ଅନୁଗୁଳ – ଅନୁଗୁଳ ଦେଇ ଯାଇଥିବା ଜାତୀୟ ରାଜପଥ-୫୫ର ସଦର ଥାନା ମୁଷାପାପୁଲିଠାରେ ଏକ ମର୍ମନ୍ତୁତ ଦୁର୍ଘଟଣାରେ ଜଣେ ଯୁବକଙ୍କ ମୃତ୍ୟୁ ହୋଇଛି । ଏହା ସହ ଅନ୍ୟ ଜଣେ ଗୁରୁତର ହୋଇଛନ୍ତି । ସୂଚନା ଅନୁସାରେ ଅନୁଗୁଳ ବ୍ଲକ ରନ୍ତଲେଇ ପଞ୍ଚାୟତ ହରିବେରେଣୀ ଗ୍ରାମରେ ଆଜି ଏକ ମଘମେଳା ଆୟୋଜିତ ହୋଇଥିଲା । ଏହି ମେଳା ପାଇଁ ଆବଶ୍ୟକ ସାମଗ୍ରୀ କିଣିବାକୁ ଗ୍ରାମର ସେହି ଗାଁର ଗୋଗୁଲ ନାଏକ ଓ ଶୁକ୍ର ନାଏକ ଆଜି(ରବିବାର) ଦିନ ପ୍ରାୟ ୨ ବେଳେ ନିଜ ଗାଁରୁ ଏକ ମୋଟରସାଇକେଲ ଯୋଗେ ଅନୁଗୁଳ ଅଭିମୁଖେ ଯାଉଥିଲେ । ତେବେ ରନ୍ତଲେଇ ପାଞ୍ଜିଆ ବନ୍ଧ ନିକଟରେ ତାଙ୍କ ମୋଟରସାଇକେଲକୁ କପିଧ୍ୱଜ ନାମକ ଏକ ବସ (ଓଆର-୧୩-୧୫୬୭) ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ଉଭୟ ମୋଟରସାଇକେଲ ଆରୋହି ଗୁରୁତର ହୋଇପଡିଥିଲେ । ଆମ୍ବୁଲାନ୍ସ ଯୋଗେ ଉଭୟଙ୍କୁ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେବା ବାଟରେ ଗୋଗୁଲଙ୍କ ମୃତ୍ୟୁ ଘଟିଥିବା ବେଳେ ଶୁକ୍ରଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ସ୍ଥାନାନ୍ତର କରା ଯାଇଛି । ଏହି ଦୁର୍ଘଟଣା ଯୋଗୁଁ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖା ଦେଇଥିଲା । ପ୍ରାୟ ଘଣ୍ଟାଏ ସମୟ ୫୫ ନମ୍ବର ଜାତୀୟ ରାଜପଥକୁ ସ୍ଥାନୀୟ ଲୋକ ଅବରୋଧ କରିଥିଲେ । ଫଳରେ  ଶହଶହ ଗାଡି ରାସ୍ତାର ଉଭୟ ପାର୍ଶ୍ଵରେ ଅଟକି ରହିଥିଲା । ପରେ ଅନୁଗୁଳ ସଦର ଥାନା ଆଇଆଇସି ପ୍ରଭାତ ତ୍ରିପାଠୀ ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତାରୋକ ହଟିଥିଲା ।