ଅନୁଗୁଳ – ଓଡିଶା ପ୍ରଶାସନିକ ସେବା ପରୀକ୍ଷା ଫଳ ଆଜି ପ୍ରକାଶ ପାଇଛି । ଏଥିରେ ଅନୁଗୁଳର ସତ୍ୟବ୍ରତ ମହାପାତ୍ର ୨୭୯ ରାଙ୍କରେ ଉତ୍ତୀର୍ଣ୍ଣ ହୋଇଛନ୍ତି । ଯେଉଁଥିପାଇଁ ସତ୍ୟବ୍ରତଙ୍କ ପରିବାରରେ ଖୁସିର ଲହରୀ ଖେଳି ଯାଇଛି । ସତ୍ୟବ୍ରତଙ୍କ ବାପା ଶ୍ରୀକାନ୍ତ ମହାପାତ୍ର ଓ ମା ସୁମିତ୍ରା ମହାପାତ୍ର । ବାପା ଶ୍ରୀକାନ୍ତ ଢେଙ୍କାନାଳର ବାସିନ୍ଦା ହୋଇଥିବା ବେଳେ ୧୯୭୦ ମସିହାରେ ଅନୁଗୁଳ ଆସିଥିଲେ । ଆଉ ସେବେଠାରୁ ଆଜି ଯାଏ ସେ ଅନୁଗୁଳ ବସଷ୍ଟାଣ୍ଡର ସୁପରଭାଇଜର ବା ହକର ଭାବେ କାମ କରି ଆସୁଛନ୍ତି । ତେବେ ସେ ହକର କାମ କରୁଥିବା ବେଳେ ତାଙ୍କ ପୁଅମାନେ କିଭଳି ଭଲ ପାଠ ପଢିବେ ଆଉ ବଡ ମଣିଷ ହେବେ ସେଥିପ୍ରତି ବେଶ ଗୁରୁତ୍ୱ ଦେଇ ଆସୁଥିଲେ । ଆଉ ଆଜି ତାଙ୍କ ସାନପୁଅ ସତ୍ୟବ୍ରତ ଏହି ସଫଳତା ପାଇବା ପରେ ସେ ବେଶ ଆନନ୍ଦିତ ବୋଲି କହିଛନ୍ତି । ସେପଟେ ସତ୍ୟବ୍ରତ ଛୋଟ ବେଳୁ ଗରମ ତେଲ କଡେଇରେ ହାତ ଭର୍ତ୍ତି କରି ଦେବାରୁ ଡାହାଣ ହାତ ପାପୁଲି ହରାଇଥିଲେ । ଏଥିପାଇଁ ତାଙ୍କୁ ବାମ ହାତରେ ତାଙ୍କ ସବୁ କାମ କରିବାକୁ ପଡେ । ଆଉ ଧିରେ ଧିରେ ବଡ଼ ହେବା ପରେ ଏଥିପାଇଁ ସାହିପଡ଼ିଶାଙ୍କ ପାଖରୁ ଟାହିଟାପରା ମଧ୍ୟ ଶୁଣିବାକୁ ପଡିଥିଲା ସତ୍ୟବ୍ରତଙ୍କୁ । ତଥାପି ନିଜ ମନୋବଳ ଆଉ ପ୍ରଚେଷ୍ଟା ଯୋଗୁଁ ଆଜି ତାଙ୍କୁ ଏହି ସଫଳତା ମିଳି ପାରିଛି । ଯେଉଁଥିପାଇଁ ଖୁସିରେ ମା ଆଖିରୁ ଲୁହ ମଧ୍ୟ ଶୁଖୁନି । ଏହି ସଫଳତା ପାଇବାକୁ ସତ୍ୟବ୍ରତ ପ୍ରତ୍ୟେକ ଦିନ ୬ ରୁ ୮ ଘଣ୍ଟା ପରିଶ୍ରମ କରୁଥିଲେ । ପ୍ରଥମ ଥର ଅକୃତକାର୍ଯ୍ୟ ହୋଇଥିବା ବେଳେ ଦ୍ୱିତୀୟ ଥରରେ ଏହି ସଫଳତା ପାଇବା ପରେ ଏହି ସଫଳତାର ଅଧିକ ଶ୍ରେୟ ବାପା-ମା ଓ ବଡ ଭାଇଙ୍କୁ ଦେଇଥିବା ବେଳେ ଶିକ୍ଷକ ଓ ସଙ୍ଗ ମାନଙ୍କର ଶ୍ରେୟ ମଧ୍ୟ ରହିଛି ବୋଲି କହିଛନ୍ତି ।