ଗୁଳିବିଦ୍ଧ ହାତୀର ମୃତଦେହ ଉଦ୍ଧାର

ଅନୁଗୋଳ – ଅନୁଗୋଳ ଜିଲା ସାତକୋଶିଆ ଡିଭିଜନର ଜିଲିଣ୍ଡା ରେଞ୍ଜ , କଟରଙ୍ଗ ସେକ୍ସନ, ବାଙ୍କଧର ଅଞ୍ଚଳରେ ଦନ୍ତା ହାତୀର ଗଳିତ ମୃତ ଦେହ ଉଦ୍ଧାର ହୋଇଛି । କିଛିଦିନ ପୂର୍ବରୁ ଏହି ହାତୀର ମୃତ୍ୟୁ ହୋଇଥିବା ବେଳେ ହାତୀ ଦେହରେ ଗୁଳି ବାଜିଥିବା ମଧ୍ଯ ଜଣା ପଡ଼ିଛି । ଗତ କିଛି ଦିନ ତଳୁ ଏକ ପଡିଆରେ ହାତୀଟିର ମୃତ୍ଯୁ ହୋଇଥିବା ବେଳେ ପଚି ସଢ଼ି ଗନ୍ଧ ହେବାରୁ ଗତକାଲି ବନ ବିଭାଗ ହାତୀ ମରିଥିବା ଜାଣି ପାରିଥିଲା । ଆଜି ସାତକୋଶିଆ ଡିଏଫଓ ସରୋଜ ପଣ୍ଡା ସଦଳବଳେ ଘଟଣା ସ୍ଥଳରେ ପହଂଚି ହାତୀର ବ୍ଯବଛେଦ କରି ତଦନ୍ତ ଆରମ୍ଭ କରିଛନ୍ତି । ହାତୀ ଦେହରେ ଅନେକ ଦିନ ପୁର୍ବରୁ ଛେରା ବନ୍ଧୁକର ଗୁଳି ବାଜିଥିବା ବେଳେ ଏଥିପାଇଁ ହାତୀର ମୃତ୍ଯୁ ହୋଇ ନାହିଁ ବୋଲି ସାତକୋଶିଆ ଡିଏଫଓ ସରୋଜ ପଣ୍ଡା କହିଛନ୍ତି । ଶବ ବ୍ୟବଛେଦ ପରେ ମୃତ୍ଯୁର କାରଣ ଜଣା ପଡିବ ସେ କହିଥିବା ବେଳେ ଅଂଶୁଘାତ ଜନିତ ମୃତ୍ଯୁ ହୋଇଥାଇ ପାରେ ବୋଲି ସନ୍ଦେହ କରା ଯାଉଥିବା ସେ କହିଛନ୍ତି ।

Advertisement