ପାଠ ପଢିବାକୁ ଯାଇଥିଲେ , ଶବ ହୋଇ ଫେରିଲେ

ଅନୁଗୁଳ – ଅନୁଗୁଳ ଜିଲ୍ଲା ଛେଣ୍ଡିପଦା ବ୍ଲକ କଞ୍ଜରା ଗ୍ରାମର ଛାତ୍ର ଶୁଭ୍ରାଂଶୁ ଦେହୁରୀ (ପିପୁ) ଜେଇ ମେନ ପରୀକ୍ଷାରେ ସର୍ବଭାରତୀୟ ସ୍ତରରେ ୯୯.୩୪% ରଖି ସାରା ଜିଲ୍ଲା ପାଇଁ ଗୌରବ ଆଣିଥିଲେ । ଭବିଷ୍ୟତରେ ପ୍ରଶାସନିକ ଅଧିକାରୀ ହୋଇ ଲୋକଙ୍କ ସେବା କରିବାକୁ ମନ ବଳାଇଥିବା ଶୁଭ୍ରାଂଶୁ ଚେନ୍ନାଇରେ ରହି IIT ପାଠ ପଢୁଥିଲେ । କିଛି ଦିନ ପୂର୍ବରୁ ପ୍ରଥମ ସେମିଷ୍ଟର ପରୀକ୍ଷାରେ ଗତଥର ଅପେକ୍ଷା ସାମାନ୍ୟ କମ ମାର୍କ ଥିବାରୁ ସମ୍ପୂର୍ଣ୍ଣ ଭାଙ୍ଗିପଡିଥିଲେ ଶୁଭ୍ରାଂଶୁ ୪/୫ ଦିନ ହେବ ମାନସିକ ସ୍ତରରେ ଦୁର୍ବଳ ହୋଇ ଶେଷରେ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଇଯାଇଥିଲେ । ସେ ରହୁଥିବା ଚେନ୍ନାଇ ସ୍ଥିତ ହଷ୍ଟେଲରୁ ତାଙ୍କ ଝୁଲନ୍ତା ଶବକୁ ତାମିଲନାଡୁ ପୁଲିସ ଜବତ କରି ପରିବାର ବର୍ଗକୁ ହସ୍ତାନ୍ତର କରିଛି । ତେବେ ପାଖରୁ କୌଣସି ସୁଇସାଇଡ ନୋଟ ମିଳିନଥିବା ବେଳେ ମାନସିକ ଚାପରେ ଏଭଳି କରିଥିବା ସନ୍ଦେହ କରାଯାଉଛି । ଏ ଖବର ଜଣା ପଡିବା ପରେ ଏବେ ସାରା ଅଞ୍ଚଳରେ ଶୋକର ଛାୟା ଖେଳିଯାଇଥିଲା । ତେବେ ତାଙ୍କ ମୃତଦେହ ଗାଁରେ ପହଞ୍ଚିବା ପରେ ପୁଅର ଶବକୁ ଜାବୁଡ଼ି ଧରି କାନ୍ଦି ଉଠିଥିଲେ ପରିବାର । ଏ ପୁଅ ଉଠୁ, ଏତେବେଳ ହେଲାଣି ଏଯାଏଁ ଶୋଇଛୁ । ତୋ ପାଇଁ କେତେ କଣ ରାନ୍ଧିକି ରଖିଛି, ତୋ ସାନ ଭଉଣୀ ପାଠ ପଢିକି ଆସୁ ମିଶିକି ଖାଇବ । ଦେଖୁନୁ ତୁ ରାଗିଛୁ ବୋଲି ତୋ ବାପା ବି ଏଯାଏଁ କିଛି ଖାଉନାଁହାନ୍ତି । ଅବୁଝା ହଅନି ରେ, ମୋ ସୁନା ପୁଅଟା । ସମସ୍ତେ କହୁଛନ୍ତି ମୁଁ କୁଆଡେ ପାଗଳ ହେଇଗଲିଣି । ହେଲେ ସେମାନେ କଣ ଜାଣିବେ ଆମ ଘର କଥା ! ମୁଁ ଜାଣିଛି ମୋ ପୁଅ ମିଛଟାରେ ଶୋଇଛି । ମୁଁ ପରା ମା ,ମୋ ଅବୁଝା ମନ କଣ ବୁଝୁଛି । ଏ , ମୋ ଛୁଆକୁ କୁଆଡେ ନେଇ ଯାଉଛ । ତାକୁ ଟିକେ ଆଖି ପୁରେଇ ଦେଖିନିଏ । ତାକୁ ଟିକେ ଗେଲ କରିବାକୁ ଦିଅ । ଏମିତି କହି ମା ବାହୁନି କାନ୍ଦୁଥିବା ବେଳେ ଅଞ୍ଚଳବାସୀଙ୍କ ଆଖିରେ ଲୁହ ଝଋ ପଡୁଥିଲା ।

Advertisement