ଅନୁଗୁଳ – ଅନୁଗୁଳ ସହରର ଏକ ଘରୋଇ ନର୍ସିଙ୍ଗ ହୋମ ଆଗରେ ଥିବା କ୍ରାଡେଲ ବେବି ପଏଣ୍ଟରୁ ଏକ ନବଜାତ ଶିଶୁପୁତ୍ର ଉଦ୍ଧାର ହୋଇଛି । ସେଠାରେ ନବଜାତ ଶିଶୁଟି କାନ୍ଦୁ ଥିବା ଦେଖି ନର୍ସିଙ୍ଗ ହୋମର ଡାକ୍ତର ଜିଲ୍ଲା ଶିଶୁ ସୁରକ୍ଷା ଅଧିକାରୀଙ୍କୁ ସୂଚନା ଦେଇଥିଲେ । ଖବର ପାଇ ଜିଲ୍ଲା ଶିଶୁ ସୁରକ୍ଷା ଅଧିକାରୀ ଗୌରି ଶଙ୍କର ବେହେରା ତୁରନ୍ତ ସେଠାରେ ପହଞ୍ଚି ସ୍ବତନ୍ତ୍ର ପୋଷ୍ୟ ସନ୍ତାନ ଗ୍ରହଣ କେନ୍ଦ୍ର ଅନୁଗୁଳର ମ୍ୟାନେଜର ସୁଦର୍ଶନ ପରିଡାଙ୍କୁ ଫୋନ ଯୋଗେ ଡ଼ାକିଥିଲେ । ସେ ତାଙ୍କ ଆୟା ସହିତ ଉକ୍ତ ସ୍ଥାନରେ ପହଞ୍ଚି ଶିଶୁଟିକୁ ଗ୍ରହଣ କରିଥିଲେ । ଶିଶୁଟିକୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା । ଶିଶୁର ସ୍ବାସ୍ଥ୍ୟବସ୍ଥା ଭଲ ଥିବାର ଗୌରି ଶଙ୍କର ବେହେରା କହିଛନ୍ତି । ଏହାପରେ ଶିଶୁଟିକୁ ଶିଶୁ ମଙ୍ଗଳ ସମିତିରେ ଉପସ୍ଥାପନ କରାଯାଇ ଶିଶୁଟିକୁ ବର୍ତମାନ ସ୍ବତନ୍ତ୍ର ପୋଷ୍ୟ ସନ୍ତାନ ଗ୍ରହଣ କେନ୍ଦ୍ର, ଅନୁଗୁଳରେ ରଖାଯାଇଅଛି । ଏହାପରେ ଆଇନ ଅନୁଯାୟୀ ଶିଶୁର ପରବର୍ତୀ ଥଇଥାନ ବ୍ୟବସ୍ଥା କରାଯିବ ବୋଲି ଶିଶୁ ସୁରକ୍ଷା ଅଧିକାରୀ କହିଛନ୍ତି । ଅନେକ ସମୟରେ ନବଜାତ ଶିଶୁ ମାନଙ୍କୁ ଫୋପାଡ଼ି ଦିଆ ଯାଉଥିବା ଭଳି ଅଭାବନୀୟ ଘଟଣା ଦେଖିବାକୁ ମିଳିଥାଏ । ଏହାକୁ ବନ୍ଦ କରିବା ପାଇଁ ଅନୁଗୁଳ ଜିଲ୍ଲା ପ୍ରଶାସନ ବିଭିନ୍ନ ଶିଶୁ ଥଇଥାନ ସେଣ୍ଟର ହେଉ କିମ୍ବା ନର୍ସିଂହୋମ ଗୁଡିକରେ ବେବି କ୍ରେଡ଼ଲ ସେଣ୍ଟର ଖୋଲା ଯାଇଥିଲା । ଯେଉଁଠି ଜନ୍ମଦାତା ବାପାମାଆ ଶିଶୁକୁ ଏଣେତେଣେ ନ ରଖି ସୁରକ୍ଷିତ ନିରାପଦ ସ୍ଥାନରେ ରଖି ପାରିବେ । ଯାହାଦ୍ବାରା ଅଭିଭାବକଙ୍କ ପରିଚୟ ଗୋପନ ରହିବା ସହିତ ଶିଶୁଟି ସୁରକ୍ଷିତ ଅବସ୍ଥାରେ ଉଦ୍ଧାର କରାଯାଇ ପାରିବ ।
Advertisement
