ଅନୁଗୁଳ – ଆଜିଠାରୁ ଆରମ୍ଭ ହୋଇ ଯାଇଛି ମା ବାସନ୍ତୀ ଦୂର୍ଗାଙ୍କ ପୂଜା । ଏଥିପାଇଁ ଅମଲାପଡା ବାସନ୍ତୀ ଦୁର୍ଗାପୂଜା ପଡିଆରେ କମିଟି ପକ୍ଷରୁ ୧୯ ତମ ପୂଜା ଉତ୍ସବ ପାଇଁ ସମସ୍ତ ପ୍ରସ୍ତୁତି ସମ୍ପନ୍ନ ହୋଇଛି । ଆଜି ଅମଲାପଡା ବାସନ୍ତୀ ଦୁର୍ଗାପୂଜା ମଣ୍ଡପରେ ମା’ ଙ୍କ ବିଲ୍ବ ବରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହାପରେ ସାଂସ୍କୃତିକ ମଣ୍ଡପରେ ଏକ ଘଣ୍ଟାଧରି ନାମ ସଂକୀର୍ତନ ଆୟୋଜିତ ହୋଇଥିଲା । ପରେ ବ୍ରହ୍ମକୁମାରୀ ଈଶ୍ୱରୀୟ ବିଶ୍ବବିଦ୍ୟାଳୟ ଅନୁଗୁଳ ଶାଖା ପକ୍ଷରୁ ବିଭିନ୍ନ କାର୍ଯ୍ୟକ୍ରମ ପ୍ରଦର୍ଶିତ ହୋଇଥିଲା । ସମାରୋହକୁ ପୂର୍ବତନ ତାମଡା ଅଧ୍ଯକ୍ଷ ଶକ୍ତି ପ୍ରସାଦ ପଟନାୟକ ଉଦଘାଟନ କରିଥିଲେ । ଅନୁଗୁଳ ମହାବିଦ୍ୟାଳୟର ପ୍ରାକ୍ତନ ଅଧ୍ୟକ୍ଷ ତଥା ଭାରତ ବିକାଶ ପରିଷଦର ସଭାପତି ଶାନୁନୁ ସର, ବିଜୟ ମୋଦି, ବରିଷ୍ଠ ଆଇନଜୀବୀ ପ୍ରଦୀପ ଦେବତା, ଯୋଗଗୁରୁ ଅଭୟ ରାୟ, ଭଉଣୀ ଅନିତା ସିଂ ଦେଓ, ଭଉଣୀ ମିନତୀ ଏବଂ ବ୍ରହ୍ମାକୁମାରୀ ସଂସ୍ଥାର ବହୁ ଉଦ୍ୟୋକ୍ତା ଓ ପ୍ରବଚକ ସମ୍ମାନିତ ଅତିଥ୍ ରୂପେ ଯୋଗଦାନ କରିଥିଲେ । ଶେଷରେ ଛାତ୍ର ଛାତ୍ରୀଙ୍କ ଦ୍ବାରା ଆକର୍ଷଣୀୟ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।
ମା ବାସନ୍ତୀଙ୍କ ଏହି ପୂଜାତ୍ସୋବ ପାଇଁ ୪ ତାରିଖ ସକାଳେ କଳସୀ ଶୋଭାଯାତ୍ରା, ଅଧିବାସ, ନବପତ୍ରିକା ସ୍ଥାପନ, ଜୀବନ୍ୟାସ, ଏପ୍ରିଲ ୫ ତାରିଖ ମହାଷ୍ଟମୀ ଉପଲକ୍ଷେ ସକାଳେ ସୂର୍ଯ୍ୟପୂଜା, ଗୋପୂଜା, ଚଣ୍ଡୀପାଠ, ହୋମ, ଆଳତି, ସନ୍ଧ୍ୟାରେ ସନ୍ଧି ପୂଜା ଏପ୍ରିଲ ୬ ତାରିଖରେ ମହାନବମୀ ପୂଜା, ନବକୁମାରୀ ପୂଜା, ଚଣ୍ଡୀଯଜ୍ଞ, ଆଳତୀ, ଏପ୍ରିଲ ୭ ତାରିଖ ଦଶମୀ ଉପଲକ୍ଷେ ସକାଳେ ସୂର୍ଯ୍ୟପୂଜା, ଦଶମୀ ପୂଜା, ପୂର୍ଣ୍ଣାହୁତି ଆଦି ଅନୁଷ୍ଠିତ ହେବ । ସାଂସ୍କୃତିକ କାର୍ଯ୍ୟକ୍ରମ ମଧ୍ୟରେ ସପ୍ତମୀ ଦିନ ସନ୍ଧ୍ୟାରେ ରିଦିମ୍ସ କଳାକାରଙ୍କ ଦ୍ୱାରା ସାଂସ୍କୃତିକ ବିଚିତ୍ରା, ମା ବାସନ୍ତୀ ସାଂସ୍କୃତିକ ଅନୁଷ୍ଠାନ ଦ୍ୱାରା ନୃତ୍ୟ ସଂଗୀତ କାର୍ଯ୍ୟକ୍ରମ,ଅଷ୍ଟମୀ ଦିନ ଅପରାହ୍ନରେ ଟାଇକୁଣ୍ଡୁ ଆସୋସିଏସନ ଦ୍ୱାରା କରାଟେ ସମର କଳା, ନଦିଆ ସଂକୀର୍ତନ, ନୃତ୍ୟ ସଂଗୀତ ବିଚିତ୍ରା, ନବମୀ ଦିନ ସକାଳ ୯ ଘଟିକା ସମୟରେ ବାସନ୍ତୀ ଭଲି ବଲ ଟ୍ରଷ୍ଟ ଓ ଅନୁଗୁଳ ଡିଫେନ୍ସ ଭେଟେରାନ ପକ୍ଷରୁ ରକ୍ତଦାନ ଶିବିର, ମାଧ୍ୟାନ୍ନରେ ନବ କୁମାରୀ ପୂଜା, ସନ୍ଧ୍ୟା ରେ ଦାଣ୍ଡିଆ ନୃତ୍ୟ, ଦଶମୀ ଦିନ ସନ୍ଧ୍ୟାରେ ମେଲୋଡି ଏବଂ ଆସନ୍ତା ୮ ତାରିଖ ମଙ୍ଗଳବାର ଦିନ ଅପରାହ୍ନ ରେ ଭଷାଣି ସମାରୋହ ଅନୁଷ୍ଠିତ ହେବ।
