ଅନୁଗୁଳ – ଋଣ ସୁଝି ନ ପାରିବାରୁ ଜଣେ ମହିଳାଙ୍କୁ ଗାଁରେ ବୈଠକ କରାଯାଇ ବେକରେ ଚପଲ ମାଳ ପକାଇ ବୁଲାଇବା ପରି ଏକ ଅଭାବନୀୟ ଘଟଣା ଅନୁଗୁଳ ଜିଲା କିଶୋରନଗର ବ୍ଲକ ହଣ୍ଡପା ଥାନା ଅଞ୍ଚଳରେ ଘଟିଥିଲା। । ଏନେଇ ହଣ୍ଡପା ଥାନାରେ ଅଭିଯୋଗ ହୋଇଥିଲା । ଏବେ ଉକ୍ତ ଘଟଣାର ଭିଡିଓ ସୋସିଆଲ ମିଡ଼ିଆରେ ଭାଇରାଲ୍ ହୋଇଛି । ଉକ୍ତ ଘଟଣାକୁ ନେଇ ସାରା ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ଅନୁସାରେ ,ମହିଳା ଜଣଙ୍କ ଗ୍ରାମ ପାଣ୍ଠିରୁ ୨ ହଜାର ଟଙ୍କା ଋଣ ନେଇଥିଲେ । ହେଲେ ଉକ୍ତ ଟଙ୍କା ସୁଝି ନ ପାରିବାରୁ ତାଙ୍କୁ ନେଇ ଗ୍ରାମରେ ମହିଳାମାନେ ଗତ ୧୪ ତାରିଖରେ ଏକ ବୈଠକ କରିଥିଲେ । ଉକ୍ତ ମହିଳାଙ୍କୁ ଋଣ ନେଇଥିବା ୨ ହଜାର ଟଙ୍କା ସହ ୩୦ ପ୍ରତିଶତ ସୁଧ ମିଶାଇ ଫେରସ୍ତ ପାଇଁ କିଛି ମହିଳା କହିଥିଲେ । ହେଲେ ମହିଳା ଜଣଙ୍କ ଗରିବ ଥିବାରୁ ଏତେ ଟଙ୍କା ସୁଧ ଦେଇ ପାରିବେ ନାହିଁ ବୋଲି କହିବା ସହ କେବଳ ମୂଳ ୨ ହଜାର ଟଙ୍କା ଫେରାଇବା ପାଇଁ କହିଥିଲେ । ଗ୍ରାମର କିଛି ମହିଳା ସୁଧ ସହ ଟଙ୍କା ଫେରାଇବା ପାଇଁ ଜିଦ୍ ଧରି ଘେରି ଯାଇଥିଲେ । ପରେ କିଛି ମହିଳା ତାଙ୍କ ତାଙ୍କ ହାତ ବାନ୍ଧି ମୁହଁରେ କଳା ଲଗାଇ ବେକରେ ଚପଲ ମାଳ ପକାଇ ନିର୍ଯାତନା ଦେଇ ଗାଁରେ ବୁଲାଇଥିଲେ । ପରେ ଉକ୍ତ ମହିଳା ଜଣଙ୍କ ହଣ୍ଡପା ଥାନାରେ ଅଭିଯୋଗ କରିବା ପରେ ପୁଲିସ ଗ୍ରାମର କିଛି ମହିଳାଙ୍କ ନାମରେ ମାମଲା ରୁଜୁ କରିଛି । ଏନେଇ ହଣ୍ଡପା ଆଇଆଇସି ନମିତା ନାୟକ କହିଛନ୍ତି, ଏନେଇ ପୁଲିସ ପକ୍ଷରୁ ଥାନାରେ ମାମଲା ରୁଜୁ କରାଯାଇଛି । ସୁପ୍ରିମକୋର୍ଟ ଆଇନ ଅନୁଯାୟୀ ପଦକ୍ଷେପ ନିଆଯାଇଛି । ଖୁବଶୀଘ୍ର ଏହାର ପଦକ୍ଷେପ ନିଆଯିବ।
