ଅନୁଗୁଳ – ଅନୁଗୁଳ ଜିଲ୍ଲା ଛେଣ୍ଡିପଦା ଥାନା ପାତ୍ରପଡା ଗାଁର ଜଣେ ପତ୍ନୀହନ୍ତାଙ୍କୁ ଆଜୀବନ କାରାଦଣ୍ଡାଦେଶ ମିଳିଛି । ସୂଚନା ଅନୁସାରେ ୨୦୦୩ ମସିହାରେ ପାତ୍ରପଡା ଗାଁର ଶଙ୍କର ସାହୁ କୁମଣ୍ଡ ଗ୍ରାମର ସୁମତି ମାଝିଙ୍କୁ ବିବାହ କରିଥିଲେ । ହେଲେ ବିବାହ ପରଠାରୁ ସୁମତିଙ୍କୁ ଶଙ୍କର ଓ ତାଙ୍କ ପରିବାର ଲୋକ ଯୌତୁକ ଜନିତ ନିର୍ଯ୍ୟାତନା ଦେଇ ଆସୁଥିଲେ । ହେଲେ ୨୦୧୪ ମସିହା ମାର୍ଚ ମାସ ୬ ତାରିଖରେ ପାତ୍ରପଡା ଗାଁରେ ଶଙ୍କର କରିଥିବା ଏକ କୁକୁଡା ଫାର୍ମ ନିକଟରୁ ସୁମତିଙ୍କ ମୃତଦେହ ଉଦ୍ଧାର ହୋଇଥିଲା । କେହି ତାଙ୍କ ତଣ୍ଟି କାଟି ହତ୍ୟା କରିଥିବା ଦେଖା ଯାଇଥିଲା । ହେଲେ ସୁମତିଙ୍କୁ ତାଙ୍କ ସ୍ଵାମୀ ଶଙ୍କର ଓ ତାଙ୍କ ପରିବାର ଲୋକ ହତ୍ୟା କରିଥିବା ସୁମତିଙ୍କ ବାପା ବିଛନ୍ଦ ମାଝୀ ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ ଘଟଣାର ତଦନ୍ତ କରି ଶଙ୍କରଙ୍କୁ ହତ୍ୟା ଓ ପରିବାର ଲୋକଙ୍କୁ ଯୌତୁକ ନିର୍ଯ୍ୟାତନା ଅଭିଯୋଗରେ ଗିରଫ କରିଥିଲା । ଆଜି ସୁମତିଙ୍କ ହତ୍ୟା ଘଟଣାରେ ୧୬ ଜଣ ସାକ୍ଷୀ ଓ ପ୍ରମାଣ ଆଧାରରେ ଶଙ୍କର ଏକ କୁକୁଡା କଟା ଚାପଡରେ ତାଙ୍କ ସ୍ତ୍ରୀଙ୍କୁ ହତ୍ୟା କରିଥିବା ପ୍ରମାଣ ହୋଇଛି ।  ଏଥିପାଇଁ ମାନ୍ୟବର ଜିଲ୍ଲା ଓ ଦୌରା ଜଜ ଡ॰ ଭାଗ୍ୟଲକ୍ଷ୍ମୀ ରଥ ଶଙ୍କରକୁ ଆଜୀବନ କାରାଦଣ୍ଡାଦେଶରେ ଦଣ୍ଡିତ କରିଛନ୍ତି । ସରକାରୀ ଓକିଲ ପ୍ରଦୀପ କୁମାର ଓ ସହକାରୀ ସରକାରୀ ଓକିଲ ପ୍ରଦୀପ କୁମାର ଭୁତିଆ ଏହି ମାମଲାରେ ସରକାରଙ୍କ ପକ୍ଷରୁ କେସ ଲଢିଥିଲେ ।