ଅନୁଗୁଳ – ଟ୍ରେନ ଶୌଚାଳୟରୁ ରକ୍ତ ଜୁଡୁବୁଡୁ ଅବସ୍ଥାରେ ଯୁବକକୁ ଉଦ୍ଧାର କରାଯାଇଛି । ଆତ୍ମହତ୍ଯା ଉଦ୍ଯମ କରିଥିବା ବେଳେ ଗୁରତର ଅବସ୍ଥାରେ ତାକୁ ଜିଲ୍ଲା ମୁଖ୍ଯ ଚିକିତ୍ସାଳୟରେ ଭର୍ତ୍ତି କରାଯାଇଛି । ଯୁବକ ଜଣଙ୍କ ସୁନ୍ଦରଗଡ଼ ଜିଲ୍ଲା କେନ୍ଦ୍ରୀନାଳ ଗ୍ରାମର ପାନା ଖେସ ବୋଲି ଜଣା ପଡ଼ିଛି । ସେ ହାଇଦ୍ରାବାଦରେ କାମ କରୁଥିଲା ବେଳେ ସେ ତାଙ୍କ ଘରକୁ ଫେରୁଥିଲେ । ଭୁବନେଶ୍ୱରରୁ ରାଉଲକେଲା ଇଣ୍ଟରସିଟି ଟ୍ରେନର ଶୌଚାଳୟରେ ପଶି ଯାଇ କୌଣସି କାରଣରୁ ଏକ ଧାରୁଆ ଅସ୍ତ୍ରରେ ନିଜ ବେକକୁ କାଟି ଦେଇଥିବା ଜଣା ପଡ଼ିଛି । ଟ୍ରେନରେ ବସିଥିବା ଯାତ୍ରୀମାନେ ଏହା ଜାଣିବା ପରେ ବଇଣ୍ଡା ରେଳ ଷ୍ଟେସନରେ ପହଂଚିବା ପରେ ଯାତ୍ରୀ ମାନେ ରେଳବାଇ ପୋଲିସ ସହାୟତାରେ ଉଦ୍ଧାର କରି ସ୍ଥାନୀୟ ବଇଣ୍ଡା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଭର୍ତି କରିଥିଲେ । ପରେ ଅବସ୍ଥା ଶୋଚନୀୟ ହେବାରୁ ତାଙ୍କୁ ଅନୁଗୁଳ ମୁଖ୍ୟ ଚିକିତ୍ସାଳୟକୁ ପଠାଇ ଦିଆଯାଇଛି । ତେବେ ସେ କାହିଁକି ଏଭଳି କରିଛନ୍ତି ତାହା ଜଣା ପଡି ନାହିଁ ।