ଅନୁଗୁଳ – ୭୩ତମ ଗଣତନ୍ତ୍ର ଦିବସ ଅବସରରେ ଦିଲ୍ଲୀ ରାଜପଥରେ ଭାରତର ମହାମହିମ ରାଷ୍ଟ୍ରପତି ରାମନାଥ କୋବିନ୍ଦ୍, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ହଜାର ହଜାର ଦର୍ଶକଙ୍କ ଭିଡ଼ରେ ଗଣମାନ୍ୟ ଅତିଥୀଙ୍କ ସମ୍ମୁଖରେ ଅନୁଗୁଳର ନୃତ୍ୟ ନୀଳୟର ସଦସ୍ୟ ସଦସ୍ୟା ମାନେ ସେମାନଙ୍କ ନୃତ୍ୟ ପରିବେଷଣ କରିଛନ୍ତି । ଏହି ଦିବସ ଅବସରରେ ରାଜଧାନୀ ରାଜପଥରେ ଭାରତର ସାମରିକ ସାମର୍ଥ୍ୟ, କଳା ଓ ପରମ୍ପରାର ଝଲକ ଦେଖିବାକୁ ମିଳିଥିଲା । ଭବ୍ୟ ପରେଡର ଶେଷ ଭାଗରେ ୧୫ଟି ରାଜ୍ୟର ୩୬ଟି ଟିମ୍ ଦ୍ଵାରା ୪୮୫ ଜଣ କଳାକାର ବନ୍ଦେ ମାତରଂ ଅମୃତ ମହୋତ୍ସବ ମାଧ୍ୟମରେ ଚିତ୍ତାକର୍ଷକ ନୃତ୍ୟ ପରିବେଷଣ କରିଥିଲେ । ଏମାନଙ୍କ ମଧ୍ୟରେ ଅନୁଗୁଳ ନୃତ୍ୟ ନୀଳୟର ଦଶ ଜଣିଆ ଦଳ ଏଥିରେ ଓଡ଼ିଶୀ ନୃତ୍ୟ ପରିବେଷଣ କରି ସମସ୍ତଙ୍କୁ ମନ୍ତ୍ର ମୁଗ୍ଧ କରିଥିଲେ । ଅନୁଗୁଳ ଇତିହାସରେ ପ୍ରଥମ ଥର ପାଇଁ ରାଜପଥରେ ଏହି ଦଳ ନୃତ୍ୟ ପରିବେଷଣ କରିଥିଲା । ଓଡ଼ିଶୀ ନୃତ୍ୟାଙ୍ଗନା ମାନେ ଯେତେବେଳେ ଓଡ଼ିଶୀ କଳାର ଚାତୁରି ପ୍ରଦର୍ଶନ କଲେ ଦର୍ଶକଙ୍କ ତାଳି ମାଡ଼ରେ ରାଜପଥ ପ୍ରକମ୍ପିତ ହୋଇଥିଲା । ଏପରିକି ରାଷ୍ଟ୍ରପତି ରାମନାଥ କୋବିନ୍ଦ୍ ମଧ୍ୟ ନୃତ୍ୟରେ ବିମୋହିତ ହୋଇଥିଲେ ଏବଂ କରତାଳି ଦେଇ ଉତ୍ସାହିତ କରିଥିଲେ ।
Advertisement
