ଅନୁଗୁଳ – ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟ ପରିସରରେ ଜଣେ ଯୁବକ ଆତ୍ମହତ୍ୟା କରିଥିବା ଜଣା ପଡ଼ିଛି । ମୃତ ଯୁବକ ଜଣଙ୍କ ଦେବଗଡ଼ ଜିଲ୍ଲାର ସଞ୍ଜୟ ମହନ୍ତ ବୋଲି ଜଣା ପଡ଼ିଛି । ସୂଚନା ଅନୁସାରେ ସଞ୍ଜୟ ତାଙ୍କ ସ୍ତ୍ରୀଙ୍କ ସହ ଆସି ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟ ପାଇଁ ତିଆରି ଚାଲିଥିବା ନୁଆଁ ବିଲ୍ଡିଂରେ ଶ୍ରମିକ ଭାବେ ଉଭୟ କାମ କରୁଥିଲେ । ସେଠାରେ ତିଆରି ଏକ ତମ୍ବୁ ଭିତରେ ଉଭୟ ରହି କାମ କରନ୍ତି । ତେବେ ଆଜି ତାଙ୍କ ସ୍ତ୍ରୀ କାମ କରିବାକୁ ଯାଇଥିବା ବେଳେ ସଞ୍ଜୟ ଏକୁଟିଆ ତମ୍ବୁ ଭିତରେ ଥିଲେ । ତେବେ ପରେ ତାଙ୍କ ସ୍ତ୍ରୀ ଆସି ଦେଖିବା ବେଳକୁ ସଞ୍ଜୟଙ୍କ ମୃତଦେହ ସେଠାରେ ଥିବା ଏକ ବାଉଁଶରେ ଝୁଲୁଥିବା ଦେଖିବାକୁ ପାଇଥିଲେ । ଖବର ପାଇ ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ତେବେ ପ୍ରାଥମିକ ତଦନ୍ତରୁ ଏହା ଏକ ଆତ୍ମହତ୍ୟା ବୋଲି ଜଣା ପଡିଥିବା ବେଳେ ପାରିବାରିକ କଳହ ଯୋଗୁଁ ସେ ଆତ୍ମହତ୍ୟା କରିଥିବା ଜଣା ପଡ଼ିଛି ।