ନାଲକୋନଗର – ଅନୁଗୁଳ ଜିଲ୍ଲା ନାଲକୋନଗର ଥାନା ଅନ୍ତର୍ଗତ ନାଲକୋ ଡାକ୍ତରଖାନାରେ ଆଜି ଜଣେ ଚତୁର୍ଥ ଶ୍ରେଣୀ କର୍ମଚାରୀଙ୍କ ମୃତଦେହ ରଖି ପରିବାର ଲୋକ ପ୍ରତିବାଦ କରିଥିଲେ । କୋଭିଦ ଟୀକା ଯୋଗୁଁ ତାଙ୍କ ମୃତ୍ୟୁ ହୋଇଥିବା ଅଭିଯୋଗ କରି ପରିବାର ଲୋକ କ୍ଷତିପୂରଣ ଓ ସ୍ଥାୟୀ ଚାକିରି ଦାବି କରି ଏହି ପ୍ରତିବାଦ କରିଥିବା ବେଳେ ପ୍ରାୟ ୪ ଘଣ୍ଟା ଧରି ଡାକ୍ତରଖାନାରେ ଏକ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା । ସୂଚନା ଅନୁସାରେ କୁରୁଡୁଲୁ ଗାଁର ଶକୁନ୍ତଳା ଗୋଚ୍ଛାୟତ (୫୨) ନାଲକୋ ଡାକ୍ତରଖାନାରେ ଚତୁର୍ଥ ଶ୍ରେଣୀ କର୍ମଚାରୀ ଭାବେ କାମ କରୁଥିବା ବେଳେ ଚଳିତ ମାସ ୩ ତାରିଖ ଦିନ ନାଲକୋ ଡାକ୍ତରଖାନାରେ ସେ କରୋନା ଟୀକା ନେଇଥିଲେ । ଟୀକା ନେବାର ଗୋଟିଏ ଦିନ ପରେ ଶକୁନ୍ତଳା ଅସୁସ୍ଥ ଅନୁଭବ କରିବାରୁ ତାଙ୍କୁ ନାଲୋକ ଡାକ୍ତରଖାନାରେ ଭର୍ତ୍ତି କରା ଯାଇଥିଲା । ପରେ ଡାକ୍ତରଖାନା କତ୍ତୃପକ୍ଷ ସ୍ଥାନୀୟ ପ୍ରଧାନ ନର୍ସିଂ ହୋମକୁ ପଠାଇ ଦେଲେ । ଅବସ୍ଥା ଗୁରୁତର ହେବାରୁ ଭୁବନେଶ୍ବରର ଏକ ଘରୋଇ ଡାକ୍ତରଖାନାକୁ ତାଙ୍କୁ ସ୍ଥାନାନ୍ତରିତ କରା ଯାଇଥିବା ବେଳେ ଚିକିତ୍ସାଧୀନ ଅବସ୍ଥାରେ ଆଜି(ବୁଧବାର) ସକାଳେ ଶକୁନ୍ତଳାଙ୍କ ମୃତ୍ୟୁ ହୋଇଥିଲା । ଏହା ପରେ ସ୍ୱାମୀ ଦଣ୍ଡଧର ଗୋଚ୍ଛାୟତ ଓ ପରିବାର ଲୋକ ନାଲକୋ ଡାକ୍ତରଖାନା କାଜୁଆଲଟି ସମ୍ମୁଖରେ ମୃତଦେହ ରଖି କ୍ଷତିପୂରଣ ଦାବି କରିଥିଲେ । ଦଣ୍ଡଧରଙ୍କ କହିବା ଅନୁଯାୟୀ ଶକୁନ୍ତଳା ଦୀର୍ଘ ବର୍ଷ ଧରି ନାଲକୋ ଡାକ୍ତରଖାନାରେ ଠିକା ଶ୍ରମିକ ଭାବେ କାର୍ଯ୍ୟ କରୁଥିଲେ । ଆଉ ୩ ତାରିଖ କୋଭିଡ଼ ଟୀକା ନେବାର ଗୋଟିଏ ଦିନ ପରେ ଶକୁନ୍ତଳା ପରିବାର ଲୋକଙ୍କୁ ଚିହ୍ନି ପାରୁନଥିଲେ । କରୋନା ଟୀକା ନେବାରୁ ତାଙ୍କର ମୃତ୍ୟୁ ହୋଇଥିବା ସ୍ୱାମୀ ଦଣ୍ଡଧର ଅଭିଯୋଗ କରିଥିଲେ । ପୁଲିସ ଖବର ପାଇ ଘଟଣାସ୍ଥଳ ରେ ଆସି ପହଞ୍ଚି ବୁଝାସୁଝା କରିଥିଲା । ପରେ ନାଲକୋ ପ୍ରଶାସନ ପକ୍ଷରୁ ସିପିପି ଡିଜିଏମ ସୁନୀଲ ମହାପାତ୍ର ,ଏ.ଜି.ଏମ ଅମିତାବ୍ ପାଢ଼ୀ , ନାଲକୋ ଶ୍ରମିକ ସଭା ସଭାପତି ବାବୁଲି ସେଠି , ନାଲକୋ ନିର୍ମାଣ ମଜୁଦୁର ସଭାର ଉପସଭାପତି ପ୍ରସନ୍ନ ମହାନ୍ତି , ହାଉସିଂ ବୋର୍ଡ ଚେୟାରମ୍ୟାନ ମୀନକେତନ ଅମାନ୍ତ , ନାଲକୋ ଶ୍ରମିକ ସଭା ସଭାପତି ବାବୁଲି ସେଠି , ନାଲକୋ ନିର୍ମାଣ ମଜୁଦୁର ସଭାର ଉପସଭାପତି ପ୍ରସନ୍ନ ମହାନ୍ତିଙ୍କ ଉପସ୍ଥିତିରେ ୫୦ହଜାର ଟଙ୍କା କ୍ଷତିପୂରଣ ସାଙ୍ଗକୁ ପରିବାରର ଜଣଙ୍କୁ ଠିକା ଚାକିରି ଦେବାକୁ ପ୍ରତିଶ୍ରୁତି ଦେବା ପରେ ରାତି ୭.୩୦ସମୟରେ ମୃତଦେହ ଉଠିଥିଲା । ତେବେ ଶବ ବ୍ୟବଚ୍ଛେଦ ରିପୋର୍ଟ ପାଇବା ପରେ କେଉଁ କାରଣରୁ ମୃତ୍ୟୁ ଘଟିଛି ତାହା ଜଣାପଡିବ ବୋଲି ନାଲକୋ ମ୍ୟାନେଜ୍ ମେଣ୍ଟ ପକ୍ଷରୁ ଏ.ଜି.ଏମ ଅମିତାବ୍ ପାଢ଼ୀ ପ୍ରକାଶ କରିଛନ୍ତି ।
Advertisement
