ହାଇଜାକ ହୋଇଥିବା ମଦ ଗାଡି ଜବତ

ଅନୁଗୋଳ – ଅନୁଗୋଳ ଜିଲ୍ଲା ଜରପଡ଼ା ଥାନା ଅନ୍ତର୍ଗତ ଦୁର୍ଗାପୁରରେ ସରକାରୀ ମଦ ଡିପୋ ରହିଛି । ତେବେ ଉକ୍ତ ଡ଼ିପୋରୁ ମଦ ଧରି ଏକ ପିକ୍ ଅପ୍ ଗାଡ଼ି ଢେଙ୍କାନାଳ ଜିଲ୍ଲା ଭାପୁରକୁ ଗତ ଗୁରୁବାର ଯାଉଥିଲା । ଏହି ସମୟରେ ଗାଡ଼ିକୁ ରାସ୍ତାରେ ଅଟକାଇ ଉକ୍ତ ଗାଡ଼ି ଓ ମଦକୁ କିଛି ଯୁବକ ହାଇଜାକ୍ କରିଥିଲେ । କେବଳ ହାଇଜାକ୍ କରିନଥିଲେ , ଗାଡ଼ିରେ ଥିବା ଡ୍ରାଇଭର ଓ ହେଲପରକୁ ମାଡ଼ ମାରିବା ସହ ମାରଣାସ୍ତ୍ର ଦେଖାଇ ଭୟଭୀତ କରିଥିଲେ । ଏହି ଘଟଣା ବଡ଼କେରା ଅଞ୍ଚଳରେ ଘଟିଥିବାବେଳେ ଗାଡ଼ିକୁ ନିଶା ଥାନା ଅଞ୍ଚଳରେ ଥିବା ଜଙ୍ଗଲକୁ ଦୁବୃତ୍ତ ମାନେ ନେଇଯାଇଥିଲେ । ତେବେ ଏହି ଜଙ୍ଗଲରେ ବନ୍ତଳା ପୋଲିସ ଚଢ଼ାଉ କରି ୫ରୁ ଉର୍ଦ୍ଧ୍ବ ଲୋକଙ୍କୁ ଥାନାକୁ ଆଣି ଅଟକ ରଖିଛି । ଏହି ଘଟଣାରେ ଥାନାରେ ଅଭିଯୋଗ ହେବା ପରେ ପୁଲିସ ମାମଲା ରୁଜୁ କରି ୨୦୦ରୁ ଉର୍ଦ୍ଧ ପେଟି ମଦ ଜବତ କରିଛି । ନିଶା ଥାନା ଅନ୍ତର୍ଗତ ଏକ ଭଡ଼ା ଘରୁ ଏହି ମଦ ପୁଲିସ ଜବତ କରିଛି । ସେହିଭଳି ମାଇନ୍ସ ଅଞ୍ଚଳରେ ଲୁଚାଇଥିବା ପିକ୍ ଅପ୍ ଗାଡ଼ି ମଧ୍ୟ ଜବତ କରିଥିବା ସୂଚନା ପ୍ରଦାନ କରାଯାଇଛି । ଘଟଣାର ଅଧିକ ତଦନ୍ତ ଚାଲୁ ଥିବାରୁ ପୁଲିସ ଅଧିକ ସୁଚନା ଦେବାକୁ ମନା କରିଥିବାବେଳେ ଅହୁରୀ ମଦ ଓ କେଉଁମାନେ ସମ୍ପୃକ୍ତ ରହିଛନ୍ତି ତାହାର ଖୋଳତାଢ଼ କରାଯାଉଛି ବୋଲି ସୂଚନା ମିଳିଛି ।

Advertisement