ଅନୁଗୁଳ – ଅନୁଗୁଳ ଜିଲ୍ଲା ଜରପଡା ଥାନା ନାଉପଦା ଗ୍ରାମରେ ପୂର୍ବ ଶତ୍ରୁତାକୁ କେନ୍ଦ୍ରକରି ୨୦୧୭ ମସିହାରେ ହୋଇଥିବା ଏକ ହତ୍ୟାକାଣ୍ଡର ହତ୍ୟାକାରୀକୁ ବୁଧବାର ଦିନ ମାନ୍ୟବର ଜିଲ୍ଲା ଓ ଦୌରା ଜଜ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି । ସୂଚନା ଅନୁସାରେ ୨୦୧୭ ମସିହା ଜାନୁୟାରୀ ୧୬ ତାରିଖ ସନ୍ଧ୍ୟା ୭ଟା ସମୟରେ ଜରପଡା ଥାନା ଅନ୍ତର୍ଗତ ନାଉପଦା ଗ୍ରାମର ଜଗ ବେହେରା ବିଲରୁ କାମ ସାରି ଫେରୁଥିବା ସମୟରେ ଗାଁ କାଳି ମନ୍ଦିର ନିକଟରେ ସେହି ଗ୍ରାମର ନେଣ୍ଟୁ ବେହେରା ପୂର୍ବ ଶତ୍ରୁତାକୁ କେନ୍ଦ୍ର କରି ଏକ ଧାରୁଆ ଅସ୍ତ୍ରରେ ଜଗ ବେହେରାଙ୍କ ମୁଣ୍ଡକୁ ଆକ୍ରମଣ କରିଥିଲା । ନେଣ୍ଟୁର ଆକ୍ରମଣରେ ଘଟଣା ସ୍ଥଳରେ ଜଗଙ୍କର ମୃତ୍ୟୁ ହୋଇଥିଲା । ମୃତ ଜଗ ବେହେରାଙ୍କ ଭାଇ ଏ ନେଇ ଜରପଡା ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ଦଫା ୩୦୨ ଆଇପିସିରେ ମାମଲା ରୁଜୁ କରି ହତ୍ୟାକାରୀ ନେଣ୍ଟୁ ବେହେରାକୁ ଗିରଫ କରି କୋର୍ଟ ଚାଲାଣ କରିଥିଲା । ସେହିଦିନ ଠାରୁ ନେଣ୍ଟୁ ବିଚାରାଧୀନ କଏଦୀ ଭାବେ ଥିବା ବେଳେ ବୁଧବାର ମାନ୍ୟବର ଜିଲ୍ଲା ଓ ଦୌରା ଜଜ ଡ଼ଃ ଭାଗ୍ୟଲଷ୍ମୀ ରଥ ଏହି ମାମଲାର ଶୁଣାଣି କରି ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି । ୧୭ଜଣ ସାକ୍ଷୀ ଓ ପ୍ରମାଣକୁ ଆଧାରକାରୀ ହତ୍ୟାକାରୀ ନେଣ୍ଟୁ ବେହେରାକୁ ଦଫା ୩୦୨ରେ ଏହି ଆଜୀବନ ସଶ୍ରମ କାରାଦଣ୍ଡ କରା ଯିବା ସହ ୩୦ହଜାର ଟଙ୍କା ଜୋରିମାନା ଆଦେଶ କରିଛନ୍ତି । ଏହି ମାମଲାରେ ସରକାରଙ୍କ ପକ୍ଷରୁ ସରକାରୀ ଓକିଲ ପ୍ରଦୀପ କୁମାର ଦାସ ଏବଂ ଆଡିସନାଲ ପିପି ପ୍ରଦୀପ କୁମାର ଭୁତିଆ କେଶ ପରିଚାଳନା କରୁଥିଲେ ।
Advertisement
