ଅନୁଗୁଳ – ଅନୁଗୁଳ ଜିଲ୍ଲା ଦେଇ ଯାଇଥିବା ୫୫ ନମ୍ବର ଜାତୀୟ ରାଜପଥର ଅବସ୍ଥା ଅତି ଶୋଚନୀୟ ହୋଇପଡ଼ିଛି ।  ଏହି ରାସ୍ତାରେ ଯାତାୟତ କରିବା ପାଇଁ ଲୋକମାନେ ଭୟ କରୁଛନ୍ତି । ଏହାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ  କରଛନ୍ତି ଅନୁଗୁଳ ଓକିଲ ସଂଘ । ଏହି ଜାତୀୟ ରାଜପଥ ନେଇ ଆଲୋଚନା କରିବାକୁ ଆଜି ସଂଘ ପକ୍ଷରୁ ଏକ ଜରୁରୀ ବୈଠକ କରାଯାଇଥିଲା । ସଂଘ ସଭାପତି ଦିଲୀପ କୁମାର ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ୨ ଶହରୁ ଅଧିକ ଓକିଲ ଯୋଗ ଦେଇଥିଲେ । ଜାତୀୟ ରାଜପଥର ଏମିତି ଅବସ୍ଥା ନେଇ ଶୃଙ୍ଖଳିତ ଭାବେ ଆନ୍ଦୋଳନ କରିବାକୁ ବୈଠକରେ ନିଷ୍ପତ୍ତି ହୋଇଥିଲା । ଆସନ୍ତା ୨୪ ତାରିଖରେ ଜାତୀୟ ରାଜପଥକୁ ୬ ଘଣ୍ଟା ପାଇଁ ଅବରୋଧ କରାଯିବ । ସକାଳ ୬ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଅନୁଗୁଳ ଦେଇ ଯାଇଥିବା ଜାତୀୟ ରାଜପଥକୁ ବନ୍ଦ କରାଯିବ । ୨୫ ତାରିଖ ଅପରାହ୍ନରେ ସଂଘର ସାଧାରଣ ବୈଠକ କରାଯାଇ ପରବର୍ତ୍ତୀ ନିଷ୍ପତ୍ତି ନେଇ ଆଲୋଚନା କରାଯିବ । ଆନ୍ଦୋଳନ ସମୟରେ ଜରୁରୀ ସେବା ଯେମିତି ବାଧାପ୍ରାପ୍ତ ହେବନି ସେ ଦିଗରେ ଧ୍ୟାନ ଦିଆଯିବ ବୋଲି ଓକିଲ ସଂଘ ପକ୍ଷରୁ କୁହା ଯାଇଛି ।