ମହିଳାଙ୍କୁ ପ୍ରେମ ନିବେଦନ କରିବାକୁ ଯାଇ ଫସିଗଲେ ପୁଲିସ ବାବୁ

ଅନୁଗୁଳ – ଘରେ କେହି ନଥିବା ବେଳେ ତଦନ୍ତର ଆଳ ଦେଖାଇ ଘର ଭିତରକୁ ଯାଇ ଜଣେ ମହିଳାଙ୍କୁ ପ୍ରେମ ନିବେଦନ କରି ଶୁକ୍ରବାର ଜଣେ ପୁଲିସ ବାବୁ ଆଡୁଆରେ ପଡି ଯାଇ ଥିଲେ । ମହିଳା ଓ ତାଙ୍କ ସମ୍ପର୍କୀୟ ଦୁଇ ଘଣ୍ଟା ଧରି ପୁଲିସ ବାବୁଙ୍କୁ ଅଟକ ରଖିବା ପରେ ବରିଷ୍ଠ ଅଧିକାରୀ ମାନେ ଯାଇ ତାଙ୍କୁ ଉଦ୍ଧାର କରି ଆଣିଥିଲେ । ଏଭଳି ଘଟଣା ଅନୁଗୁଳ ଜିଲ୍ଲା ଠାକୁରଗଡ ଅଂଚଳରେ ଘଟିଥିବା ବେଳେ ସ୍ଥାନୀୟ ଅଂଚଳରେ ଚର୍ଚ୍ଚାର ବିଷୟ ପାଲଟିଛି । ସୁଚନା ଅନୁସାରେ ଠାକୁରଗଡ ଥାନା ଅଂଚଳର ଜଣେ ମହିଳାଙ୍କର କିଛି ମାସ ପୁର୍ବରୁ ଏକ ମାମଲା ହୋଇଥିଲା ।  ଏହି ମାମଲା ପାଇଁ ସେ ଥାନାକୁ ଯାଇଥିଲେ । ଏହି ମାମଲା ପାଇଁ ଥାନାକୁ ଯିବା ଆସିବା ବେଳେ ଜଣେ ଏ ଏସ ଆଇଙ୍କ ସହ ତାଙ୍କର ପରିଚୟ ହୋଇଥିଲା । ଉଭୟଙ୍କ ପରିଚୟ ହେବା ପରେ ମହିଳାଙ୍କ ମୋବାଇଲ ନମ୍ବର ଏ ଏସ ଆଇ ଜଣଙ୍କ ନେଇଥିଲେ । ପରେ ସମ୍ପୃକ୍ତ ଏ ଏସ ଆଇ ଜଣଙ୍କ ମହିଳାଙ୍କୁ ଫୋନ କରି କଥାବର୍ତ୍ତା ହେବା ଆରମ୍ଭ କରି ଦେଇଥିଲେ । ଏପରିକି ଫୋନରେ କେତେଥର ପ୍ରେମ ନିବେଦନ କରିଥିଲେ । ତେବେ ଶୁକ୍ରବାର ସନ୍ଧ୍ୟାରେ ସେହି ଏ ଏସ ଆଇ ଜଣଙ୍କ ମହିଳାଙ୍କ ଘର ଠାରୁ କିଛି ଦୁରରେ ନିଜ ମୋଟରସାଇକେଲ ରଖି ମହିଳାଙ୍କ ଘରକୁ ଯାଇଥିଲେ । ସାଙ୍ଗରେ ନେଇ ଯାଇଥିଲେ ବିଅର୍ ବୋତଲ । ମହିଳାଙ୍କ ଘର ଭିତରକୁ ଯାଇ ମହିଳାଙ୍କୁ କରିଥିଲେ ପ୍ରେମ ନିବେଦନ । ଏହା ଦେଖି ମହିଳା ଜଣଙ୍କ ଚତୁରତାର ସହ ପୁଲିସ୍ ବାବୁଙ୍କୁ ଘରେ ବସାଇ ଦେଇ ବାହାରକୁ ଆସି ଘର କବାଟରେ ତାଲା ପକାଇ ଦେଇ ଗାଁ ଲୋକଙ୍କୁ ଘଟଣା ସମ୍ପର୍କରେ ଜଣାଇ ଦେଇଥିଲେ । ଗାଁ ଲୋକସବୁ ଏକାଠି ହୋଇ ଠାକୁରଗଡ଼ ଥାନା ପୁଲିସକୁ ଖବର ଦେଇ ଥିଲେ । ଖବର ପାଇ ଠାକୁରଗଡ଼ ଥାନା ଅଧିକାରୀ ପ୍ରିୟବ୍ରତ ଦାସ, ଆଠମଲ୍ଲିକ ଉପ ଆରକ୍ଷୀ ଅଧିକ୍ଷକ ବାଳକୃଷ୍ଣ କନର ସଦଳ ବଳେ ଘଟଣା ସ୍ଥଳରେ ପହଁଚି ଉତ୍ୟକ୍ତ ଲୋକମାନଙ୍କୁ ବୁଝା ସୁଝା କରିଥିଲେ । ବହୁ ସମୟ ଧରି ବୁଝାସୁଝା କରିବା ସହ ସମ୍ପୃକ୍ତ ପୁଲିସ୍ ବାବୁ ବହେ ଗାଳି କରିଥିଲେ । ପ୍ରାୟ ୨ ଘଣ୍ଟା ଧରି ଏକ ଅପ୍ରିତିକର ପରିସ୍ଥିତି ସୃଷ୍ଟି ହୋଇ ରହିଥିବା ବେଳେ ଶେଷରେ ଲୋକଙ୍କୁ ବୁଝାସୁଝା କରି ପୁଲିସ ବାବୁଙ୍କୁ ଉଦ୍ଧାର କରି ବରିଷ୍ଠ ଅଧିକାରୀ ମାନେ ଥାନାକୁ ଆଣି ପଚରା ଉଚୁରା କରୁଥିବା ଜଣା ପଡିଛି।

Advertisement