ଅନୁଗୁଳ – ଅନୁଗୁଳ ଉଚ୍ଚ ବିଦ୍ୟାଳୟରେ କାର୍ଯ୍ୟରତ ରାତ୍ର ଜଗୁଆଳ ସରୋଜ ମୁଖୀଙ୍କ ଘରାଉ ଚୋରି ହୋଇଥିବା ଅନୁଗୁଳ ଥାନାରେ ଅଭିଯୋଗ ହୋଇଛି । ଅନୁଗୁଳ ହୁଲୁରୁସିଂହା ଗାଁର ସରୋଜ ଅନୁଗୁଳ ଉଚ୍ଚ ବିଦ୍ୟାଳୟ ପଛପଟରେ ଥିବା ସରକାରୀ କ୍ଵାଟରରେ ରୁହନ୍ତି । ସେ ଥାନାରେ କରିଥିବା ଅଭିଯୋଗ ଅନୁସାରେ ସେ ଗତ କାଲି ଅନୁଗୁଳ ଉଚ୍ଚ ବିଦ୍ୟାଳୟର ରାତ୍ର ଜଗୁଆଳ ଭାବେ କାମ କରୁଥିଲେ । ତେବେ ଭୋର ଚାରିଟା ବେଳେ ସେ ସ୍କୁଲ ଚାରିପାଖ ବୁଲାବୁଲି କରିବା ବେଳେ ତାଙ୍କ କ୍ଵାଟରରୁ କେହି ଜିନିଷପତ୍ର ନେଇ ଦଉଡି ପଳାଇବାକୁ ଚେଷ୍ଟା କରୁଥିଲା । ସରୋଜ ତାକୁ ଧରିବାକୁ ଚେଷ୍ଟା କରିବା ବେଳେ ଚୋରା ଏକ ଡ୍ରେନରେ ପଡି ଖଣ୍ଡିଆ ଖାବରା ହୋଇ ଯାଇଥିଲା । ତାର ମୁଣ୍ଡରେ ଓ ହାତରେ ଆଘାତ ଲାଗିଥିବାରୁ ସେ ଆଉ ଯାଇ ପାରି ନଥିଲା । ସରୋଜ ତାକୁ କାବୁ କରିବା ସହ ପୁଲିସକୁ ସୂଚନା ଦେଲା ପରେ ପୁଲିସ ତାକୁ ଅଟକ ରଖି ପଚରା ଉଚୁରା କରିବା ପରେ କୋର୍ଟ ଚାଲାଣ କରିଛି ।