ଅନୁଗୁଳ – ଅନୁଗୁଳ ଜିଲ୍ଲା ବନ୍ତଳା ଥାନା ଖାଲଗାଁରେ ବିଳମ୍ବିତ ରାତିରେ ଏକ ଭୟାବହ ଅଗ୍ନିକାଣ୍ଡ ଘଟି ଯାଇଛି । ଏଥିରେ ଦୁଇଟି ପରିବାରର ୬ ଟି ରହିବା ଘର ସମେତ ୮ ଗୁହାଳ ଘର ସମ୍ପୂର୍ଣ୍ଣ ପୋଡି ନଷ୍ଟ ହୋଇ ଯାଇଛି । ଏହା ସହ ଅଗ୍ନିକାଣ୍ଡରେ ଗୋଟିଏ ଗୋରୁ ଓ ୨୨ ଟି ମେଣ୍ଢା ଜୀବନ୍ତ ଦଗ୍ଧ ହୋଇ ଯାଇଛି । ସୂଚନା ଅନୁସାରେ ବିଳମ୍ବିତ ରାତିରେ ପଞ୍ଚୁ ବିଶ୍ବାଳଙ୍କ ଘରେ ପ୍ରଥମେ ନିଆଁ ଲାଗିଥିଲା । ସଙ୍ଗେ ସଙ୍ଗେ ନିଆଁ ମାଡି ଯାଇ ଗୁହାଳ ଘର ସମେତ ଶିଶିର ବିଶ୍ବାଳଙ୍କ ଘରକୁ ମଧ୍ୟ ମାଡି ଯାଇଥିଲା । ଗାଁ ଲୋକ ନିଆଁକୁ ଆୟତ୍ତ କରିବାକୁ ଚେଷ୍ଟା କରି ବିଫଳ ହୋଇଥିଲେ । ପରେ ଅନୁଗୁଳରୁ ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ତେବେ ସେତେବେଳକୁ ଉଭୟ ପରିବାରର ପିନ୍ଧା ଲୁଗାକୁ ଛାଡି ଦେଲେ ଅନ୍ୟ ସବୁ କିଛି ନିଆଁରେ ପୋଡ଼ି ସାରିଥିଲା ।