ଅନୁଗୁଳ – ଠାକୁରଙ୍କ ପାଖରେ ଅଧିଆ ପଡିଥିବା ବେଳେ ଜଣେ ନାବାଳକଙ୍କ ମୃତ୍ୟୁ ହୋଇଛି । ଏଭଳି ଘଟଣା ଘଟିଛି ବନ୍ତଳା ଥାନା ପୋକତୁଙ୍ଗା କୃଷ୍ଣଗୁରୁ ମନ୍ଦିରରେ ।  ମୃତ ନାବାଳକ ତାଳଚେର ଡଅଁରା ଗାଁର ବଗା ସାହୁଙ୍କ ଅଷ୍ଟମ ଶ୍ରେଣୀର ଛାତ୍ର ଶିବୁ ସାହୁ ବୋଲି ଜଣା ପଡିଛି । ସୂଚନା ଅନୁସାରେ ଶିବୁ କ୍ରିକେଟ ଖେଳୁଥିବା ବେଳେ ତାଙ୍କ ପେଟରେ ବଲ ବାଜିଥିଲା । ପେଟରେ ଯନ୍ତ୍ରଣା ହେବା ସହ ସେହି ସ୍ଥାନ ଫୁଲି ରହିଥିଲା । ଶିବୁଙ୍କ ପରିବାର କଟକ ନେଇ ତାଙ୍କ ଚିକିତ୍ସା କରିଥିଲେ । ତେବେ କୌଣସି ସୁଫଳ ମିଳି ନଥିଲା । ଏଣୁ ସେ ଅନ୍ଧବିଶ୍ୱାସର ବଶବର୍ତ୍ତୀ ହୋଇ ମନ୍ଦିରରେ ଅଧିଆ ପଡ଼ିଥିଲେ । ଆଜି ଅପରାହ୍ନରେ ସେ ଅଧିଆ ପଡିଥିବା ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । ତେବେ ଭୟରେ ପରିବାର ଲୋକ ତରବରିଆ ଭାବରେ ତାଙ୍କର ଶବ ସତ୍କାର କରି ଦେଇଥିବା ଜଣା ପଡ଼ିଛି ।