ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ପାଇଁ ଦେବ ନିମନ୍ତ୍ରଣ

ଅନୁଗୁଳ – ଆସନ୍ତା ଜାନୁଆରୀ ମାସ ୧୭ ତାରିଖରେ ଲୋକାର୍ପଣ ହେବ ଶ୍ରୀମନ୍ଦିର ପରିକ୍ରମା ପ୍ରକଳ୍ପ  । ଏଥିଲାଗି ଗତକାଲି ଠାରୁ ଆରମ୍ଭ ହୋଇଛି ଦେବ ନିମନ୍ତ୍ରଣ କାର୍ଯ୍ୟକ୍ରମ  । ଭାରତବର୍ଷର ବିଭିନ୍ନ ମନ୍ଦିର , ୪ ଧାମ ଏବଂ ୧୨ଟି ଜ୍ୟୋର୍ତିଲିଙ୍ଗ , ଦାରୁ ଆସିଥିବା ବିଭିନ୍ନ ସ୍ଥାନ କୁ ଯାତ୍ରା କରିଛନ୍ତି ଶ୍ରୀମନ୍ଦିରର ସେବାୟତ ଓ ଅଧିକାରୀ । ଦେଶ ତଥା ଦେଶ ବାହାରର ବିଭିନ୍ନ ମୁଖ୍ୟ ମନ୍ଦିରର ପ୍ରମୂଖ ସ୍ଥାନକୁ ନିମନ୍ତ୍ରଣ ପତ୍ର ନେଇ ବାହାରିଛନ୍ତି ୩୦ରୁ ଉର୍ଦ୍ଧ୍ବ  ପ୍ରତିନିଧି ଦଳ । ଏହି ପରିପ୍ରେକ୍ଷୀରେ ଅନୁଗୁଳ ଜିଲ୍ଲାର ଗୋପାଳ ପ୍ରସାଦ ସ୍ଥିତ ମା’ ହିଙ୍ଗୁଳା ପୀଠ ଏବଂ ଅନୁଗୁଳ ସ୍ଥିତ ଶୈଳଶ୍ରୀକ୍ଷେତ୍ର ମନ୍ଦିରକୁ ଆଜି ପୁରୀରୁ ଆସିଥୁବା ସ୍ବତନ୍ତ୍ର ପ୍ରତିନିଧି ଦଳ ନିମନ୍ତ୍ରଣ ପତ୍ର ପ୍ରଦାନ କରିଛନ୍ତି । ଏକ ଆଧ୍ୟାତ୍ମିକ ବାତାବରଣ ମଧ୍ୟରେ ନିମନ୍ତ୍ରଣ ପତ୍ର ଧରି ପୁରୀରୁ ଆସିଥୁବା ବରିଷ୍ଠ ସେବାୟତ ଶ୍ରୀ ନରସିଂହ ମହାପାତ୍ର, ଶ୍ରୀ ନାରାୟଣ ମହାପାତ୍ର ଓ ନୋଡାଲ ଅଧିକାରୀ ଶ୍ରୀ ସର୍ମତ୍ ଆଚାର୍ଯ୍ୟଙ୍କୁ ଅନୁଗୁଳର ଶୈଳଶ୍ରୀକ୍ଷେତ୍ର ଠାରେ ଜିଲ୍ଲା ପ୍ରଶାସନ ପକ୍ଷରୁ ସଂକୀର୍ତ୍ତନ, ଓଡିଶୀ ନୃତ୍ୟ,ହୁଳ ହୁଳି ସହ ଭବ୍ୟ ସ୍ବାଗତ କରାଯାଇ ଉତ୍ତରୀୟ ଦେଇ ସମ୍ବଦ୍ଧିତ କରାଯାଇଥିଲା । ଜିଲ୍ଲା ପ୍ରଶାସନ ଦ୍ବାରା ଆୟୋଜିତ କାର୍ଯ୍ୟକ୍ରମରେ ତାଳଚେର ବିଧାୟକ ଶ୍ରୀ ବ୍ରଜ କିଶୋର ପ୍ରଧାନ ଓ ଦୁଇ ମନ୍ଦିରର ସେବାୟତଙ୍କ ଉପସ୍ଥିତିରେ ଜିଲ୍ଲାପାଳ ଶ୍ରୀ ସିଦ୍ଧାର୍ଥ ଶଙ୍କର ସ୍ବାଇଁ ନିମନ୍ତ୍ରଣ ପତ୍ର ଗ୍ରହଣ କରିଥିଲେ । ଏହି କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ ଶ୍ରୀ ପ୍ରତାପ ପ୍ରୀତିମୟ,ଜିଲ୍ଲା ସଂସ୍କୃତି ଅଧିକାରୀ ଶ୍ରୀ ଦୁଃଶାସନ ନାଏକ, ମନ୍ଦିର ପରିଚାଳନା କମିଟିର ସଦସ୍ୟ,ଗଣମାଧ୍ୟମର ପ୍ରତିନିଧି ଓ ବହୁ ବୁଦ୍ଧିଜିବୀ ପ୍ରମୁଖ ଯୋଗ ଦେଇଥିଲେ ।

Advertisement