ମହିଳା ଜଣଙ୍କ ପୁଲିସକୁ ସୂଚନା ଦେଇଥିଲେ । ଅନୁଗୋଳ ପୁଲିସ ଘଟଣା ସ୍ଥଳରେ ପହଞ୍ଚି ଛାନଭିନ କରିଛି । ତେବେ ଏ ନେଇ କୌଣସି ଲିଖିତ ଅଭିଯୋଗ ହୋଇ ନଥିବା ପୁଲିସ କହିଛି ।