ଅନୁଗୁଳ – ବିଦ୍ଯାଳୟ କ୍ଲାସରୁମ ଭିତରେ ପ୍ରଧାନଶିକ୍ଷକଙ୍କ ଆତ୍ମହତ୍ଯା । ଏଭଳି ଅଭାବନୀୟ ଘଟଣା ଘଟିଛି ଅନଗୁଳ ଜିଲ୍ଲା କିଶୋରନଗର ବ୍ଲକର ତୁରୁଡ଼ା ଉଚ୍ଚ ପ୍ରାଥମିକ ସ୍କୁଲରେ ।ମୃତ ପ୍ରଧାନ ଶିକ୍ଷକ ଜଣଙ୍କ ହେଲେ ହୃଷୀକେଶ ସାହୁ (ବାବୁଲି ସାର୍) ।ହୃଷୀକେଶଙ୍କ ଘର ନିକଟସ୍ଥ ନତଡ଼ା ଗ୍ରାମରେ । ସେ ଗତ ତିନିବର୍ଷ ହେବ ଉକ୍ତ ବିଦ୍ୟାଳୟରେ ଶିକ୍ଷକତା କରି ଆସୁଥିଲେ । ସବୁଦିନ ପରି ହୃଷୀକେଶ ଆଜି ବି ସକାଳ ନଅ ଘଟିକା ସମୟରେ ବିଦ୍ୟାଳୟରେ ପହଞ୍ଚିଥିଲେ । ସେତେବେଳେ ବିଦ୍ୟାଳୟକୁ କୌଣସି ଛାତ୍ରଛାତ୍ରୀ କିମ୍ବା କୌଣସି ଶିକ୍ଷକ ଶିକ୍ଷୟତ୍ରୀ ଆସିନଥିଲେ । ତେବେ ପ୍ରାୟ ସାଢେ ନଅଟା ବେଳେ ବିଦ୍ୟାଳୟକୁ କିଛି ଛାତ୍ରଛାତ୍ରୀ ଆସି ବାବୁଲି ସାରଙ୍କୁ ଅଫିସ ରୁମ୍ ରେ ଝୁଲନ୍ତା ଅବସ୍ଥାରେ ଦେଖି ତୁରନ୍ତ ଗ୍ରାମକୁ ଖବର ଦେଇଥିଲେ । ଗ୍ରାମବାସୀ ହୃଷୀକେଶଙ୍କୁ ତୁରନ୍ତ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ କିଶୋରନଗର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ଆତ୍ମହତ୍ୟାର କାରଣ ଏଯାଏଁ ଜଣା ପଡିନାହିଁ । ହୃଷିକେଶ ଜଣେ ଆଦର୍ଶ ଶିକ୍ଷକ ଭାବରେ ସାରା କିଶୋରନଗର ବ୍ଲକରେ ବହୁତ ସୁନାମ ଥିଲା । ତାଙ୍କ ଅକାଳ ବିୟୋଗରେ ସାରା ଅଞ୍ଚଳରେ ଶୋକର ଛାୟା ଖେଳିଯାଇଛି।