ପାଲଲହଡା – ଅନୁଗୁଳ ଜିଲ୍ଲା  ପାଲଲହଡ଼ା ଉପଖଣ୍ଡ ସଦରମହକୁମା ଠାରୁ ମାତ୍ର ୪ କିମି ଦୂର ଏକ ଗାଁ କୁ ରାସ୍ତା ନଥିବାରୁ ଦେଢ କିଲୋମିଟର ରୋଗୀଙ୍କୁ ଖଟିଆରେ ବୁହା ହେବା ଭଳି ଲଜ୍ୟାଜନକ ଚିତ୍ର ସାମ୍ନାକୁ ଆସିଛି । ଗାଁ କୁ ରାସ୍ତା ନଥିବାରୁ ଆମ୍ବୁଲାନ୍ସଟି ଘର ପର୍ଯ୍ୟନ୍ତ  ପହଞ୍ଚି ପାରିନଥିଲା । ଫଳରେ ଖଟିଆରେ ରୋଗୀଙ୍କୁ ଦେଢ କିଲୋମିଟର ବୁହା ହେବା ପରେ ଆମ୍ବୁଲାନ୍ସ ସହାୟତାରେ ଡାକ୍ତରଖାନା ନିଆ ଯାଇଥିଲା । ସୂଚନା ଅନୁସାରେ ଅନୁଗୁଳ ଜିଲ୍ଲା  ପାଲଲହଡା ବ୍ଲକ ନିଜିଗଡ଼ ପଞ୍ଚାୟତ ଅନ୍ତର୍ଗତ ଟାଉନ ଠାରୁ ମାତ୍ର ଚାରି  କିଲୋମିଟର ଦୁର ଭୋଜପୁର ଆଦିବାସୀ ସାହିର ଜଣେ ଷାଠିଏ ବର୍ଷିୟ ବୃଦ୍ଧା ସୁନ୍ଧୁ ବାରିଜ ମଙ୍ଗଳବାର  ରାସ୍ତାରେ ଖସିପଡି ଅସୁସ୍ଥ ହୋଇ ପଡିବାରୁ ବୁଧବାର ସକାଳ ଦଶଟା ସମୟରେ ପରିବାର ଲୋକେ ଚିକିତ୍ସା ପାଇଁ ୧୦୮ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ । କିନ୍ତୁ ଗ୍ରାମକୁ ସଂଯୋଗ କରୁଥିବା ରାସ୍ତା,  ଖାଲ ଓ ପାଣି କାଦୁଅରେ ଭରି ରହିଥିବାରୁ ଆମ୍ବୁଲାନ୍ସଟି ରୋଗୀଙ୍କ ଘରକୁ ପହଞ୍ଚି ନ ପାରି ଘର ଠାରୁ ଦେଢ଼ କିମି ଦୂରରେ ଅଟକି ରହିଥିଲା । ଫଳରେ ଗ୍ରାମବାସୀଙ୍କ ସହଯୋଗରେ ପରିବାର ଲୋକ ଏକ ଖଟିଆ ସାହାଯ୍ୟରେ ସୁନ୍ଧୁଙ୍କୁ ଘର ଠାରୁ ଦେଢ଼ କିମି ଆଣିଥିଲେ । ସେହିଠାରୁ ତାଙ୍କୁ ଆମ୍ବୁଲାନ୍ସ ଯୋଗେ ଉପଖଣ୍ଡ ମୁଖ୍ୟ ଚିକିତ୍ସାଳୟକୁ ଅଣା ଯାଇଥିଲା ଏବଂ ଚିକିତ୍ସା ଆରମ୍ଭ କରାଯାଇଥିଲା । ଏହି ଘଟଣା ପରେ ସ୍ଥାନୀୟ ବିଧାୟକଙ୍କ କାର୍ଯ୍ୟ ଦକ୍ଷତା ଉପରେ ଆଙ୍ଗୁଠି ଉଠିଛି । ଗତ କିଛିଦିନ ତଳେ ପାଲଲହଡ଼ାରେ କୋଭିଡ୍ କେୟାର ସେଣ୍ଟର ଉଦ୍‌ଘାଟନକୁ ନେଇ ବିଜେଡି ସାଂସଦ ମହେଶ ସାହୁ ଓ ପାଲଲହଡ଼ା ବିଧାୟକ ମୁକେଶ ପାଲ ପରସ୍ପର ପ୍ରତି ଅଶ୍ରାବ୍ୟ ଭାଷା ପ୍ରୟୋଗ କରିଥିଲେ । ଫିତା କାଟିବାକୁ ନେଇ ଉଭୟଙ୍କ ମଧ୍ୟରେ ସତେ ଯେମିତି ଏକ ପ୍ରତିଯୋଗୀତା ଥିଲା । ତେବେ ଆଜି ପାଲଲହଡ଼ା ଅଞ୍ଚଳରେ ଗାଁ କୁ ରାସ୍ତା ନଥିବାରୁ ରୋଗୀଙ୍କୁ ଦେଢ କିଲୋମିଟର ଖଟିଆରେ ବୁହା ହେବାର ଚିତ୍ର ସାମ୍ନାକୁ ଆସିବା ପରେ ଉଭୟଙ୍କର ଲୋକଙ୍କ ପାଇଁ କେତେ ଦରଦ ଅଛି ତାହା ଏକ ପ୍ରକାର ଏସପିଏସଟି ହୋଇଛି । ସଦର ମହକୁମା ଠାରୁ ମାତ୍ର ୪ କିମି ଦୂର ଗାଁର ଯଦି ଏଭଳି ଅବସ୍ଥା ତେବେ ଉପାନ୍ତ ଅଞ୍ଚଳର ଅବସ୍ଥା କିଭଳି ଥିବା ତାହା ସ୍ପଷ୍ଟ ଅନୁମାନ କରାଯାଇ ପାରୁଛି ।