ଛେଣ୍ଡିପଦା – ଅନୁଗୁଳ ଜିଲ୍ଲା ଛେଣ୍ଡିପଦା ଥାନା ଅନୁଗୁଳ-ଛେଣ୍ଡିପଦା ୬୩ ନମ୍ବର ରାଜ୍ୟ ରାଜପଥର  ଗୋପୀନାଥପୁର ଠାରେ ଥିବା ସରଲିୟା ପେଟ୍ରୋଲ ପମ୍ପ ନିକଟରେ ଗତ ରବିବାର ସନ୍ଧ୍ୟା ୭ଟା ବେଳେ ମୋଟରସାଇକେଲ ଏବଂ ଟ୍ରକ୍ ମଧ୍ୟରେ ଧକ୍କା ହୋଇଥିଲା । ଏଥିରେ ମୋଟରସାଇକେଲ ଚାଳକ ଗରୁତର ହୋଇ କଟକ ସ୍ଥାନାନ୍ତର ହେଉଥିବା ବେଳେ ଆଜି ତାଙ୍କର ମୃତ୍ୟୁ ହୋଇଛି ।  ମୃତକ ଜଣଙ୍କ ହେଲେ କୁକୁରପେଟା ଗ୍ରାମର ମହେଶ୍ୱର ସେଠୀ । ସୂଚନା ଅନୁସାରେ ଗତ ରବିବାର ମହେଶ୍ୱର ଛେଣ୍ଡିପଦାରୁ ତାଙ୍କ ଗ୍ରାମ କୁକୁରପେଟାକୁ ମୋଟରସାଇକେଲରେ ଫେରୁଥିବା ବେଳେ ସରଳିୟା ପେଟ୍ରୋଲ୍ ପମ୍ପ୍ ନିକଟରେ ଅନୁଗୁଳ ଦିଗରୁ ଛେଣ୍ଡିପଦା ଦିଗକୁ ଆସୁଥିବା ଏକ ଟ୍ରକ ତାଙ୍କୁ ଧକ୍କା ଦେଇଥିଲା ।  ଫଳରେ  ମହେଶ୍ୱର  ମୋଟରସାଇକେଲରୁ ଛିଟିକି ତଳେ ପଡି ଗୁରୁତର ହୋଇଥିଲେ । ରାସ୍ତାରେ ଯାଉଥିବା ଲୋକମାନେ ମହେଶ୍ୱରଙ୍କୁ ଉଦ୍ଧାର ଅନୁଗୁଳ ଜିଲ୍ଲା ମୂଖ୍ୟ ଚିକିତ୍ସାଳୟକୁ ଚିକିତ୍ସା ନିମନ୍ତେ ପଠାଇଥିଲେ । ସେଠାରୁ ତାଙ୍କୁ କଟକ ପଠା ଯାଉଥିବାବେଳେ ବାଟରେ ତାଙ୍କର ମୃତ୍ୟୁ ହୋଇଥିଲା । ଛେଣ୍ଡିପଦା ପୁଲିସ ଦୁର୍ଘଟଣା ଗ୍ରସ୍ତ ଟ୍ରକଟିକୁ ଜବତ କରିବା ସହିତ ଚାଳକକୁ ଅଟକ ରଖି ଘଟଣାର ତଦନ୍ତ ଚଳାଇଛି ।