ତାଳଚେର – ଅନୁଗୁଳ ଜିଲ୍ଲା ତାଳଚେର ବ୍ଲକ ଅନ୍ତର୍ଗତ ଦିଘି ଗ୍ରାମ ଦେଇ ଯାଉଥିବା ଫ୍ଲାଏ ଓଭର ବ୍ରିଜକୁ ବେନିୟମ ଭାବେ ନିର୍ମାଣ କରାଯାଉଛି । ରାଜ୍ୟ ସରକାର ଓ ପୂର୍ବତଟ ରେଳବାଇ ବିଭାଗଙ୍କ ମିଳିତ ସହଯୋଗରେ ଏହି ଫ୍ଲାଏ ଓଭର ବ୍ରିଜ ନିର୍ମାଣ କରାଯାଉଥିବା ବେଳେ ଗ୍ରାମବାସୀଙ୍କ ଦାବୀ ,ଆପତ୍ତିକୁ ଆଦୌ ପୂରଣ କରାଯାଇନାହିଁ । ଏନେଇ ଗ୍ରାମବାସୀ କରି ଆସୁଥିବା ଅଭିଯୋଗ ଗୁଡ଼ିକୁ ମଧ୍ୟ ତାଳଚେର ଉପଜିଲ୍ଲାପାଳ ଶୁଣୁନାହାଁନ୍ତି କି ମାନ୍ୟବର ଉଚ୍ଚ ନ୍ୟାୟଳୟଙ୍କ ନିର୍ଦ୍ଦେଶକୁ ସେ ମାନୁ ନାହାନ୍ତି ବୋଲି ଆଜି ଏକ ସାମ୍ବାଦିକ ସମ୍ମିଳନୀ ଜରିଆରେ ଗ୍ରାମବାସୀମାନେ ଅଭିଯୋଗ କରିଛନ୍ତି । ଦିଘି ଗ୍ରାମବାସୀଙ୍କ ସୂଚନା ଅନୁସାରେ,ଏହି ପ୍ରସଙ୍ଗ ନେଇ ପୂର୍ବରୁ ତାଳଚେର ଉପଜିଲ୍ଲାପାଳ , ତହସିଲଦାର , ପୁଲିସ , ପ୍ରଶାସନ ଓ ଗ୍ରାମବାସୀଙ୍କୁ ନେଇ ବହୁବାର ଆଲୋଚନା ହୋଇଥିଲା । ୨୦୧୩ ମସିହା ରିହାବିଲଟେସନ ଆଣ୍ଡ ରିସେଟଲମେଣ୍ଟ ପଲିସି ଅନୁସାରେ କ୍ଷତିଗ୍ରସ୍ତ ଗ୍ରାମବାସୀଙ୍କୁ ଉଚିତ ମାନରେ ଅର୍ଥାତ୍ ବଜାର ମୂଲ୍ୟର ୪ ଗୁଣ ଅନୁସାରେ କ୍ଷତିପୂରଣ ପ୍ରଦାନ , ନିଯୁକ୍ତି ପ୍ରଦାନ ଓ ଥଇଥାନ କରିବା କଥା । କିନ୍ତୁ ଉପଖଣ୍ଡ ପ୍ରଶାସନିକ ଅଧିକାରୀ କିଛି ନ ଶୁଣିବାରୁ ବାଧ୍ୟହୋଇ ଗ୍ରାମବାସୀ ମାନ୍ୟବର ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ୨୦୧୬ ମସିହାରେ ଏ ବାବଦରେ କେସ୍ ହେବା ପରେ ଫ୍ଲାଏ ଓଭର ବ୍ରିଜ ନିର୍ମାଣ କାର୍ଯ୍ୟ ବନ୍ଦ ହୋଇଥିଲା । ଏବଂ କୋର୍ଟ ନୂଆ ନିୟମକୁ ଲାଗୁ କରି ଲୋକଙ୍କୁ ଥଇଥାନ କରି ଘରଦ୍ୱାର ହରାଉଥିବା ଲୋକଙ୍କ ସଠିକ ମୁଲ୍ୟାଙ୍କନ କରି ଉଚିତ୍ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଥିଲେ । କିନ୍ତୁ ସ୍ଥାନୀୟ ତାଳଚେର ଉପଜିଲ୍ଲାପାଳ ଓ ଲ୍ୟାଣ୍ଡ ଆକ୍ୟୁଜେସନ ଅଫିସ୍ର ତାହାକୁ ପାଳନ କଲେନାହିଁ । ଏଣୁ ପୁନର୍ବାର ଜ୍ଞାନରଞ୍ଜନ ନାୟକ ଓ ଅନ୍ୟମାନେ ୨୦୧୭ ମସିହାରେ ହାଇକୋର୍ଟରେ କେସ୍ କରିଥିଲେ । ବର୍ତମାନ ଏହା ଅଦାଲତରେ ବିଚାରାଧିନ ରହିଛି । ଉକ୍ତ କେସ୍ ଗୁଡ଼ିକର ନକଲକୁ ଅନୁଗୁଳ ଜିଲ୍ଲାପାଳ ଓ ଉପଜିଲ୍ଲାପାଳଙ୍କୁ ପ୍ରଦାନ କରାଯାଇଛି । ତଥାପି ମାନ୍ୟବର ଅଦାଲତଙ୍କୁ ହେୟଜ୍ଞାନ କରି ଫ୍ଲାଏ ଓଭର ବ୍ରିଜ ନିର୍ମାଣ କାର୍ଯ୍ୟକୁ ତ୍ୱରାନ୍ୱିତ କରିବାପାଇଁ ତାଳଚେର ଉପଜିଲ୍ଲାପାଳ ପ୍ରୟାସ କରୁଛନ୍ତି ବୋଲି ଆଜିର ସାମ୍ବାଦିକ ସମ୍ମିଳନୀରେ ଗ୍ରାମବାସୀ ଅଭିଯୋଗ କରିଛନ୍ତି । ଅପରପକ୍ଷେ କ୍ଷତିଗ୍ରସ୍ତ ଗ୍ରାମବାସୀମାନେ ପ୍ରଶାସନର ଏପରି ମନୋମୂଖୀ କାର୍ଯ୍ୟ ଯୋଗୁଁ ବ୍ୟସ୍ତ ବିବ୍ରତ ହୋଇ ପଡ଼ିଛନ୍ତି । ସୂଚନା ଅନୁସାରେ ଦିଘି ଗ୍ରାମବାସୀ ୧୯୬୦ ମସିହାରେ ତାଳଚେର ତାପଜ ବିଦ୍ୟୁତ କେନ୍ଦ୍ର ନିମନ୍ତେ ଜମି ଓ ଘରଦ୍ୱାର ହରାଇପରେ ମଧ୍ୟ କିଛି ପାଇନାହାନ୍ତି । ଏବେ ସେମାନେ ସିମୀତ ସ୍ଥାନରେ ଘରଦ୍ୱାର କରି ପରିବାର ସହ ବାସ କରୁଥିବା ବେଳେ , ଯଦି ଫ୍ଲାଏ ଓଭର ବ୍ରିଜ ନିର୍ମାଣ ହୁଏ ତେବେ ସେମାନେ କେଉଁଠିକି ଯିବେ ବୋଲି ପ୍ରଶ୍ନ କରିଛନ୍ତି । କୈାଣସି ବ୍ୟବସ୍ଥା କରା ନଯାଇ ସ୍ଥାନରୁ ହଟିବାପାଇଁ ଡରେଇ, ଧମକାଇ କାର୍ଯ୍ୟ କରିବାର ପ୍ରୟାସକୁ ତୀବ୍ର ବିରୋଧ କରାଯିବ ବୋଲି ଗ୍ରାମବାସୀମାନେ ଗଣମାଧ୍ୟମକୁ ସୂଚନା ଦେଇଛନ୍ତି । ଆଜିର ଏହି ସାମ୍ବାଦିକ ସମ୍ମିଳନୀରେ ପ୍ରହଲ୍ଲାଦ ସାହୁ,ଜ୍ଞାନରଞ୍ଜନ ନାୟକ,ଶରତ ଚନ୍ଦ୍ର ସାହୁ,ବିପିନ ବିହାରୀ ନାୟକ , ଟି.ବାବୁରାଓଙ୍କ ସମେତ ବହୁ ଗ୍ରାମବାସୀ ଉପସ୍ଥିତ ଥିଲେ ।
Advertisement
