ଅନୁଗୁଳ – ଅନୁଗୁଳ ସରକାରୀ ମହାବିଦ୍ୟାଳୟର ହଷ୍ଟେଲ ଫି‘କୁ ନେଇ କଲେଜ ଛାତ୍ରୀ ଆନ୍ଦୋଳନକୁ ଓହ୍ଲାଇଛନ୍ତି । ହଷ୍ଟେଲ କର୍ତ୍ତୃପକ୍ଷଙ୍କ ଅଗ୍ରୀମ ଫି ଆଦାୟକୁ ବିରୋଧ କରି ମହାବିଦ୍ୟାଳୟ ସମ୍ମୁଖରେ ରାସ୍ତାରୋକ କରିଥିଲେ ହଷ୍ଟେଲ ଛାତ୍ରୀ । ମହାବିଦ୍ୟାଳୟର ଛାତ୍ରୀ ହଷ୍ଟେଲର ଅନ୍ତେବାସୀ ମାନଙ୍କ ଅଭିଯୋଗ ହେଲା ଯେ ,କରୋନା ଭଳି ସ୍ଥିତିରେ ଛାତ୍ରୀମାନଙ୍କୁ ହଷ୍ଟେଲ ଫି ଅଗ୍ରୀମ ଦେବାକୁ ବାଧ୍ୟ କରା ଯାଉଛି । କର୍ତ୍ତୃପକ୍ଷ ଦାବି କରୁଥିବା ଏହି ଅଗ୍ରୀମ ଫି ସେମାନେ କିଭଳି ଭରିବେ ବୋଲି ଆନ୍ଦୋଳନରତ ଛାତ୍ରୀମାନେ ପ୍ରଶ୍ନ କରିଛନ୍ତି । ଅନୁଗୁଳ ସରକାରୀ ମହାବିଦ୍ୟାଳୟର ହଷ୍ଟେଲ ସୁପରିଟେଣ୍ଡେଣ୍ଟ ବଳପୂର୍ବକ ଫି ଆଦାୟ ପାଇଁ ତାଗିଦ କରିବା ସହ ଫି ନଦେଲେ ପରୀକ୍ଷା ଦେଇପାରିବ ନାହିଁ ବୋଲି ଧମକ ଦେଇଛନ୍ତି ବୋଲି ଛାତ୍ରୀମାନେ ଅଭିଯୋଗ କରିଛନ୍ତି । ଖାଲି ସେତିକି ନୁହେଁ, ଅଗ୍ରୀମ ଫିସ ପୈଠ ନକଲେ ସେମାନେ ହଷ୍ଟେଲ ଛାଡି ପାରିବେ ନାହିଁ ବୋଲି ମଧ୍ୟ ସୁପରିଟେଣ୍ଡେଣ୍ଟ ବାଧ୍ୟ କରିବାରୁ ଛାତ୍ରୀମାନେ ଆନ୍ଦୋଳନକୁ ଓହ୍ଲାଇଥିଲେ । ଏହି ଆନ୍ଦୋଳନ ଯୋଗୁଁ ପ୍ରାୟ ଏକ ଘଣ୍ଟା ଧରି ରାସ୍ତାରେ ଗାଡି ମୋଟର ଚଳାଚଳ ବନ୍ଦ ରହିଥିଲା । ପରେ ଘଟଣାସ୍ଥଳରେ ପୁଲିସ ଓ କଲେଜ କର୍ତ୍ତୃପକ୍ଷ ପହଞ୍ଚି ଆନ୍ଦୋଳନରତ ଛାତ୍ରୀମାନଙ୍କ ସହ ଆଲୋଚନା କରିଥିଲେ । ସମସ୍ୟାର ସମାଧାନ କରାଯିବ ବୋଲି ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହାର ହୋଇଥିଲା ।
Advertisement
