ଅନୁଗୁଳ – ଅନୁଗୁଳ ସହର ଉପକଣ୍ଠ କଳ୍ପତରୁ ହୋଟେଲ ପାଖ ଦେଇ ଯାଉଥିବା ବେଳେ ଦୁଇ ଯୁବ ବନ୍ଧୁ ଚନ୍ଦନ କୁମାର ସାହୁ ଓ କମଳକାନ୍ତ ସାହୁଙ୍କୁ ରାସ୍ତାରୁ ଏକ ପର୍ସ ମିଳିଥିଲା । ପର୍ସରେ ଜଣେ ଯୁବକଙ୍କ ଆଧାର କାର୍ଡ, ଏଟିଏମ ଓ ଡ୍ରାଇଭିଂ ଲାଇସେନ୍ସ ସହ କିଛି ଟଙ୍କା ଥିବା ଉଭୟ ଦେଖିଥିଲେ । ଏହା ଦେଖି ସେମାନେ ଅନୁଗୁଳ ଥାନାକୁ ଯାଇ ସମସ୍ତ ଜରୁରୀ କାଗଜପତ୍ର ସମେତ ପର୍ସତିକୁ ପୁଲିସର ଜିମା ଦେଇଛନ୍ତି । ହଜିଥିବା ଡକ୍ୟୁମେଣ୍ଟ ଗୁଡିକ ହେଉଛି ଆଠମଲ୍ଲିକ ଅନ୍ତର୍ଗତ ଠାକୁରଗଡ଼ ଥାନା ଖଜୁରିଯୋଡ଼ା ଗ୍ରାମର ରଞ୍ଜିତ ରାଉତଙ୍କର ବୋଲି ଜଣା ପଡିଛି । ପର୍ସ ହଜିଥିବା ଯୁବକ ଜଣଙ୍କୁ ଖବର ଦେଇ ଏହି ଡକ୍ୟୁମେଣ୍ଟ ଗୁଡିକ ପ୍ରଦାନ କରିବାକୁ ପୁଲିସକୁ ଦୁଇ ଯୁବ ବନ୍ଧୁ ଅନୁରୋଧ କରିଛନ୍ତି ।