ଅନୁଗୋଳ – ଅନୁଗୋଳ ଜିଲ୍ଲା ତାଳଚେର ଗୋପାଳପ୍ରସାଦ ଥାନା ଅଞ୍ଚଳର ଜଣେ ୨୭ ବର୍ଷର ମହିଳାଙ୍କ ନାମରେ ଜାଲ ଇନଷ୍ଟାଗ୍ରାମ ଆଇଡି ଖୋଲି ଅଶ୍ଳିଳ ଭିଡିଓ ଓ ଫଟୋ ପୋଷ୍ଟ କରିବା ଅଭିଯୋଗରେ ଜଣେ ଯୁବକଙ୍କୁ ପୁଲିସ ମଙ୍ଗଳବାର ଗିରଫ କରିଛି । ସୂଚନା ଯେ, ଜଣେ ଅଜଣା ଯୁବକ ଅଭିଯୋଗକାରିଣୀ ମହିଳାଙ୍କ ନାମରେ ଏକ ଇନଷ୍ଟାଗ୍ରାମ ଆଇଡି ଖେଲି ତାଙ୍କୁ ତାଙ୍କ ଇନଷ୍ଟାଗ୍ରାମକୁ ଓ ତାଙ୍କ ପରିବାର ଓ ବନ୍ଧୁ ବାନ୍ଧବଙ୍କ ଆଇଡିକୁ ଅଶ୍ଳିଳ ଭିଡିଓ ଓ ଫଟୋ ପୋଷ୍ଟ କରି ହଇରାଣ କରିଚାଲିଥିଲେ। ଏ ନେଇ ମହିଳା ଗତ ୧୩ ତାରିଖ ଅନୁଗୋଳ ସାଇବର ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇ ପୁଲିସ ଏକ ମାମଲା ରୁଜୁକରି ଘଟଣାର ତଦନ୍ତ ଆରମ୍ଭ କରିଥିଲା । ସାଇବର ଅପରାଧକୁ ଗୁରୁତ୍ବ ଦେଉଥିବା ନୂଆ ଏସ୍ପି ସୁଧାଶୁଂ ଶେଖର ମିଶ୍ରଙ୍କ ନିର୍ଦ୍ଦେଶରେ ଏହି ମାମଲାକୁ ଗୁରୁତ୍ବ ଦିଆଯାଇ ଅଭିଯୁକ୍ତକୁ ମଙ୍ଗଳବାର ଗିରଫ କରିବାରେ ସଫଳ ହୋଇଛି ସାଇବର ପୁଲିସ । ପୁଲିସ ସୂତ୍ରରୁ ପ୍ରକାଶ ଯେ, ଗୋପାଳପ୍ରସାଦ ଥାନା ଅନ୍ତର୍ଗତ ପଦ୍ମାବତୀପୁର ଗାଁର ରକିଦେଭ ବିଶ୍ବାଳ(୨୪) ନାମକ ଜଣେ ଯୁବକ ନିଜ ମୋବାଇଲରେ ନିଜ ଇମେଲ ଆଇଡିରେ ଅଭିଯୋଗକାରିଣୀ ମହିଳାଙ୍କ ନାମରେ ଏକ ଇନଷ୍ଟାଗ୍ରାମ ଆଇଡି ଖେଲି ଏହି ପୋଷ୍ଟ କରୁଥିଲେ । ଯାହାଫଳରେ ପୁଲିସକୁ ଅଭିଯୁକ୍ତଙ୍କ ପାଖରେ ପହଞ୍ଚିବା ସହଜ ହୋଇଥିଲା । ମଙ୍ଗଳବାର ପୁଲିସ ରକିଦେଭକୁ ଗିରଫକରି କୋର୍ଟ ଚାଲାଣ କରିଛି ।
Advertisement
