ଅନୁଗୁଳ – ଅନୁଗୁଳ ଜିଲ୍ଲା ମହିଳା କଂଗ୍ରେସ କମିଟିର ସଭାନେତ୍ରୀ ସବିତା ରାଣୀ ଧୀର ଆଜି (ଶୁକ୍ରବାର) ସଭାନେତ୍ରୀ ପଦ ଏବଂ କଂଗ୍ରେସ ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି । ପ୍ରଦେଶ ମହିଳା କମିଟି ସଭାନେତ୍ରୀ ଏବଂ ରାଜ୍ୟ କଂଗ୍ରେସ କମିଟି ସଭାପତିଙ୍କୁ ସେ ତାଙ୍କ ଇସ୍ତଫା ପତ୍ର ପଠେଇଥିବା ଏକ ପ୍ରେସ ବିବୃତିରେ ଜଣାଇଛନ୍ତି । ତେବେ ସେ କଂଗ୍ରେସ ଛାଡିବା ନେଇ ଜିଲ୍ଲା କଂଗ୍ରେସ ସଭାପତି ବିପ୍ଲବ ଜେନାଙ୍କୁ ଦାୟୀ କରିଛନ୍ତି । ତାଙ୍କ କହିବା କଥା ସେ ୨୦୧୫ ମସିହାରୁ ଜିଲ୍ଲା ମହିଳା କଂଗ୍ରେସ ସଭାନେତ୍ରୀ ଭାବେ ଦାୟିତ୍ଵ ତୁଲାଇ ଆସୁଥିଲେ । ଦାୟିତ୍ଵ ପାଇବା ପର ଠାରୁ ସେ ଦଳକୁ କିଭଳି ସୁଦୃଢ କରାଯିବ ସେ ନେଇ କାର୍ଯ୍ୟ କରି ଆସୁଥିବା ବେଳେ ମହିଳା ସଙ୍ଗଠନକୁ ଅଧିକରୁ ଅଧିକ କ୍ରିୟାଶୀଳ ଓ ଓ ସଂଗଠିତ କରିବା ପାଇଁ ଚେଷ୍ଟା କରି ଆସୁଥିଲେ । ତେବେ ଲଗାତାର ଭାବେ ଜିଲ୍ଲା ସଭାପତି ବିପ୍ଲବ ଜେନାଙ୍କ ଆହେତୁକ ହସ୍ତକ୍ଷେପ ଯୋଗୁଁ ସେ କୌଣସି କାର୍ଯ୍ୟ ସୁଚାରୁ ରୂପେ କରି ପାରୁ ନଥିଲେ । ଯାହା ତାଙ୍କୁ ମାନସିକ ସ୍ତରରେ ଦୁର୍ବଳ କରିଦେବା ସହ ସଙ୍ଗଠନକୁ ମଜଭୁତ କରିବା କାର୍ଯ୍ୟ ତାଙ୍କ ପାଇଁ ଅଧିକ କଷ୍ଟସାଧ୍ୟ ହୋଇ ପଡୁଥିଲା । ବାରମ୍ବାର ଏଭଳି ହେବା ଦ୍ଵାରା ସେ ରାଜ୍ୟ କଂଗ୍ରେସ ସଭାପତି ଓ ରାଜ୍ୟ ମହିଳା ସଭାନେତ୍ରୀଙ୍କ ଦ୍ରୁଷ୍ଟି ଆକର୍ଷଣ ମଧ୍ୟ କରିଥିଲେ । ତେବେ ଦଳ ତରଫରୁ କୌଣସି ପଦକ୍ଷେପ ଗ୍ରହଣ କରା ନ ଯିବାରୁ ସେ ହତୋତ୍ସାହ ହୋଇ ଦଳର ପ୍ରାଥମିକ ସଦସ୍ୟ ପଦ ଏବଂ ବିଭିନ୍ନ ପଦପଦବୀରୁ ଇସ୍ତଫା ଦେଇଥିବା କଥା ଅନୁଗୁଳ ଅନଲାଇନକୁ ଫୋନ କରି ଜଣାଇଛନ୍ତି । ତେବେ ସେପଟେ ଜିଲ୍ଲା ସଭାପତି ବିପ୍ଲବ ଜେନାଙ୍କ କହିବା କଥା ଯେ , ସବିତା ଧୀର ଦଳ ବିରୋଧୀ କାର୍ଯ୍ୟ କରି ଆସୁଥିଲେ । ତାଙ୍କୁ ଦଳରୁ ନିଲମ୍ବନ ପାଇଁ ରାଜ୍ୟ କଂଗ୍ରେସକୁ ସୁପାରିସ କରାଯାଇଥିଲା । ତା ପୂର୍ବରୁ ଯଦି ସେ ଇସ୍ତଫା ଦେଇଛନ୍ତି ତାହାକୁ ସ୍ଵାଗତ କରା ଯାଉଛି ।
Advertisement
