ଅନୁଗୁଳ – ଅନୁଗୁଳ ଜିଲ୍ଲା ତଥା ସହରରେ କରୋନା ସଂକ୍ରମଣ ବଢି ବଢି ଚାଲିଛି । ଜିଲ୍ଲାରେ କରୋନା ସ୍ଥିତି ଦିନକୁ  ଦିନ ଅଧିକ ବିଗୁଡୁଥିବା ବେଳେ ସର୍ବଭାରତୀୟ ବ୍ୟବସାୟୀ ମହାସଂଘ ( କ୍ୟାଟ୍ ) , ଅନୁଗୁଳ ତରଫରୁ ଜିଲ୍ଲାପାଳଙ୍କୁ ବ୍ୟବସାୟୀଙ୍କ ଉପରେ ସମ୍ପୂର୍ଣ୍ଣ ଲକଡ଼ାଉନ୍ ନ ଲଗାଇବା ପାଇଁ ଏବଂ କରୋନା କଟକଣାରେ କିଛି ନୂତନ ସମୟକୁ ନିର୍ଦ୍ଧାରଣ କରିବାକୁ ନେଇ ଜ୍ଞାପନପତ୍ର ଦିଆ ଯାଇଛି । ଏହି ପତ୍ରରେ ସରକାର ଏବଂ ଜିଲ୍ଲାପାଳଙ୍କ ସବୁ ନିଷ୍ପତିକୁ କ୍ୟାଟ୍ ତରଫରୁ ସମ୍ମାନ ଜଣାଇବା ସହିତ କିପରି ଆଗକୁ କରୋନା ମହାମାରୀକୁ ରୋକା ଯାଇପାରିବ ସେଥିପାଇଁ ସମସ୍ତ ବ୍ୟବସାୟ ଗୁଡ଼ିକ ସକାଳ ୮ ଘଟିକାରୁ ୩ଘଟିକା ପର୍ଯ୍ୟନ୍ତ ଖୋଲା ରଖିବାକୁ ଉଲ୍ଲେଖ କରାଯାଇଅଛି । ଖାଦ୍ୟ ପାର୍ସଲ ଏବଂ ରେଷ୍ଟୁରାଣ୍ଟ ଗୁଡ଼ିକୁ ଦିନ ୯ଟାରୁ ରାତ୍ରି ୯ଟା ପର୍ଯ୍ୟନ୍ତ କରିବା ସହ କୋରିୟର୍ ସର୍ଭିସ୍ ଗୁଡ଼ିକୁ ସମ୍ପୂର୍ଣ୍ଣ ଅନୁମତି ଦେବାପାଇଁ ଉଲ୍ଲେଖ କରାଯାଇଅଛି । ଏହି ଜ୍ଞାପନ ପତ୍ର ଦେବାବେଳେ କ୍ୟାଟର ପ୍ରେସିଡେଣ୍ଟ ରାଜେଶ ଧଳା , ଚେୟାରମ୍ୟାନ ରାଜ କୁମାର ଶୁକ୍ଲା , କମିଟି ଚେୟାରମ୍ୟାନ , ଆଡ଼ଭାଇଜର , ସେକ୍ରେଟାରୀ ପ୍ରମୁଖ ଉପସ୍ଥିତ ଥିଲେ । ସରକାରଙ୍କ ପକ୍ଷରୁ ସପ୍ତାହାନ୍ତ ସଟଡାଉନ୍ ଜାରି ରହିଛି । ସେପଟେ ଅନୁଗୁଳ ଜିଲ୍ଲା ବାଣିଜ୍ୟ ଓ ଶିଳ୍ପ ପ୍ରତିଷ୍ଠାନ ଆସନ୍ତା ୩ ତାରିଖରୁ ଅବଶିଷ୍ଟ ଦିନମାନଙ୍କରେ ସକାଳ ୭ଟାରୁ ଅପରାହ୍ନ ୩ଟା ଦୋକାନ ଖୋଲା ରଖିବାକୁ ନିଷ୍ପତ୍ତି ନେଇଛି । ଆସନ୍ତା ୧୬ ତାରିଖ ପର୍ଯ୍ୟନ୍ତ ଏହି ନିଷ୍ପତ୍ତି ବଳବତ୍ତର ରହିବ । ଏ ସଂକ୍ରାନ୍ତରେ ସଂଘ ପକ୍ଷରୁ ଜିଲ୍ଲା ପ୍ରଶାସନକୁ ଅବଗତ କରାଯାଇଛି ।