ଅନୁଗୁଳ – ବିଳମ୍ବିତ ରାତି ଯାଏଁ କାର୍ତ୍ତିକେଶ୍ବର ପୂଜା ଭଷାଣି ଉତ୍ସବ ଚାଲୁଥିବା ବେଳେ ଅଭିଯୋଗ ପାଇ ଯାଇଥିବା କିଛି ପୁଲିସ କର୍ମଚାରୀଙ୍କୁ ଆକ୍ରମଣ ଘଟଣାରେ ୭ ଜଣଙ୍କୁ ପୁଲିସ ଅଟକ ରଖିଛି । ସୂଚନା ଅନୁସାରେ ଅନୁଗୁଳ ଜିଲ୍ଲା ବଅଁରପାଳ ଥାନା ସେରେଣବେଡା ଗାଁରେ ଗତକାଲି ବିଳମ୍ବିତ ରାତି ଯାଏଁ କାର୍ତ୍ତିକେଶ୍ବର ପୂଜା ଭସାଣି ଉତ୍ସବ ଚାଲିଥିଲା । ଏହି ଭସାଣି ବେଳେ ଉଚ୍ଚ ସ୍ୱରରେ ଡିଜେ ବାଜୁଥିବା ଅଭିଯୋଗ ପୁଲିସ ପାଇଥିଲା । ଅଭିଯୋଗ ପାଇ ପୁଲିସ ଘଟଣା ସ୍ଥଳରେ ପହଞ୍ଚିଥିଲା । ରାତି ୧୦ ଟା ଯାଏ ସାଉଣ୍ଡ ବଜାଇବାକୁ ଅନୁମତି ଥିବା ବେଳେ ବିଳମ୍ବିତ ରାତି ଯାଏ ଆଉ ଉଚ୍ଚ ସ୍ୱରରେ ଡିଜେ ବାଜୁଥିବାରୁ ପୁଲିସ ଶୋଭାଯାତ୍ରା ଅଟକାଇବା ସହ ଡିଜେ ଗାଡି କୁ ଜବତ କରିଥିଲା । ତେବେ ଏଥିରେ ଉତକ୍ଷିପ୍ତ ହୋଇ ଭସାଣିରେ ସାମିଲ କିଛି ଲୋକ ପୁଲିସ ସହ ଯୁକ୍ତିତର୍କ କରିବା ସହ ମାଡ଼ ମାରିଥିଲେ । ଏହି ଘଟଣା ପରେ ଆଜି ପୁଲିସର କିଛି ବରିଷ୍ଠ ଅଧିକାରୀ ଏକ ପ୍ଲାଟୁନ ଫୋର୍ସ ଧରି ଗାଁରେ ପହଞ୍ଚିଥିଲେ । ଆଉ ପୁଲିସ ଆସିବା ଜାଣି ଗାଁରୁ ଅଧିକାଂଶ ପୁରୁଷ ଗାଁ ଛାଡି ପଳାଇ ଯାଇଥିବା ଜଣା ପଡ଼ିଛି । ତେବେ ପୁଲିସକୁ ଆକ୍ରମଣ ଅଭିଯୋଗରେ ୭ ଜଣଙ୍କୁ ଥାନାକୁ ଆଣି ଅଟକ ରଖା ଯାଇଥିବା ସୂଚନା ମିଳିଛି ।