ପାଲଲହଡ଼ା – ଅନୁଗୁଳ ଜିଲ୍ଲା ପାଲଲହଡ଼ା ବ୍ଲକ ଖମାର ରେଞ୍ଜ ଶଙ୍ଖମୁର ପଞ୍ଚାୟତ ବେଶଳିୟା ଜଙ୍ଗଲରେ ଏକ ହାତୀ ଗାତରେ ପଡ଼ି ଗତ ଶନିବାରଠାରୁ ଛଟପଟ ହେଉଥିଲା । ଖବର ପାଇଁ ବନବିଭାଗ ହାତୀକୁ ଉଦ୍ଧାର କରିଥିଲା । ତେବେ ଉଦ୍ଧାର ହେବା ପରେ ହାତୀ ଗାଁ ମୁହାଁ ହୋଇ ଦୁଇ ଭାଇଭଉଣୀଙ୍କୁ ଆକ୍ରମଣ କରିବାରୁ ସେମାନେ ଆହତ ହୋଇ ଚିକିତ୍ସିତ ହେଉଥିବା ଜଣା ପଡିଛି । ସୂଚନା ଅନୁସାରେ , ଗତ ଶନିବାର ରାତିରୁ ହିଁ ହାତୀଟି ଏକ ଗାତରେ ପଡ଼ି ଯାଇଥିଲା ।ଗାତରୁ ବାହାରି ନପାରି ଛଟପଟ ହେଉଥିଲା । ଖମାର ବନ ବିଭାଗ ପକ୍ଷରୁ ରାତି ପାଟ୍ରୋଲିଂ ବେଳେ ହାତୀଟି ଖାଲରେ ପଡ଼ିଥିବା କଥା ଜଣାପଡ଼ିଥିଲା । ବନ ବିଭାଗ ଆଜି ସ୍ଥାନୀୟ ଗ୍ରାମବାସୀଙ୍କ ସହଯୋଗରେ ଉଦ୍ଧାର କାମ ଆରମ୍ଭ କରିଥିଲା । ଏକ ଜେସିବି ମେସିନ ସାହାଯ୍ୟରେ ଗାତ ବାହାରକୁ ରାସ୍ତା କରିଥିଲା । ଦୀର୍ଘ ସମୟର ପରିଶ୍ରମ ପରେ ହାତୀ ଗାତରୁ ବାହାରି ଶଙ୍ଖମୁର ଗାଁ ଆଡ଼କୁ ମୁହାଁଇଥିଲା । ଏହି ସମୟରେ ଗାଁ ନିକଟରେ ଶଙ୍ଖମୁର ଗାଁ ଭାଇ ଭଉଣୀ ଅଶାନ୍ତି ବେହେରା ଓ ମୁରଲୀଧର ବେହେରା ମହୁଲ ଗୋଟାଉଥିଲେ । ସେମାନଙ୍କୁ ବଣୁଆ ହାତୀ ଆକ୍ରମଣ କରିବା ଫଳରେ ଉଭୟ ଭାଇ ଭଉଣୀ ଆହତ ହୋଇଥିଲେ । ସେମାନଙ୍କୁ ଖମାରର ଏକ ନର୍ସିଂହୋମ୍ରେ ଭର୍ତ୍ତି କରା ଯାଇଥିବା ଜଣାପଡ଼ିଛି ।
Advertisement
