ଅନୁଗୁଳ – ଅନୁଗୁଳ ଜିଲ୍ଲା କଣିହାଁ ଥାନା କୁମୁଣ୍ଡା ଗାଁରେ ମାଲିକାଣୀକୁ ହତ୍ୟା କରି ଟଙ୍କା ସୁନା ଲୁଟ କଲା ଡ୍ରାଇଭର । ରାତିରେ ଘରେ ଅନ୍ୟ କେହି ନଥିବାର ସୁଯୋଗ ନେଇ ଏଭଳି କାଣ୍ଡ ଭିଆଇଥିବା ଅଭିଯୋଗ ହୋଇଛି । ସୂଚନା ଅନୁସାରେ କୁମୁଣ୍ଡା ଗାଁର ଶିବରାମ ସାହୁଙ୍କ ଘରେ ପାଲଲହଡ଼ା ଅଞ୍ଚଳର ବିକାଶ ମୁଣ୍ଡା ନାମକ ଜଣେ ଯୁବକ ଗତ ୬ ମାସ ହେଲା ଟ୍ରାକ୍ଟର ଡ୍ରାଇଭର ରହିଥିଲା । ଗତକାଲି(ସୋମବାର) ରାତିରେ ଶିବାରାମ ଏମସିଏଲ କୁ କାମ କରିବାକୁ ଯାଇଥିବା ବେଳେ ତାଙ୍କ ସ୍ତ୍ରୀ ବାପ ଘରକୁ ଯାଇଥିଲେ । ଘରେ କେବଳ ତାଙ୍କ ୮୦ ବର୍ଷୀୟା ବୃଦ୍ଧା ମା ନବାତି ସାହୁ ଏକୁଟିଆ ଥିଲେ । ରାତିରେ ଟ୍ରାକ୍ଟର ଧରି ବିକାଶ ଘରକୁ ଆସି ଖାଇବା ବେଳେ ବୃଦ୍ଧା ଏକୁଟିଆ ଥିବା ଜାଣିବାକୁ ପାଇଥିଲା । ଏହା ଦେଖି ବିକାଶ ମୁଣ୍ଡରେ କୁବୁଦ୍ଧି ଜୁଟିଥିଲା । ଆଉ ଅନ୍ୟ କେହି ନଥିବାର ସୁଯୋଗ ନେଇ ସେ ନବାତିଙ୍କ ତଣ୍ଟି ଚିପି ହତ୍ୟା କରିବା ପରେ ଘରର ଆଲମୀରା ଭାଙ୍ଗି ସେଥିରେ ଥିବା ସମସ୍ତ ଟଙ୍କା ସୁନା ଲୁଟ କରି ଫେରାର ହୋଇ ଯାଇଥିଲା । ଶିବାରାମଙ୍କ କହିବା ଅନୁସାରେ ଡ୍ରାଇଭର ବିକାଶ ଆଲମୀରାରୁ ପ୍ରାୟ ୬ ଭରି ସୁନା , ୭୦ ହଜାର ଟଙ୍କା ନେଇ ଯାଇଥିବା ବେଳେ ଘରୁ ଏକ ସ୍କୁଟି ମଧ୍ୟ ନେଇ ଯାଇଛି । ରାତିରେ ଏହି ଘଟଣା ଘଟିଥିବା ବେଳେ ସକାଳେ ଶିବାରାମ ଡ୍ୟୁଟି ସାରି ଘରକୁ ଫେରିବା ପରେ ଏଭଳି ହୋଇଥିବା ଜାଣିବାକୁ ପାଇଥିଲେ । ତୁରନ୍ତ ସେ ପୁଲିସକୁ ସୂଚନା ଦେବା ପରେ କଣିହାଁ ପୁଲିସ ସନ୍ଧାନୀ କୁକୁର ଓ ସାଇଣ୍ଟିଫିକ ଟିମ ସହାୟତାରେ ତଦନ୍ତ ଆରମ୍ଭ କରିଛି ।