ଅନୁଗୋଳ – ଦେଢ଼ ବର୍ଷ ତଳେ ନାଲ୍‌କୋ ଥାନା ଇଲାକା ଗିରାଙ୍ଗ ଅଞ୍ଚଳରୁ ଏକ ଟ୍ରାଉନ୍‌ସୁଗର ଜବତ ମାମଲାର ରାୟ ଶୁକ୍ରବାର ଅତିରିକ୍ତ ସ୍ଵତନ୍ତ୍ର ଜିଲ୍ଲା ଓ ଦୌରାଜଜ୍ କୋର୍ଟରେ ପ୍ରକାଶ ପାଇଛି । ଅତିରିକ୍ତ ଜିଲ୍ଲା ଓ ଦୌରା ଜଜ୍ ରଞ୍ଜିତା ଜ୍ୟୋତିଷି ମାମଲାର ଶୁଣାଣି କରି ଅଭିଯୁକ୍ତ ଗିରାଙ୍ଗ ଗ୍ରାମର କୁନି ସାହୁ ( ୩୭ ) ଙ୍କୁ ୫ ବର୍ଷ ସଶ୍ରମ କାରାଦଣ୍ଡ ଦେଇଛନ୍ତି । ଏଥିସହିତ ୫ ହଜାର ଟଙ୍କା କରିମାନା ଅନାଦେୟ ଅଧିକ ୬ ମାସ ଜେଲ ଦଣ୍ଡ ଭୋଗିବାକୁ ଆଦେଶ ଦେଇଛନ୍ତି । ଅନୁଗୋଳ ଜିଲ୍ଲାରେ ବ୍ରାଉନସୁଗାର ଜବତ ମାମଲାର ଏହା ପ୍ରଥମ ସଜ୍ଜା ବୋଲି ଜଣା ପଡ଼ିଛି । ସୂଚନା ଅନୁସାରେ , ୨୦୨୧ ମସିହା ଅଗଷ୍ଟ ୨୫ ତାରିଖ ସକାଳେ ଗିରାଙ୍ଗ ହିଙ୍ଗୁଳା ମନ୍ଦିର ନିକଟରେ ଅଭିଯୁକ୍ତ କୁନି ସାହୁ ବ୍ରାଉନ୍‌ସୁଗର ବିକ୍ରି କରୁଥିଲେ । ଅବକାରୀ ବିଭାଗ ଚଢ଼ଉ କରି ତାଙ୍କ ଠାରୁ ୧୦ ଗ୍ରାମ ବ୍ରାଉନସୁଗାର ଜବତ କରିବା ସହ ତାଙ୍କୁ ଗିରଫ କରିଥିଲା । ଏହି ମାମଲାର ଶୁଣାଣି ଅତିରିକ୍ତ ଜିଲ୍ଲା ଓ ଦୌରାଜଜ୍ କୋର୍ଟରେ ଚାଲିଥିବା ବେଳେ ମୋଟ ୩ ଜଣଙ୍କ ସାକ୍ଷ୍ୟ ପ୍ରମାଣକୁ ଆଧାର କରି ବିଚାରପତି ରଞ୍ଜିତା ଜ୍ୟୋତିଷି ଅଭିଯୁକ୍ତ କୁନି ସାହୁଙ୍କୁ ଦୋଷୀ ସାବ୍ୟସ୍ତ କରି ଉପରୋକ୍ତ ରାୟ ଶୁଣାଇଛନ୍ତି । ସରକାରଙ୍କ ପକ୍ଷରୁ ସ୍ବତନ୍ତ୍ର ଅତିରିକ୍ତ ପବ୍ଲିକ ପ୍ରୋସିଡ୍ୟୁଟର ମଦନ ମୋହନ ସାହୁ ମାମଲାର ପରିଚାଳନା କରୁଥିଲେ ।