ଅନୁଗୁଳ – ଅନୁଗୁଳ ଜିଲ୍ଲାରୁ ଫାଇଲେରିଆ ରୋଗର ସମ୍ପୂର୍ଣ୍ଣ ନିରାକରଣ ପାଇଁ  ଆସନ୍ତା ଫେବୃଆରୀ ୨୫ ତାରିଖରୁ ମାର୍ଚ୍ଚ ୬ ଯାଏ ସାମୁହିକ ଔଷଧ ସେବନ କାର୍ଯ୍ୟକ୍ରମ ଅନୁଷ୍ଠିତ ହେବ । ଆଜି ଗଣମାଧ୍ୟମ ସଚେତନତା କାର୍ଯ୍ୟକ୍ରମରେ ଜିଲ୍ଲା ମୁଖ୍ୟ ଜନସ୍ୱାସ୍ଥ୍ୟ ଚିକିତ୍ସା ଅଧିକାରୀ ଡ଼ଃ ଅଭୟ କୁମାର ଦାଶ ଏହି ସୂଚନା ଦେଇଛନ୍ତି । ଅନୁଗୁଳ ଏବେ ରାଜ୍ୟର  ଫାଇଲେରିଆ ପ୍ରବଣ ଜିଲ୍ଲା ତାଲିକାରେ ରହିଛି । ଜିଲ୍ଲାରେ ପ୍ରତିବର୍ଷ ନୂତନ ଫାଇଲେରିଆ ରୋଗୀଙ୍କ ସଂଖ୍ୟା ବୃଦ୍ଧି ପାଇବା ଏକ ଚିନ୍ତାର ବିଷୟ ହୋଇଛି । ଏହି ସମ୍ବେଦନଶୀଳ ଘଟଣାକୁ ଦୃଷ୍ଟିରେ ରଖି  ଫାଇଲେରିଆ ନିରାକରଣ ପାଇଁ ସାମୁହିକ ଔଷଧ ସେବନ ଅଭିଯାନ କରାଯିବ । ଏହି କ୍ରମରେ ଫାଇଲେରିଆ ପ୍ରତିରୋଧକ ଡି.ଇ.ସି ଓ ଆଲବେଣ୍ଡାଜଲ ବଟିକା ସେବନର ବ୍ୟବସ୍ଥା କରାଯାଇଛି । ଆଶା କର୍ମୀ , ଅଙ୍ଗନୱାଡି କର୍ମୀ କିମ୍ବା ତାଲିମପ୍ରାପ୍ତ ସ୍ବେଚ୍ଛାସେବୀ ମାନେ ଘରକୁ ଘର ଯାଇ ପରିବାର ସଦସ୍ୟଙ୍କ ବୟସ ଅନୁପାତରେ ଏହି ବଟିକା ଖୁଆଇବେ ।

କେବଳ ଗର୍ଭବତୀ ମହିଳା , ଦୁଇବର୍ଷରୁ କମ ଶିଶୁ ଓ ଗୁରୁତର ଅସୁସ୍ଥ ଲୋକ ଏହି ବଟିକା ଖାଇବେ ନାହିଁ । ଏହି ବଟିକା ସମ୍ପୂର୍ଣ୍ଣ ନିରାପଦ ଅଟେ । ଖାଦ୍ୟ ଖାଇ ସାରିବା ପରେ ସମସ୍ତେ ସେବନ କରିବା ପାଇଁ ବୈଠକରେ ପରାମର୍ଶ ଦିଆଯାଇଥିଲା । ବର୍ଷକୁ ଥରେ ଏହି ଔଷଧ ଖାଇଲେ ବାତ ଜ୍ୱର ତଥା ଫାଇଲେରିଆ କୀଟାଣୁ ମରି ଯାଆନ୍ତି । ଯାହା ଫଳରେ ଗୋଦର  ଗୋଡ଼, କିମ୍ବା ହାଇଡ୍ରୋସିଲ  ହେବାକୁ ଦେଇ ନଥାଏ ବୋଲି ଏଡିପିଏଚଓ ଡ଼ଃ ପୂର୍ଣ୍ଣିମା ଉଦଗାତା  ସୂଚନା ଦେଇଥିଲେ । ଏହି ଅଭିଯାନରେ ଜିଲ୍ଲାର ସମୁଦାୟ ୧୯୩୦ ଟି ଗ୍ରାମରେ ୨୫୫୦ ଜଣ ଔଷଧ ସେବନକାରୀ , ୨୫୫ ଜଣ ସୁପରଭାଇଜର ନିୟୋଜିତ ହୋଇଛନ୍ତି । ଅଣୁ ଯୋଜନା ଅନୁଯାୟୀ ୧୨ ଲକ୍ଷ ୫୭ ହଜାର ୪୪୦  ଜଣଙ୍କୁ ଏହି ଔଷଧ ପ୍ରଦାନ ପାଇଁ ଧାର୍ଯ୍ୟ କରାଯାଇଛି ବୋଲି ପାୱାର ପଏଣ୍ଟ ମାଧ୍ୟମରେ ଭିବିଡ଼ିସି ନିରୂପମା ଦାସ ସୂଚନା ଦେଇ ଥିଲେ । ଜନସାଧାରଣ ଗୁଜବ/ ଭ୍ରାନ୍ତଧାରଣାରୁ ଦୁରେଇ ରହି ଏଥିରେ ପ୍ରତକ୍ଷ୍ୟ ଭାବେ ସାମିଲ ହୋଇ ଏହି ଔଷଧକୁ ସେବନ କରି ଫାଇଲେରିଆ ନିୟନ୍ତ୍ରଣ କାର୍ଯ୍ୟକ୍ରମକୁ ସଫଳ କରିବା ପାଇଁ ବିଭାଗ ତରଫରୁ ଅନୁରୋଧ କରାଯାଇଛି । ସ୍ୱାସ୍ଥ୍ୟ ମିଶନ ତାଲିମ ଗୃହରେ ଆୟୋଜିତ ଏହି କାର୍ଯ୍ୟକ୍ରମରେ ଅନ୍ୟ ମାନଙ୍କ ମଧ୍ୟରେ ଏଡିପିଏଚଓ ଡ଼ଃ ବିଶ୍ୱ ବିହାରୀ ମହାନ୍ତି  ,ଏଡିପିଏଚଓ ଡ଼ଃ ଧନଞ୍ଜୟ ବେହେରା , ପ୍ରମୁଖ ଉପସ୍ଥିତ ଥିଲେ । କାର୍ଯ୍ୟକ୍ରମ ପରିଚାଳକ ବିଶ୍ୱ ରଞ୍ଜନ ରଥ ଧନ୍ୟବାଦ ଅର୍ପଣ କରିଥିଲେ ।