ଅନୁଗୁଳ – ଅନୁଗୁଳ ସହର ଶିକ୍ଷକପଡ଼ା ଇକୋ ପାର୍କ ସମ୍ମୁଖରେ ଥିବା ଏକ ଗ୍ୟାସ ଷ୍ଟୋଭ ମରାମତି ଦୋକାନରେ ଆଜି (ବୁଧବାର) ସନ୍ଧ୍ୟା ବେଳେ ଅଗ୍ନିକାଣ୍ଡ ଘଟି ଦୋକାନଟି ସମ୍ପୂର୍ଣ୍ଣ ଜଳି ଯାଇଛି । ଗ୍ୟାସ ଟାଙ୍କି ଫିଲିଙ୍ଗ ବେଳେ ଅଗ୍ନିକାଣ୍ଡ ହୋଇଥିବା ସନ୍ଦେହ କରା ଯାଉଛି । ଖବର ପାଇ ଅନୁଗୁଳ ଅଗ୍ନିଶମ ବିଭାଗର ତିନୋଟି ଗାଡ଼ି ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ଅଗ୍ନିକାଣ୍ଡ ଏତେ ଭୟଙ୍କର ଥିଲା ଯେ ସେହି ରାସ୍ତା ଦେଇ ଏକ ଘଣ୍ଟା ଯିବା ଆସିବା ବନ୍ଦ ହୋଇ ଯାଇଥିଲା । ଇକୋ ପାର୍କ ଯୋଗୁଁ ସବୁଦିନ ସେଠାରେ ଲୋକଙ୍କ ଭିଡ ଜମିଥାଏ । ଜନ ଗହଳି ପୂର୍ଣ୍ଣ ସ୍ଥାନରେ ଏଭଳି ଅଗ୍ନିକାଣ୍ଡ ଯୋଗୁଁ ଲୋକ ଭୟଭୀତ ହୋଇ ଯାଇଥିଲେ । ଗ୍ୟାସ ଦୋକାନରେ ଥିବା ଛୋଟ ଗ୍ୟାସ ଟାଙ୍କି ସବୁ ଢୋ ଢୋ ହୋଇ ଫୁଟି ଏକ ଭୟଙ୍କର ପରିସ୍ଥିତି ସୃଷ୍ଟି କରିଥିଲା । ଦମକଳ ଠିକ୍ ସମୟରେ ପହଞ୍ଚି ନଥିଲେ ସମ୍ପୂର୍ଣ୍ଣ ମାର୍କେଟକୁ ମଧ୍ୟ ବ୍ୟାପି ଯାଇଥାନ୍ତା । ଅଗ୍ନିକାଣ୍ଡରେ ଦୋକାନଟି ସଂପୂର୍ଣ୍ଣ ଜଳି ଯାଇଥିବା ବେଳେ ଏକ ସାଇକେଲ , ଗୋଟିଏ ସ୍କୁତି ମଧ୍ୟ ଜଳି ଯାଇଛି ।
Advertisement
