ଅନୁଗୁଳ – କୋଭିଡର ସାଂପ୍ରତିକ ପରିସ୍ଥିତିକୁ ଅନୁଧ୍ୟାନ କରି ଜିଲ୍ଲାରେ ଥିବା ସମସ୍ତ ମନ୍ଦିର , ମସଜିଦ୍ ଓ ଗୀର୍ଜା ଗୁଡିକୁ ଆସନ୍ତା କାଲି(୩ ସେପ୍ଟେମ୍ବର) ଠାରୁ ପରବର୍ତ୍ତୀ ନିର୍ଦ୍ଦେଶନାମା ପର୍ଯ୍ୟନ୍ତ କୋଭିଡ ନିୟମାବଳୀ ଆଧାରରେ ଖୋଲା ରହିବ ବୋଲି ଆଜି ଜିଲ୍ଲାପାଳ ଶ୍ରୀ ସିଦ୍ଧାର୍ଥ ଶଙ୍କର ସ୍ବାଇଁ ନିର୍ଦ୍ଦେଶନାମା ଜାରି କରିଛନ୍ତି । ତେବେ ଏହି ଧର୍ମାନୁଷ୍ଠାନ ଖୋଲିବା ସମୟରେ ସର୍ବସାଧାରଣଙ୍କ ଅବଗତି ନିମନ୍ତେ ଧାର୍ମିକ ଅନୁଷ୍ଠାନ , ପୂଜାସ୍ଥଳୀ ତଥା ଅନୁଷ୍ଠାନ ଗୁଡିକର ବାହାରେ କୋଭିଡ ନିୟମାବଳୀ ସମ୍ପର୍କରେ ବିଜ୍ଞପ୍ତି ପ୍ରଦର୍ଶିତ କରାଯିବ । ଧାର୍ମିକ ଅନୁଷ୍ଠାନକୁ ଯିବାକୁ ହେଲେ ମୁହଁରେ ମାସ୍କ ପିନ୍ଧିବା ବାଧ୍ୟତାମୂଳକ ନଚେତ୍ ପ୍ରବେଶକୁ ବାରଣ କରାଯାଇଛି । ସାମାଜିକ ଦୂରତା ଓ ଶାରିରୀକ ଦୂରତା ୨ ଜଣ ବ୍ୟକ୍ତିଙ୍କ ମଧ୍ୟରେ ଅନ୍ତତଃ ୬ ଫୁଟ ବ୍ୟବଧାନ ରହିବ । ପ୍ରବେଶ ପଥରେ ନିୟମିତ ହାତ ଧୋଇବାର ବ୍ୟବସ୍ଥା ରହିବ । ଦର୍ଶନ ନିମନ୍ତେ ଜନସାଧାରଣଙ୍କୁ ଗୋଟିଏ ବ୍ୟାଚ ପରେ ଆଉ ଗୋଟିଏ ବ୍ୟାଚକୁ ପ୍ରବେଶ କରିବାକୁ ଅନୁମତି ଦିଆଯିବ । ଏହି ବ୍ୟାଚରେ କେତେ ଲୋକ ରହିବେ ତାହା ସ୍ଥାନୀୟ ପରିଚାଳନା କମିଟି ସ୍ଥିର କରିବ । ଶୈଳଶ୍ରୀକ୍ଷେତ୍ର ଜଗନ୍ନାଥ ମନ୍ଦିର ଅନୁଗୋଳକୁ ଥରକେ ୫୦ ଜଣ ଦର୍ଶନାର୍ଥୀଙ୍କୁ ପ୍ରବେଶ ନିମନ୍ତେ ଅନୁମତି ଦିଆଯାଇଛି । ଦର୍ଶନାର୍ଥୀ ମାନଙ୍କର ପ୍ରବେଶ ମୁଖ୍ୟ ଫାଟକ ( ସିଂହଦ୍ଵାର ) ଦେଇ ପ୍ରବେଶ କରିବାକୁ ଅନୁମତି ଦିଆଯାଇଛି । ଅନ୍ୟ ସମସ୍ତ ଧାର୍ମିକ ଅନୁଷ୍ଠାନ ପାଇଁ ୨୦ ଜଣ ଲେଖାଏଁ ଦର୍ଶନାର୍ଥୀଙ୍କୁ ମୁଖ୍ୟ ଫାଟକ ଦେଇ ପ୍ରବେଶ କରିବାକୁ ଅନୁମତି ଦିଆଯାଇଛି । ଅନ୍ୟ କୌଣସି ବାଟ ଦେଇ ଦର୍ଶନାର୍ଥୀମାନେ ପ୍ରବେଶ କରିପାରିବେ ନାହିଁ । ମନ୍ଦିର ପ୍ରବେଶ ନିମନ୍ତେ ଶାନ୍ତି ଶୃଖଳା ବଜାୟ ରଖିବାକୁ ଆରକ୍ଷୀ ଅଧିକ୍ଷକ ଶ୍ରୀ ଜଗମୋହନ ମୀନାଙ୍କ ନିର୍ଦ୍ଦେଶକ୍ରମେ ସମସ୍ତ ଭାରାପ୍ରାପ୍ତ ଥାନା ଅଧିକାରୀମାନଙ୍କୁ ଆବଶ୍ୟକ ପୋଲିସ ମୃତୟନ ନିମନ୍ତେ ଜଣାଇ ଦିଆଯାଇଛି । ଧାର୍ମିକ ଅନୁଷ୍ଠାନ ଓ ପୂଜାସ୍ଥଳୀରେ ଛେପ ପକାଇବା ଉପରେ ବାରଣ କରାଯାଇଛି । ଏହାର ଅବମାନନା କଲେ ଆଇନ୍ ଅନୁଯାୟୀ ଦଣ୍ଡିତ ହେବେ । ୬୫ ବର୍ଷରୁ ଉର୍ଦ୍ଧ ବ୍ୟକ୍ତି , ବହୁବିଧ ରୋଗରେ ପିଡିତ ବ୍ୟକ୍ତି , ଗର୍ଭବତୀ ମହିଳା ଓ ୧୦ ବର୍ଷରୁ କମ୍ ପିଲାମାନଙ୍କ ସୁରକ୍ଷା ନିମନ୍ତେ ଜନଗହଳିପୂର୍ଣ୍ଣ ସ୍ଥାନ ଗୁଡିକରେ ସେମାନଙ୍କ ଯିବାକୁ ବାରଣ କରାଯାଇଛି । ଧାର୍ମିକ ଅନୁଷ୍ଠାନ ଗୁଡିକରେ କୋଭିଡ ନିୟମକୁ ମାନି ଶାନ୍ତି ଓ ଶୃଙ୍ଖଳାର ସହିତ ଦର୍ଶନ କରିବାକୁ ଜିଲ୍ଲାପାଳ ପରାମର୍ଶ ଦେଇଛନ୍ତି । କୌଣସି ବ୍ୟକ୍ତି ଏହି ନିୟମକୁ ଉଲ୍ଲଙ୍ଘନ କଲେ ସରକାରଙ୍କ ଦ୍ଵାରା ପ୍ରଣୀତ ଆଇନ୍ ଅନୁଯାୟୀ ଦଣ୍ଡିତ ହେବେ ।