ଅନୁଗୁଳ – ଅନୁଗୁଳ ଜିଲ୍ଲାରେ ପୁଣି ସାଇବର ଲୁଟେରାଙ୍କ ଠକାମିର ଶିକାର ହୋଇଛନ୍ତି ଜଣେ ପୂର୍ବତନ ଏଲ୍ଆଇସି କର୍ମଚାରୀ । ଲୁଟେରା ମାନେ ତାଙ୍କୁ କବଜା କରି ତାଙ୍କ ଠାରୁ ୨ ଲକ୍ଷରୁ ଉର୍ଦ୍ଧ ଟଙ୍କା ଠକି ନେଇଛନ୍ତି । ସୂଚନା ଅନୁସାରେ ଅନୁଗୁଳ ସଦର ଥାନା ଅନ୍ତର୍ଗତ ଖଲାରୀ ଗାଁର ପୂର୍ବତନ ଏଲ୍ଆଇସି କର୍ମଚାରୀ ସଚ୍ଚିଦାନନ୍ଦ ତ୍ରିପାଠୀଙ୍କୁ ଗତ ୪ ତାରିଖରେ , ତାଙ୍କ ସିମ୍ ବ୍ଲକ୍ ହୋଇଯିବ ବୋଲି ଏକ ଫୋନ୍ ଆସିଥିଲା । ତାକୁ କାର୍ଯ୍ୟକ୍ଷମ କରିବା ପାଇଁ ହେଲେ ଆଧାର ନମ୍ବର ଓ ତାଙ୍କ ବ୍ୟାଙ୍କର ବିବରଣୀ ପ୍ରଦାନ କରିବାକୁ ହେବ ବୋଲି କହିବା ସହ ତାଙ୍କ ଏଟିଏମ୍ କାର୍ଡର ଫଟୋ ପଠାଇବାକୁ କହିଥିଲେ । ସେମାନଙ୍କ ନିର୍ଦ୍ଦେଶ ଅନୁସାରେ ଶ୍ରୀ ତ୍ରିପାଠୀ ସମସ୍ତ ତଥ୍ୟ ପ୍ରଦାନ କରିଚାଲିଲେ । ଏ ସବୁ ତଥ୍ୟ ଦେବା ପରେ ସଚ୍ଚିଦାନନ୍ଦଙ୍କ ୨ଟି ଏକାଉଣ୍ଟରୁ ସେହିଦିନ ଏବଂ ୫ ତାରିଖରେ ୨ ଲକ୍ଷ ୨୦ ହଜାର ଟଙ୍କା କଟି ଯାଇଥିଲା । ଯାହାକି ସାଇବର ଲୁଟେରା ମାନେ ତାଙ୍କୁ ଠକାମି କରି ଏହି ଟଙ୍କା ଲୁଟ କରି ନେଇଥିଲେ । ଏ ନେଇ ସେ ବ୍ୟାଙ୍କକୁ ଜଣାଇବା ପରେ ବ୍ୟାଙ୍କ କତ୍ତୃପକ୍ଷଙ୍କ କହିବା ଅନୁସାରେ ସେ ଅନୁଗୁଳ ସଦର ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ପାଇ ପୁଲିସ ଆଇଟି ଆକ୍ଟରେ ଏକ ମାମଲା ରୁଜ୍ଜୁ କରି ତଦନ୍ତ କରୁଛି ।