କାମ କରୁ ନାହିଁ ‘ଅନୁଗୁଳ ବନସାଥୀ ଆପ – ପାଣିରେ ପଡିଲା ଲକ୍ଷାଧିକ ଟଙ୍କା

ଅନୁଗୁଳ – ଅନୁଗୁଳ ଜିଲ୍ଲାରେ ହାତୀ ମଣିଷ ଲଢେଇକୁ ରୋକିବା ସହ ବନବିଭାଗର ଲୋକମାନଙ୍କ ସହ ସମ୍ପର୍କକୁ ଦ୍ଵିଗୁଣିତ କରିବାକୁ ଆରମ୍ଭ ହୋଇଥିଲା  ‘ଅନୁଗୁଳ ବନସାଥୀ ଆପ‘ । ଲୋକଙ୍କ ସୁରକ୍ଷା ଦୃଷ୍ଟିକୁ ଦେଖି ଏହି ଆପ ଶୁଭାରମ୍ଭ କରାଯାଇଥିବା ବେଳେ ଏହି  ‘ଆପ‘ ଏବେ କାମ କରୁ ନାହିଁ । ଫଳରେ ଏହି ଆପ ପାଇଁ ଖର୍ଚ୍ଚ ହୋଇଥିବା ଟଙ୍କା ପାଣିରେ ପଡିଲା ଭଳି ଲାଗୁଛି ।

ସୂଚନା ଅନୁସାରେ ଅନୁଗୁଳ ଜିଲ୍ଲାରେ ଦୀର୍ଘ ଦିନ ହେବ ହାତୀ-ମଣିଷଙ୍କ ଲଢେଇ ଭିତରେ କେତେବେଳେ ହାତୀଙ୍କ ଜୀବନ ଯାଉଛି ତ କେତେବେଳେ ନିରୀହ ମଣିଷଙ୍କ ଜୀବନ ବାଜିରେ ଲାଗୁଛି । ଏହା ସହ ବ୍ୟାପକ ଫସଲ ମଧ୍ୟ ହାନି ହେଉଛି । ଏହାକୁ ଦୃଷ୍ଟିରେ ରଖି  ଅନୁଗୁଳ ବନଖଣ୍ଡ ତରଫରୁ ନୂତନ ଭାବେ ଆରମ୍ଭ ହୋଇଥିଲା ‘ଅନୁଗୁଳ ବନସାଥୀ ଆପ‘ । ଏହି ଆପ ମୋବାଇଲରେ ଡାଉନଲୋଡ କରିବା ପରେ ଲୋକଙ୍କୁ ବନ୍ୟପ୍ରାଣୀଙ୍କ ଚଳପ୍ରଚଳ ବିଷୟରେ ତଥ୍ୟ ଦେବ ବୋଲି ପ୍ରସ୍ତୁତ ହୋଇଥିଲା । ଅନଲାଇନ ମାଧ୍ୟମରେ ଗୁଗୁଲ ପ୍ଲେ ଷ୍ଟୋରକୁ ଯାଇ ‘ଅନୁଗୁଳ ବନ ସାଥୀ‘ ଲେଖିବା ପରେ ଏହି ଆପ ଦେଖା ଦେଉଥିଲା ଏବଂ ଏହି ଆପକୁ ଡାଉନଲୋଡ଼ ବା ଇନଷ୍ଟଲ କରା ଯାଊଥିଲା । ପରେ ପ୍ରଥମେ ଓଡ଼ିଆ ଓ ଇଂରାଜୀ ଅପସନ ଆସିବା ପରେ ନିଜର ନାମ ଓ ମୋବାଇଲ ନମ୍ବର ଦେବା ସହ କେଉଁ ଅର୍ଥରେ ଏହାକୁ ଉପଯୋଗ କରିବେ ସେ ନେଇ ମଧ୍ୟ ଏକ ଖାଲି ସ୍ଥାନ ପୂରଣ ପାଇଁ ନିର୍ଦେଶ ଥିଲା । ନିଜର ନାମ, ଫୋନ ନମ୍ବର ଓ କେଉଁ ଅର୍ଥରେ ବ୍ୟବହାର କରିବେ ସେ ନେଇ ସୂଚନା ଦେବା ପରେ ଅନ୍ୟ ଏକ ପେଜରେ ପ୍ରାଣୀ ମାନଙ୍କ ବିଷୟରେ ସୂଚନା, ବିହନ ଓ ଅନ୍ୟାନ୍ୟ ଅଭିଯୋଗ ଏହି ଭଳି ୩ଟି ପର୍ଯ୍ୟାୟ ରହିଥିଲା । ଯାହାକି ଲୋକଙ୍କ ବେଶ ସହାୟକ ହେବ ବୋଲି ଚିନ୍ତା କରା ଯାଇଥିଲା । ଅନୁଗୁଳ ବନଖଣ୍ଡ ତରଫରୁ ୧୦ଲକ୍ଷ ଟଙ୍କା ବ୍ୟୟବରାଦ କରି ଏହାକୁ ତିଆରି କରାଯାଇଥିଲା । ଏହି ଆପକୁ ଗୁଗୁଲ ପ୍ଲେ ଷ୍ଟୋରରୁ ଅନେକ ଲୋକେ ଡାଉନଲୋଡ଼ କରିଥିଲେ । କାରଣ ଏହି ଆପ ହାତୀ ମାନଙ୍କ ଚଳପ୍ରଚଳର ସୂଚନା ଆଦାନପ୍ରଦାନ କରିବା ସହ ବିଭିନ୍ନ ଚାରା ନେବା ପାଇଁ ଆବେଦନ ଏବଂ ଜଙ୍ଗଲ ଓ ଗଛ ସମ୍ବନ୍ଧୀୟ ଅଭିଯୋଗ ମଧ୍ୟ କରିବାର ବ୍ୟବସ୍ଥା କରା ଯାଇଥିଲା । ପ୍ରଥମେ ଏହି ‘ଆପ‘କୁ ବ୍ୟବହାର ବେଳେ ସମସ୍ୟା ଦେଖା ଦେଇଥିଲା । ଏହି ‘ଆପ‘କୁ ଇନଷ୍ଟଲ କଲା ମାତ୍ରେ ମୋବାଇଲରୁ ଆଖି ପିଛୁଳାକେ ସମସ୍ତ ଡାଟା ଉଭାନ ହୋଇଯାଇଥିଲା । ମୋବାଇଲ ଗ୍ୟାଲେରି ବାକ୍ସରେ ଥିବା ସମସ୍ତ ଫୋଟ ଭିଡିଓ ସତେ ଯେମିତି କୁଆଡେ ଉଭେଇ ଯାଉଥିଲା । ଅନେକ ମୋବାଇଲ ସମ୍ପୂର୍ଣ୍ଣ ହ୍ୟାଙ୍ଗ ହୋଇଯାଉଥିବା ମଧ୍ୟ ଦେଖା ଯାଇଥିଲା । ଲୋକଙ୍କ ହିତରେ ପ୍ରସ୍ତୁତ କରାଯାଇଥିବା ଏହି ‘ଆପ‘ କ୍ଷତି ପହଞ୍ଚାଇଥିଲା । ପରେ ସେଇ ସମସ୍ୟାର ସୁଧାର ମଧ୍ୟ ଅଣାଯାଇଥିଲା । ତେବେ ଏ ସବୁରି ଭିତରେ ଏହି  ‘ଅନୁଗୁଳ ବନସାଥୀ ଆପ‘ ଏବେ ରୋଗୀଣା ହୋଇ ପଡିଛି । ଏହି ଆପ ଏବେ ଆଉ କାମ କରୁ ନାହିଁ ବୋଲି ଅନେକ ଲୋକ ଅଭିଯୋଗ କରିଛନ୍ତି । ବର୍ଷା ଋତୁ ଆରମ୍ଭ ଯୋଗୁଁ ଅନେକ ଲୋକ ମଞ୍ଜି କିମ୍ବା ଚାରା ସମ୍ବନ୍ଧୀୟ ତଥ୍ୟ ପାଇଁ ଏହି ଖୋଲିଲା ବେଳକୁ ଏହା ଆଉ ଖୋଲୁ ନଥିବା ଦେଖିବାକୁ ମିଳିଛି । ଅନ୍ୟପଟେ ହାତୀ ଚଳପ୍ରଚଳ ତଥ୍ୟ ଏହି ଆପ ରୁ ମିଳୁ ମଧ୍ୟ ନାହିଁ । ଫଳରେ ହାତୀ ହାବୁଡରେ ଅନେକ ସମୟରେ ଲୋକ ପଡ଼ୁଛନ୍ତି ଓ ଫସଲ ହାନି ମଧ୍ୟ ହେଉଛି । ଏହି ଆପ ନିର୍ମାଣ ଓ ଏହାର ବିକାଶ ଦିଗରେ ଖର୍ଚ୍ଚ ହୋଇଥିବା ସମସ୍ତ ଅର୍ଥ ଚଳୁ ହୋଇଥିବା ନେଇ ସାଧାରଣ ଲୋକଙ୍କ ମହଲରେ ଆଲୋଚନାର ବିଷୟ ପାଲଟିଛି ।