ଶେଷ ଦିନରେ ୧୩ ଜଣ ଦାଖଲ କଲେ ନାମାଙ୍କନ ପତ୍ର

ଅନୁଗୁଳ – ସାଧାରଣ ନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଚାଲିଥିବାବେଳେ ଆଜି ନାମାଙ୍କନ ପତ୍ର ଦାଖଲର ଶେଷ ଦିନରେ ଅନୁଗୁଳ ଜିଲ୍ଲାର ସମସ୍ତ ନିର୍ବାଚନ ମଣ୍ଡଳୀରୁ ୧୩ ଜଣ ନାମାଙ୍କନ ପତ୍ର ଦାଖଲ କରିଛନ୍ତି । ଛେଣ୍ଡିପଦା ବିଧାନସଭା କ୍ଷେତ୍ର ପାଇଁ କଂଗ୍ରେସ ଦଳର ନରୋତ୍ତମ ନାଏକ ନାମାଙ୍କନପତ୍ର ଦାଖଲ କରିଥିଲେ । ସେ ତାଙ୍କ ଶତାଧିକ ସମର୍ଥକଙ୍କ ଗହଣରେ ଶୋଭାଯାତ୍ରାରେ ଉପ-ଜିଲ୍ଲାପାଳଙ୍କ ଅଫିସରେ ପହଞ୍ଚି ନିଜର ପ୍ରାର୍ଥୀପତ୍ର ଦାଖଲ କରିଥିଲେ । ସେହିଭଳି ଅନୁଗୁଳ ବିଧାନସଭା କ୍ଷେତ୍ର ପାଇଁ ବିଜେଡ଼ିର ସଂଯୁକ୍ତା ସିଂ ନାମାଙ୍କନ ପତ୍ର ଦାଖଲ କରିଛନ୍ତି । ସେ ନିଜର ହଜାର ହଜାର ସମର୍ଥକଙ୍କ ସହ ପ୍ରଥମେ ମା ଲୋଭୀ ଠାକୁରାଣୀଙ୍କ ଦର୍ଶନ କରି ମୋଟରସାଇକେଲ ଶୋଭାଯାତ୍ରାରେ ଅନୁଗୁଳ ଆସିଥିଲେ । ଏଠାରେ ମା ବୁଢୀ ଠାକୁରାଣୀ ଓ ଜଗନ୍ନାଥନଅକା ଆଶିଷ ଲାଭ ପରେ ବିରାଟ ଶୋଭାଯାତ୍ରାରେ ଉପ ଜିଲ୍ଲାପାଳଙ୍କ ଅଫିସକୁ ଆସିଥିଲେ । ତାଙ୍କ ସହିତ ଶୋଭାଯାତ୍ରାରେ ଢେଙ୍କାନାଳ ସଂସଦୀୟ କ୍ଷେତ୍ର ପାଇଁ ବିଜେଡ଼ିର ସାଂସଦ ପ୍ରାର୍ଥୀ ଅବିନାଶ ସାମଲ, ଅନୁଗୁଳ ଜିଲ୍ଲା ବିଜେଡ଼ି ସହ ପର୍ଯ୍ୟବେକ୍ଷକ କୁନ ବିହାରୀ ଦାସ, ବିଧାୟକ ରଜନୀକାନ୍ତ ସିଂହ ସହ ଦଳର ବରିଷ୍ଠ ନେତାଗଣ ସାମିଲ ହୋଇଥିଲେ । ଆଜିର ପ୍ରାର୍ଥୀପତ୍ର ଦାଖଲ ସମୟରେ ବିଜେଡି ନିଜର ଶକ୍ତି ପ୍ରଦର୍ଶନ କରିଥିବା ଦେଖିବାକୁ ମିଳିଥିବାବେଳେ ବିଜେଡି ହିଁ ଏହି ଅଞ୍ଚଳର ବିକାଶ କରିପାରିବ ବୋଲି ଉଭୟ ସାଂସଦ ପ୍ରାର୍ଥୀ ଓ ବିଧାୟିକା ପ୍ରାର୍ଥୀନୀ କହିବା ସହ ଜନସାଧାରଣଙ୍କ ଆଶୀର୍ବାଦ ମାଗିଥିଲେ । ଅନ୍ୟପଟେ ଆଜି ପୁଣି ଅନୁଗୁଳରୁ ଅମ୍ବିକା ଭଟ୍ଟ ଆଉ ଏକ ସେଟ ପ୍ରାର୍ଥୀପତ୍ର ଦାଖଲ କରିଥିବା ବେଳେ ବାବୁଲା ସାହୁ ସ୍ଵାଧୀନ ଭାବେ ନାମାଙ୍କନ ପତ୍ର ଦାଖଲ କରିଛନ୍ତି । ପାଲଲହଡାରେ ସ୍ଵାଧୀନ ଭାବେ ଯୁଗଳ କିଶୋର ଜିତ ଓ କଂଗ୍ରେସର ଫକିର ମୋହନ ସାମଲ ନାମାଙ୍କନ ପତ୍ର ଦାଖଲ କରିଛନ୍ତି । ତାଳଚେରର ପ୍ରଫୁଲ ଆସ କଂଗ୍ରେସ ପକ୍ଷରୁ , ଭୁପେନ ଥମ୍ବ ସ୍ଵାଧୀନ ଭାବେ , ବ୍ରଜ କିଶୋର ପ୍ରଧାନ ବିଜେଡ଼ିରୁ , ଆର କୁମାର ପାଣି ସ୍ଵାଧୀନ ଭାବେ ଓ ବିଜଯ କୁମାର ନାଏକ ଆମ୍ବେଦକର ପାର୍ଟି ଅଫ ଇଣ୍ଡିଆ ରୁ ପ୍ରାର୍ଥୀ ପତ୍ର ଦାଖଲ କରିଛନ୍ତି । ଛେଣ୍ଡିପଦା ବିଜେଡି ପକ୍ଷରୁ ସୁଶାନ୍ତ ବେହେରା ମଧ୍ୟ ଆଉ ଏକ ସେଟ ପ୍ରାର୍ଥୀପତ୍ର ଦାଖଲ କରିଛନ୍ତି । ସେପଟେ ଆଠମଲ୍ଲିକରେ ବିଜେପି ପକ୍ଷରୁ ସଂଜୀବ ସାହୁ  ଓ କଂଗ୍ରେସ ପକ୍ଷରୁ ହିଂମାଶୂ ଶେଖର ଚାଉଳିଆ ପ୍ରାର୍ଥୀପତ୍ର ଦାଖଲ କରିଛନ୍ତି । ତେବେ ଚଳିତ ବର୍ଷ ଜିଲ୍ଲାରେ ୩୪ ଜଣ ପ୍ରାର୍ଥୀ ନାମାଙ୍କନ କରିଛନ୍ତି । ତାଳଚେର ନିର୍ବାଚନ ମଣ୍ଡଳୀରେ ୧୦ ଜଣ , ଅନୁଗୁଳ ନିର୍ବାଚନ ମଣ୍ଡଳୀରେ ୮ ଜଣ , ଛେଣିପଦା ରେ ୪ ଜଣ ପାଳଲହଡାରେ ୮ ଜଣ ଓ ଆଠମଲ୍ଲିକରେ ୪ ଜଣ ପ୍ରାର୍ଥୀପତ୍ର ଦାଖଲ କରିଛନ୍ତି ।

Advertisement