ପାଲଲହଡା – ଅନୁଗୁଳ ଜିଲ୍ଲା ପାଲଲହଡା ବଜାର ଉପରେ ଥିବା ଏକ ଗହଣା ଦୋକାନର କାନ୍ଥ ଖୋଲି ଲକ୍ଷାଧିକ ଟଙ୍କା ମୂଲ୍ୟର ଅଳଙ୍କାର ଲୁଟି ନେଇଛନ୍ତି ଦୁର୍ବୃତ୍ତ । ସକାଳେ ଦୋକାନ ଖୋଲିବାକୁ ଆସି ଚୋରି ହୋଇଥିବା ଜାଣିବା ପରେ ଦୋକାନ ମାଲିକ ପାଲଲହଡା ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇ ପୁଲିସ ଏକ ମାମଲା ରୁଜ୍ଜୁ କରି ତଦନ୍ତ କରୁଛି । ସୂଚନା ଅନୁସାରେ ଜ୍ଞାନେନ୍ଦ୍ର ସାହୁ ନାମକ ଜଣେ ବ୍ୟକ୍ତିଙ୍କର ପାଲଲହଡା ଏନ ଏଚ ଆଇବି ନିକଟରେ ଓଁ ଜୁଏଲରି ନାମରେ ଏକ ଗହଣା ଦୋକାନ ରହିଛି । ସୋମବାର ସନ୍ଧ୍ୟାରେ ଦୋକାନ ଭଲ ଭାବରେ ବନ୍ଦ କରି ସେ ଘରକୁ ଯାଇଥିଲେ । ତେବେ ମଙ୍ଗଳବାର ସକାଳେ ଦୋକାନର କର୍ମଚାରୀ ବିପିନ ରାଜହଂସ ଦୋକାନ ଖୋଲି ଦେଖିବା ବେଳେ ଦୋକାନର ପଛ ପାଖ କାନ୍ଥ ଖୋଳା ଯାଇ ଦୋକାନ ଭିତରୁ ଚୋରି ହୋଇଥିବା ଜାଣିଥିଲେ । ସେ ସଙ୍ଗେ ସଙ୍ଗେ ମାଲିକ ଜ୍ଞାନେନ୍ଦ୍ରଙ୍କୁ ଜଣାଇଥିଲେ । ଜ୍ଞାନେନ୍ଦ୍ର ଆସି ଦେଖନ୍ତି ତ ଦୋକାନରେ ଥିବା ପ୍ରାୟ ୨ ଲକ୍ଷ ୮୦ ହଜାର ଟଙ୍କା ମୂଲ୍ୟର ଚାରି କେଜି ଦୁଇ ଶହ ଗ୍ରାମ ରୁପା ଅଳଙ୍କାର , ୮୦ ହଜାର ଟଙ୍କା ମୂଲ୍ୟର ୧୨ ଗ୍ରାମ ସୁନା ଅଳଙ୍କାର , ଏକ ଲାପଟପ , ସିସି ଟିଭି କ୍ୟାମେରା ହାର୍ଡଡିସ୍କ ଓ ନଗଦ ୧୫ ହଜାର ଟଙ୍କା ଚୋରି ହୋଇ ଯାଇଛି । ଏଣୁ ଏ ନେଇ ସେ ପାଲଲହଡା ଥାନାରେ ଅଭିଯୋଗ କରିବା ପରେ ପୁଲିସ ଘଟଣାର ତଦନ୍ତ କରୁଛି ।